Jeremiah 47

Cebuano RCPV 1999 (Ang Bag-ong Maayong Balita Biblia)

1Sa wala pa sulonga sa hari sa Ehipto ang Gaza, ang Ginoo misulti kanako bahin sa mga Filistihanon,

2“Tan-awa, nag-anam kadako ang tubig didto sa amihanan, ug mosanap kini daw suba nga nagbaha. Sanapan niini ang yuta ug ang tanan nga anaa niini, ang mga siyudad ug ang mga lumolupyo niini. Magpakitabang ang mga tawo ug ang tanan manghilak tungod sa ilang kalisdanan.

3Mabati unya nila ang hinagtok sa mga tiil sa mga kabayo, ug ang kasaba sa mga ligid sa mga karwahi. Ang mga amahan dili na mobalik aron pagkuha sa ilang kabataan; mangluyloy ang ilang mga kamot.

4Miabot na ang panahon nga laglagon ang Filistia aron maputol ang bisan unsang hinabang nga maggikan sa Tiro ug sa Sidon. Ako, ang Ginoo, maoy molaglag sa mga Filistihanon, ang tanan nga gikan sa kabaybayonan sa Caftor.

5Nagpaupaw ang katawhan sa Gaza tungod sa dakong kaguol ug nagun-ob ang Ascalon. Hangtod kanus-a magbangotan ang Filistia?

6Misinggit ka, ‘Espada sa Ginoo! Hangtod kanus-a ka magpadayon pagpanghasi? Balik na sa imong sakub ug ayaw na paggula!’

7Apan unsaon man sa pagpahulay niini nga gihatagan ko man kinig buluhaton? Gimandoan ko kini pagsulong sa Ascalon ug sa katawhan nga namuyo sa kabaybayonan.”

← Chapter 46 Chapter 48 →