Isaiah 19

Cebuano RCPV 1999 (Ang Bag-ong Maayong Balita Biblia)

1Mao kini ang mensahe mahitungod sa Ehipto: Ang Ginoo moadto sa Ehipto sakay sa tulin nga panganod. Mangurog sa iyang atubangan ang mga diosdios sa Ehipto ug panguyapan ang mga Ehiptohanon.

2Ang Ginoo miingon, “Paunayon kog away ang mga Ehiptohanon ug mag-unay ang mga magsoon, ang mga silingan, ang mga siyudad ug ang mga gingharian.

3Unya mawad-an ug kaisog ang mga Ehiptohanon ug libogon ko ang ilang mga plano. Magpakisayod unya sila sa mga diosdios ug sa mga salamangkero, sa mga tigkonsultag espiritu ug sa mga madyikero.

4Unya itugyan ko sila ngadto sa bangis nga agalon, ug harian sila sa walay kaluoyng hari. Ako, ang Ginoo nga Labing Gamhanan, maoy nagsulti niini.”

5Unya mohubas ang tubig sa Nilo, ug mangliki sa kauga ang suba,

6ug mabaho ang mga kanal niini, ug inanay nga mohubas ang mga sapa kansang mga tinubdan gikan sa Nilo; mangalaya ang mga bugang ug kupongkupong.

7Mahawan unya ang daplin sa Nilo kay mangalaya man ang tanang tanom nga anaa niini; ipadpad kini sila sa hangin ug dili na makita pag-usab.

8Magbangotan ug magsubo unya ang mga mangingisda, ug ang tanang tigpamasol sa Nilo; magsubo usab ang mga mamumukot.

9Maminghoy ang mga tighimo ug panapton nga lino, ingon man ang mga tighabol ug puting panapton.

10Kawad-ag paglaom ang mga pangulo sa mga Ehiptohanon ug magsubo ang mga trabahador.

11Buangbuang gayod ang mga pangulo sa Soan; binuang ang tambag nga gihatag sa mga maalamon ngadto sa hari sa Ehipto. Unya moingon sila nga kaliwat sila sa mga maalamon ug mga karaang hari?

12Hari sa Ehipto, hain na man ang imong mga maalamong magtatambag? Ipasaysay kanila ang buhaton sa Ginoo nga Labing Gamhanan batok sa Ehipto.

13Nangabuang na ang mga pangulo sa Soan ug nalimbongan ang mga pangulo sa Memfis; sila nga mga pangulo sa kabanayan sa Ehipto mao ray nagpasalaag sa maong nasod.

14Ang Ehipto gihatagan sa Ginoo ug espiritu sa kalibog; nagsusapinday ang maong nasod tungod kanila, sama sa usa ka hubog nga diha matumba sa iyang sinuka.

15Walay bisan kinsa sa Ehipto nga makatabang, dato man siya o kabos, inila o dili inila.

16Inig-abot nianang adlawa mahisama sa mga babaye ang mga Ehiptohanon ug mangurog sila sa kalisang inigkakita nila nga bakyawon sa Ginoo nga Labing Gamhanan ang iyang kamot aron pagkastigo kanila.

17Kalisangan sa mga Ehiptohanon ang nasod sa Juda ug mangahadlok ang tanan nga makabati sa ngalan sa Juda tungod sa buhaton sa Ginoo nga Labing Gamhanan batok kanila.

18Inig-abot nianang adlawa lima ka siyudad sa Ehipto ang maggamit sa pinulongan nga Hebreo ug manumpa nga molaban sila sa Ginoo nga Labing Gamhanan. Usa kanila tawgog “Siyudad sa Adlaw.”

19Inig-abot nianang adlawa adunay halaran alang sa Ginoo diha sa yuta sa Ehipto ug sa utlanan niini may batong haligi usab alang sa Ginoo.

20Ilhanan kini ug saksi sa presensya sa Ginoo nga Labing Gamhanan diha sa Ehipto. Inigpakitabang nila sa Ginoo tungod kay gidaugdaog sila, padad-an niya silag manluluwas ug labanan ug luwason niya sila.

21Ipaila unya sa Ginoo ang iyang kaugalingon ngadto sa mga Ehiptohanon ug simbahon nila siya ug halaran. Maghimo unya silag mga panaad ngadto sa Ginoo ug tumanon nila kini.

22Unya kastigohon sa Ginoo ang Ehipto apan ayohon usab niya sila. Modangop sila sa Ginoo ug pamation niya ang ilang mga hangyo ug ayohon usab sila.

23Inig-abot nianang adlawa aduna unyay dalan gikan sa Ehipto ngadto sa Asiria. Ang taga-Asiria mangadto sa Ehipto ug ang taga-Ehipto mangadto sa Asiria. Ang mga Ehiptohanon ug ang mga taga-Asiria magkuyog pagsimba.

24Niana unyang adlawa ang Israel mahisama sa Ehipto ug sa Asiria ug silang tulo mahimong panalangin sa tibuok kalibotan.

25Panalanginan unya sila sa Ginoo nga Labing Gamhanan nga mag-ingon, “Bulahan ang Ehipto nga akong katawhan, ang Asiria nga akong binuhat ug ang Israel nga akong piniling katawhan.”

← Chapter 18 Chapter 20 →