Psalms 54

cebuano-2011

1Luwasa ako, O Dios, pinaagi sa imong ngalan, ug pamatud-i ako nga matarong pinaagi sa imong gahom.

2Patalinghogi ang akong pag-ampo, O Dios; dungga ang mga pulong sa akong baba.

3Kay ang mga mapahitas-on nakigbatok kanako, ug ang mga tawo nga bangis nangita sa akong kinabuhi; wala nila ipahimutang ang Dios diha sa ilang atubangan.

4Tan-awa, ang Dios mao ang akong magtatabang; ang Ginoo mao ang tigpanalipod sa akong kinabuhi.

5Balosan niya ug daotan ang akong mga kaaway; diha sa imong pagkamatinumanon laglaga sila.

6Uban sa usa ka kinabubut-on nga halad, maghalad ako kanimo; magpasalamat ako sa imong ngalan, O Ginoo, kay kini maayo.

7Kay giluwas niya ako gikan sa tanan nga kasamok, ug ang akong mata nakakita sa kadaogan batok sa akong mga kaaway.

← Chapter 53 Chapter 55 →