Psalms 48

cebuano-2011

1Gamhanan ang Ginoo ug dalaygon gayod kaayo diha sa siyudad sa atong Dios! Ang iyang bungtod nga balaan,

2matahom sa gitas-on, ang kalipay sa tibuok kalibotan, ang Bukid sa Zion, sa mga dapit sa amihanan, ang siyudad sa gamhanang Hari.

3Diha sa mga palasyo niini ang Dios nagpaila sa iyang kaugalingon ingon nga lig-ong panalipod.

4Kay tan-awa, ang mga hari nagtigom sa ilang kaugalingon, sila naghiusa sa pagsulong.

5Sa ilang pagkakita niini, sila nahibulong; nangalisang sila, nangagiw sila;

6mihakop kanila ang pagpangurog, kasakit sama sa usa ka babaye nga nanganak.

7Pinaagi sa hangin sa silangan giguba nimo ang mga barko sa Tarsis.

8Ingon sa among nadungog mao usab ang among nakita sa siyudad sa Ginoo sa mga panon, sa siyudad sa atong Dios, nga gipahimutang sa Dios hangtod sa kahangtoran.

9Namalandong kami sa imong gugmang walay paglubad, O Dios, diha sa taliwala sa imong Templo.

10Sumala sa imong ngalan, O Dios, ang pagdayeg usab kanimo miabot ngadto sa mga kinatumyan sa yuta. Ang imong tuong kamot napuno sa pagkamatarong;

11palipaya ang bukid sa Zion! pamayaa ang mga anak nga babaye sa Juda, tungod sa imong mga paghukom!

12Panglakaw kamo libot sa Zion ug libota gayod ninyo kini, ihapa ninyo ang iyang mga tore,

13timan-i ninyo pag-ayo ang iyang mga kuta, sud-onga ang iyang mga palasyo; aron ikasugilon ninyo sa mosunod nga kaliwatan

14nga kini mao ang Dios, atong Dios hangtod sa kahangtoran. Siya mao ang atong magmamando hangtod sa kahangtoran.

← Chapter 47 Chapter 49 →