Psalms 24

cebuano-2011

1Iya sa Ginoo ang yuta ug ang tanan nga anaa niini, ang kalibotan ug ang mga nagpuyo niini;

2kay siya ang nagpahiluna niini ibabaw sa kadagatan, ug nagpahimutang niini ibabaw sa katubigan.

3Kinsa ang motungas sa bungtod sa Ginoo? Ug kinsa ang motindog sa iyang balaan nga dapit?

4Siya nga hinlo ug mga kamot ug adunay putli nga kasingkasing, siya nga wala magbayaw sa iyang kalag ngadto sa kabakakan, ug wala manumpa ug bakak.

5Makadawat siya ug panalangin gikan sa Ginoo, ug pagkamatarong gikan sa Dios sa iyang kaluwasan.

6Kini mao ang kaliwatan nila nga nangita kaniya, nga nangita sa nawong sa Dios ni Jacob.

7Iisa ninyo ang inyong mga ulo, O mga ganghaan! ug iisa ninyo ang inyong kaugalingon, O mga pultahan nga karaan! aron ang Hari sa himaya mosulod.

8Kinsa ba ang Hari sa himaya? Ang Ginoo, kusgan ug gamhanan, ang Ginoo, gamhanan diha sa panggubatan.

9Iisa ninyo ang inyong mga ulo, O mga ganghaan! ug iisa ninyo ang inyong kaugalingon, O mga pultahan nga karaan! aron ang Hari sa himaya mosulod.

10Kinsa ba kining Hari sa himaya? Ang Ginoo sa mga panon, siya mao ang Hari sa himaya!

← Chapter 23 Chapter 25 →