Genesis 41 — Cebuano RCPV 1999 (Ang Bag-ong Maayong Balita Biblia)

1Sa paglabay sa duha ka tuig, nagdamgo si Paraon nga nagtindog siya daplin sa Suba sa Nilo.

2May pito ka tambok ug nindot nga baka nga mitunga gikan sa suba ug nanibsib kini ug mga sagbot.

3Unya may laing pito ka baka nga daot ug niwang kaayo nga misunod pagtunga gikan sa suba ug mitupad pagtindog sa nahiunang mga baka didto sa daplin sa suba.

4Unya gikaon sa mga niwang nga mga baka ang pito nga pulos tambok. Ug nahigmata ang Paraon.

5Unya nakatulog pag-usab ang Paraon ug nagdamgo na usab siya. Sa iyang damgo nakita niya ang pito ka uhay nga himsog ug bus-ok nga mibuswak sa usa lang ka punoan.

6Unya mitungha ang laing pito ka daot nga mga uhay nga nanguyos tungod sa init nga hangin sa diserto gikan sa silangan

7ug gilamoy nila ang pito ka uhay nga himsog ug bus-ok. Unya nahigmata si Paraon ug nasayran niya nga damgo lang diay kadto.

8Sa pagkabuntag nahasol siya busa gipatawag niya ang tanang salamangkero ug mga tawong maalamon sa Ehipto. Gisugilon niya kanila ang iyang mga damgo apan walay usa kanila nga nakatug-an kaniya sa kahulogan niini.

9Unya ang tigtagay sa bino miingon kang Paraon, “Karong adlawa nahinumdoman nako ang nahimo kong sayop.

10Sa dihang nasuko ka sa imong mga sulugoon, gipabilanggo mo ako ug ang pangulo sa mga panadero didto sa balay sa kapitan sa mga guwardiya.

11Usa niana ka gabii ang usag-usa kanamo nagdamgo ug lainlain ang kahulogan sa among mga damgo.

12Didto sa bilanggoan may usa ka batan-ong Hebreo nga ulipon sa kapitan sa mga guwardiya nga gibilanggo tipon kanamo ug gisuginlan namo siya sa among damgo. Gitug-anan kami niya sa kahulogan sa among tagsatagsa ka damgo

13ug ang tanan natuman gayod sumala sa iyang giingon. Nahibalik ako sa akong katungdanan ug gibitay ang panadero.”

14Busa gipatawag ni Paraon si Jose ug gikuha dayon siya gikan sa bilanggoan. Human siya makapamarbas ug makailis sa iyang bisti, miatubang siya kang Paraon.

15Si Paraon miingon kang Jose, “May damgo ako ug walay makasaysay sa kahulogan niini. May nagsugilon kanako nga makahubad kag damgo.”

16Si Jose mitubag, “Dili ako! Ang Dios maoy mohatag kang Paraon sa tukma gayod nga tubag.”

17Si Paraon miingon, “Nagdamgo ako nga nagtindog ako sa daplin sa Suba sa Nilo.

18Unya may pito ka tambok ug nindot nga baka nga mitunga gikan sa suba ug nanibsib sa mga sagbot sa daplin sa suba.

19Unya mitunga usab gikan sa suba ang laing pito ka baka nga daot ug niwang kaayo. Sila ang labing niwang sa tanang baka nga akong nakita sa tibuok Ehipto.

20Gipangaon sa niwang nga mga baka ang mga tambok nga baka.

21Ug bisag nahurot na nilag kaon ang pito ka tambok nga baka, walay makaila nga sila may nakaon kay daot man gihapon silag mga hitsura. Unya nahigmata ako.

22Ug nagdamgo na usab ako: nakita ko ang usa ka punoan nga may pito ka uhay nga bus-ok ug himsog ug mga lugas.

23Unya may misunod pagtungha nga laing pito ka uhay nga kuyos tungod sa init nga hangin sa diserto gikan sa silangan.

24Gilamoy sa kuyos nga mga uhay ang maayong mga uhay. Gisuginlan ko niini ang mga salamangkero apan walay usa kanila nga nakasaysay sa kahulogan niini.”

25Si Jose miingon kang Paraon, “Ang duha mo ka damgo usa ray kahulogan. Gipadayag sa Dios kanimo ang iyang buhaton.

26Ang pito ka tambok nga baka ug pito ka bus-ok nga mga uhay nagkahulogan ug pito ka tuig.

27Ang pito ka niwang nga baka ug ang pito ka uhay nga kuyos tungod sa init nga hangin sa diserto mao ang pito ka tuig nga gutom.

28Mahitabo gayod kini sumala sa giingon ko kanimo: gipadayag sa Dios kanimo ang iyang buhaton.

29Mahitabo ang pito ka tuig nga hilabihan kaabunda ang abot sa mga kaumahan sa tibuok Ehipto.

30Unya mobanos ang pito usab ka tuig nga gutom ug tungod niini hikalimtan ang mga tuig nga abunda kaayo ang mga pagkaon sa tibuok Ehipto. Maalaot ang tibuok nasod tungod sa maong gutom.

31Wala nay mahinumdoman sa panahon sa kadagaya tungod sa hilabihan kamakalilisang nga gutom.

32Gipadamgo ka sa makaduha, Paraon, aron masayran mo nga ang Dios maoy nagbuot niini ug nga himoon gayod niya kini sa dili madugay.

33“Busa pagpilig tawo nga masinabuton ug maalamon ug himoa siyang tinugyanan mo sa tibuok Ehipto.

34Pagtudlo usab ug mga opisyal sa tibuok nasod aron mangulikta sa ikalimang bahin sa abot sa kaumahan sulod sa pito ka tuig nga abunda ang abot.

35Hatagi silag awtoridad sa pagtigom ug mga pagkaon diha sa mga siyudad ug sa pagbantay niini.

36Ang maong mga pagkaon itagana sa tibuok Ehipto alang sa pito ka tuig nga gutom aron dili mangamatay ang mga tawo.”

37Nakauyon si Paraon ug ang iyang mga opisyal sa maong plano.

38Ug miingon si Paraon kanila, “Asa man kita makakitag laing tawo nga sama kang Jose nga nagbaton sa espiritu sa Dios?”

39Busa miingon si Paraon kang Jose, “Kay gipadayag man sa Dios kanimo kining tanan, walay tawo nga labaw kanimog salabotan o mas maalam pa kay kanimo.

40Himoon ko ikawng gobernador sa akong nasod ug ang tanan kong katawhan motuman sa imong sugo. Ako ray labaw kanimo kay hari man ako.

41Busa gobernador ka na karon sa tibuok Ehipto.”

42Unya gihuslo ni Paraon ang iyang singsing nga igtitimbri ug gisul-ob niya kini sa tudlo ni Jose. Gipasul-ob niya si Jose sa bisting lino nga pino ug gikuwentasan ug bulawan.

43Gipagamit ni Paraon kang Jose ang ikaduhang karwahi nga harianon ug ang iyang mga piniling guwardiya gipauna niya kang Jose nga nagsinggit, “Yukbo kamo kaniya!” Ingon niini ang pagkahimong gobernador ni Jose sa tibuok Ehipto.

44Miingon si Paraon kaniya, “Ako ang hari! Maoy akong pagbuot nga walay tawo sa tibuok Ehipto nga makabuhat ug bisan unsa gawas kon may pagtugot gikan kanimo.”

45Ginganlan niya si Jose ug Sapenat-panea ug gipapangasawa niya si Jose kang Asenat nga anak ni Potifera, pari sa siyudad sa On. Unya gilibot ni Jose ang tibuok Ehipto.

46Nag-edad si Jose ug 30 sa dihang misugod siya pag-alagad kang Paraon nga hari sa Ehipto. Ug nalukop gayod niya pagsuroy ang yuta sa Ehipto.

47Sulod sa pito ka tuig nga kadagaya, daghan kaayo ang abot sa kaumahan.

48Gitigom ni Jose ang tanang abot sulod sa pito ka tuig nga kadagaya ug iya kining gitipigan sa mga siyudad. Gitigom niya sa matag siyudad ang mga abot sa kaumahan nga naglibot niini.

49Ug labihan kadaghan ang iyang natigom nga kini daw mga balas sa baybayon. Tungod sa kadaghan, giundangan niya ang pagtakos niini kay dili na man kini matakos.

50Sa wala pa moabot ang gutom, may duha na ka anak nga lalaki si Jose ug si Asenat.

51Si Jose miingon, “Ang Dios maoy nagbuot nga ako malimot sa akong mga pag-antos ug sa tibuok panimalay sa akong amahan.” Busa ginganlan niyag Manases ang una niyang anak.

52Ug miingon pa gayod siya, “Gihatagan ako sa Dios ug mga anak dinhi niining yutaa diin nagkalisodlisod ako.” Busa ginganlan niyag Efraim ang ikaduha niyang anak.

53Nahuman ang pito ka tuig nga kadagaya sa tibuok Ehipto.

54Unya mibanos ang pito ka tuig nga gutom sumala gayod sa giingon ni Jose. May gutom sa tanang nasod gawas sa Ehipto.

55Sa dihang giabot na sa gutom ang tibuok Ehipto, nangayog pagkaon ang katawhan kang Paraon. Ug giingnan ni Paraon ang tanang Ehiptohanon, “Pangadto kamo kang Jose ug sunda ang iyang isulti kaninyo.”

56Unya sa dihang mikaylap ug migrabe na ang gutom sa tibuok Ehipto, gipangablihan ni Jose ang mga tipiganan sa pagkaon ug gipamaligya kini ngadto sa mga Ehiptohanon.

57Nangadto sa Ehipto ang katawhan sa ubang kanasoran aron mamalit ug pagkaon kang Jose kay grabi na man ang gutom sa tibuok kalibotan.