Psalms 31

armenian-nea

1Դավթի՝ սաղմոս իմաստության Երանի՜ նրանց, ում մեղքերին թողություն տրվեց, Եվ նրանց, ում բոլոր հանցանքները ներվեցին։

2Երանի՜ այն մարդուն, որին Տերը մեղավոր չի համարում, Եվ որի բերանում նենգություն չկա։

3Լռեցի ես, և իմ բոլոր ոսկորները մաշվեցին Մշտապես՝ գիշերուզօր Տիրոջն աղաղակելուց։

4Քո ձեռքը ծանրացավ ինձ վրա. դեպի թշվառություն դարձա, Որովհետև փշերն ինձ ծակծկեցին։

5Մեղքերս քեզ ցույց կտամ Եվ անօրենություններս չեմ ծածկի քեզանից։ Ասացի. «Ես ինքս կպատմեմ մեղքերս Տիրոջը», Եվ դու թողություն կտաս Իմ բոլոր մեղքերի ամբարշտությանը։

6Դրա համար բոլոր սրբերը անհրաժեշտ ժամին Աղոթքի կկանգնեն քո առջև. Առատ հեղեղներից ու ջրերից ոչինչ չի մոտենա նրանց։

7Դու ես իմ ապավենն այն նեղության մեջ, Որ շուրջս պատեց։ Ո՛վ իմ ցնծություն, փրկի՛ր ինձ նրանցից, Ովքեր պաշարեցին ինձ։

8«Քեզ իմաստուն կդարձնեմ և խելամուտ՝ այն ճանապարհին, Որով պիտի ընթանաս, և աչքերս վրադ կպահեմ»։

9Մի՛ եղեք ձիերի և ջորիների նման, որոնք ըմբռնում չունեն. Նրանց կզակը սանձով և պախուրցով պետք է ճմլել, Որ քեզ չմոտենան։

10Բազում են մեղավորների տանջանքները, Բայց Տիրոջը հուսացողներին Տիրոջ ողորմությունը կպարուրի։

11Ուրա՛խ եղեք և ցնծացե՛ք Տիրոջով, ո՜վ արդարներ, Պարծեցե՛ք բոլորդ, որ ուղիղ եք սրտով։

← Chapter 30 Chapter 32 →