Psalms 74

cebuano-2011

1O Dios, nganong gisalikway nimo kami hangtod sa kahangtoran? Ngano ba nga nag-aso ang imong kapungot batok sa mga karnero sa imong sibsibanan?

2Hinumdomi ang imong katilingban nga imong gikuha sa dugay nang panahon, nga imong gilukat aron mahimo nga banay sa imong panulundon! Hinumdomi ang bukid sa Zion, nga imong gipuy-an.

3Ilakang ang imong mga tiil ngadto sa mga nangaguba sa dayon; ang kaaway miguba sa tanan didto sa balaang dapit.

4Ang imong mga kaaway nagngulob sa taliwala sa imong balaang dapit; gipahimutang nila ang ilang mga timailhan aron mahimong mga ilhanan.

5Sa itaas nga agianan giputol nila ang baga nga mga kahoy pinaagi sa wasay.

6Ug unya ang tanang mga kinulit ilang gipangguba pinaagi sa wasay ug martilyo

7Ilang gisunog sa kalayo ang imong balaang puluy-anan; ilang gipasipad-an ang dapit nga puluy-anan sa imong ngalan, gipukan kini ngadto sa yuta.

8Nag-ingon sila sa ilang kasingkasing, “Laglagon nato sila sa hingpit”; gisunog nila ang tanang mga dapit nga tagboanan sa Dios nga didto sa yuta.

9Wala na namo makita ang among mga ilhanan; wala nay bisan usa ka propeta, ug walay bisan usa kanamo nga nahibalo hangtod kanus-a.

10Hangtod kanus-a ba, O Dios, nga ang kabatok magtamay? Magpasipala ba ang kaaway sa imong ngalan hangtod sa kahangtoran?

11Ngano ba nga gipugngan nimo ang imong kamot, ang tuo nimong kamot? Nganong gitipigan nimo kini sa imong dughan?

12Apan ang Dios nga akong Hari gikan pa sa kakaraanan, naghimo sa kaluwasan diha sa taliwala sa yuta.

13Imong gipikas ang dagat pinaagi sa imong kusog; imong gidugmok ang mga ulo sa mga dragon diha sa katubigan.

14Gidugmok nimo ang mga ulo sa Lebiatan; imong gihatag siya ingon nga pagkaon alang sa mga binuhat nga nagpuyo sa kamingawan.

15Imong gipabuswak ang tubod ug ang suba; gipauga nimo ang dagkong mga suba.

16Imo ang adlaw ug imo usab ang gabii; imong giandam ang kahayag ug ang adlaw.

17Gipahimutang nimo ang tanang mga utlanan sa yuta; gibuhat nimo ang ting-init ug tingtugnaw.

18Hinumdomi kini, O Ginoo, giunsa sa mga kaaway sa pagpakaulaw, ug ang buangbuang nga katawhan nagpasipala sa imong ngalan.

19Ayaw itugyan ngadto sa mga ihalas nga mananap ang kinabuhi sa imong salampati; ayaw kalimti ang kinabuhi sa imong mga kabos hangtod sa kahangtoran.

20Tagda ang imong kasabotan kay ang mga ngitngit nga dapit sa yuta napuno sa mga puluy-anan sa kabangis.

21Ayaw itugot nga ang dinaogdaog maulawan. Padayega sa imong ngalan ang mga kabos ug nanginahanglan.

22Tindog, O Dios, labani ang imong katungod; hinumdomi giunsa sa buangbuang nga tawo pagtamay kanimo sa tibuok nga adlaw!

23Ayaw kalimti ang tingog sa imong mga kaaway, ang tingog niadtong mga nakigbatok kanimo nga nagkakusog!

← Chapter 73 Chapter 75 →