Genesis 23

Cebuano RCPV 1999 (Ang Bag-ong Maayong Balita Biblia)

1Namatay si Sara sa 127 na ang iyang panuigon.

2Didto siya mamatay sa Hebron sa yuta sa Canaan. Nagbangotan si Abraham sa pagkamatay ni Sara.

3Unya mibiya siya sa dapit diin gihaya ang iyang asawa ug giingnan niya ang mga Hitihanon,

4“Usa ako ka langyaw nga lumalabay dinhi. Baligyai akog yuta nga kalubngan ko sa akong asawa.”

5Mitubag sila kaniya,

6“Sir, giila ka namo nga pangulong gamhanan. Ilubong ang imong asawa sa among labing maayong lubnganan. Walay usa kanamo nga magdumili paghatag kanimo ug luna aron kalubngan mo kaniya.”

7Unya mitindog si Abraham, miyukbo kanila

8ug miingon, “Kon uyon kamo nga ilubong ko dinhi ang akong asawa, palihog hangyoa si Efron nga Hitihanon, anak ni Zohar

9nga ibaligya niya kanako ang Langub sa Macpela nga iyang gipanag-iya. Anaa kini sa daplin sa iyang uma. Sultihi siya sa pagbaligya niini kanako sa hustong presyo dinhi sa inyong atubangan aron maako ang yuta nga akong kalubngan.”

10Niadtong higayona naglingkod si Efron uban sa mga Hitihanon didto sa tigomanan sa ganghaan sa lungsod. Miingon siya atubangan sa tanan,

11“Sir, dili ko ihikaw kanimo ang tibuok uma ug ang langub nga anaa niini. Dinhi sa atubangan sa akong mga kadugo ihatag ko kini kanimo aron kalubngan sa imong asawa.”

12Apan si Abraham miyukbo sa mga tawo

13ug sa tingog nga nabati sa tanan, giingnan niya si Efron, “Kon mao kana, paliton ko ang tibuok uma. Dawata ang akong ibayad ug didto ilubong ko ang akong asawa.”

14Mitubag si Efron,

15“Sir, ang presyo niining yutaa 400 ka buok salapi nga plata apan dili kana maoy mahinungdanon. Ilubong lang didto ang imong asawa.”

16Miuyon si Abraham ug gitimbang niya ang kantidad nga gipangayo ni Efron atubangan sa mga Hitihanon—400 ka salapi nga plata sumala sa timbangan nga gigamit sa mga komersyante.

17Niining paagiha naiya ni Abraham ang yuta nga kaniadto iya ni Efron didto sa Macpela, silangan sa Mamre. Naglakip kini sa uma, sa langub ug sa kakahoyan sa uma hangtod sa iyang mga utlanan.

18Giila kini sa mga Hitihanon nga mitambong sa tigom didto nga iya na ni Abraham.

19Unya gilubong ni Abraham ang iyang asawa nga si Sara sa maong langub sa yuta sa Canaan.

20Busa napanag-iya ni Abraham ang uma ug ang langub niini nga kaniadto ila sa mga Hitihanon.

← Chapter 22 Chapter 24 →