Isaiah 53

Cebuano RCPV 1999 (Ang Bag-ong Maayong Balita Biblia)

1Ang mga tawo mitubag, “Kinsay makatuo sa amo karong gisangyaw? Kinsay gipakitaan sa Ginoo sa iyang gahom?

2Kay kabubut-on sa Ginoo nga ang iyang alagad motubo daw tanom diha sa ugang yuta. Dili siya madanihon ug wala siyay kaambong nga mabihag kita kaniya.

3Gitamay nato siya ug gisalikway; nakasinati siyag mga kagul-anan ug mga pag-antos; gani walay motan-aw kaniya; wala nato siya tagda ug gipakawalay bili lamang.

4“Apan giantos niya ang mga kasakitan nga kita untay angay mag-antos ug gipas-an ang atong mga alantuson; nagtuo kita nga ang iyang pag-antos silot kaniya sa Dios.

5Gani gisamaran siya tungod sa atong mga sala; napangos siya tungod sa atong pagkadaotan; giantos niya ang kastigo nga maoy nakaluwas kanato ug pinaagi sa iyang mga labod nangaayo kita.

6Kitang tanan sama sa mga karnero nga nasalaag ug wala mosubay sa hustong dalan. Apan siyay gidakdakan sa Ginoo sa tanan tang kasal-anan.

7“Bisag gidaugdaog siya ug gipaantos pag-ayo, nagpakahilom lamang siya; sama sa nating karnero nga gidala ngadto sa ihawan ug sama sa karnero atubangan sa moalot kaniya, wala gayod siyay timik.

8Gidala siya nga hinikawan sa hustisya ug walay nanumbaling sa iyang gidangatan; gihunosan siya sa iyang kinabuhi tungod sa kalapasan sa akong katawhan.

9Giandaman siyag lubnganan tipon sa mga kriminal, gilubong siya uban sa usa ka dato, bisag wala siya makabuhat ug daotan o makasultig bakak.”

10Ang Ginoo nag-ingon, “Maoy akong kabubut-on ang pagpaantos ug pagsakit kaniya; sa dihang gihimo niya ang iyang kaugalingon ingon nga halad alang sa sala, makita niya ang iyang mga kaliwat ug makabaton siyag taas nga kinabuhi; ug pinaagi kaniya matuman ang ubang plano.

11Inigkatapos sa iyang mga pag-antos, malipay na usab siya ug masayod siya nga wala makawang ang iyang mga pag-antos. Siya ang matarong kong alagad ug siya maoy mopas-an sa silot sa katawhan aron mahimo silang matarong.

12Busa pasidunggan ko siya uban sa mga bantogan ug gamhanan, kay gihatag man niya ang iyang kinabuhi, ug nahiagom sa angay nga dangatan sa mga kriminal. Gipas-an niya ang sala sa daghang mga tawo ug nag-ampo aron sila pasayloon.”

← Chapter 52 Chapter 54 →