Titus 3

cebuano-2011

1Pahinumdomi sila nga magmasinugtanon sa mga pangulo ug mga kagamhanan, magmatinumanon, mag-andam alang sa tanang maayong buhat,

2dili magsulti ug daotan mahitungod kang bisan kinsa, magmakigdaiton, magmalumo, ug magpakita sa hingpit nga pagkamatinahuron ngadto sa tanang tawo.

3Kay kaniadto kita usab mga walay kahibalo, mga masukihon, nahisalaag, nagpaulipon sa nagkalainlaing mga pangibog ug mga kahilayan, nagkinabuhi diha sa daotan ug kasina, gidumtan sa mga tawo ug nagdumtanay sa usa ug usa.

4Apan sa gipadayag na ang pagkamaluluy-on sa Dios nga atong Manluluwas ug ang iyang gugma alang sa mga tawo,

5kita iyang giluwas, dili tungod sa mga binuhatan nga atong nahimo diha sa pagkamatarong, kondili tungod sa iyang kaluoy, pinaagi sa paghugas ngadto sa bag-ong pagkatawo ug sa pagbag-o pinaagi sa Espiritu Santo

6nga iyang gibubo nga naghingapin nganhi kanato pinaagi kang Jesu-Cristo nga atong Manluluwas,

7aron kita himoong matarong pinaagi sa iyang grasya ug mahimong mga manununod diha sa paglaom sa kinabuhing dayon.

8Ang maong pulong kasaligan. Ug nanghinaot ako nga ikaw lig-on nga magpamatuod niining mga butanga, aron ang mga nagtuo sa Dios magtinguha sa pagbuhat kanunay sa mga maayong buhat. Kining mga butanga maayo ug mapuslanon sa mga tawo.

9Apan likayi ang binuang nga mga pakiglantugi, mga pagsubay sa kagikan, mga pakiglalis ug mga pakig-away mahitungod sa balaod kay kini walay kapuslanan ug kawang lamang.

10Human nimo katambagi sa makausa o makaduha ang tawo nga tigpasiugda sa pagkabahinbahin, likayi siya,

11ingon nga ikaw nahibalo nga ang maong tawo nahisalaag ug nagpakasala, hinukman sa iyang kaugalingon.

12Sa diha nga ikapadala ko na kanimo si Artemas o si Tiquico, paningkamoti ang pag-adto kanako sa Nicopolis, kay nakahukom ako sa pagpuyo didto panahon sa tingtugnaw.

13Himoa ang labing maayo sa pagpagikan kang Zenas nga abogado ug kang Apolos, nga wala untay makulang kanila.

14Himoa usab nga makakat-on ang atong mga sakop sa pagbuhat kanunay sa mga maayong buhat aron sila makatabang sa mga tabangonon, ug nga dili unta sila mahimong dili mabungahon.

15Ang tanan nga ania uban kanako nangumosta kanimo. Ipangumosta kami kanila nga nahigugma kanato diha sa pagtuo. Ang grasya mag-uban kaninyong tanan.