Psalms 144

cebuano-2011

1Dalaygon ang Ginoo nga akong bato, nga nagtudlo sa akong mga kamot sa pagpakiggubat, ug sa akong mga tudlo sa pagpakig-away;

2Ang akong bato ug ang akong kuta, ang akong tigpanalipod ug akong manluluwas, ang akong taming, nga mao ang akong gidangpan, nga nagbuntog sa katawhan ubos kaniya.

3O Ginoo, unsa ba ang tawo, nga ikaw nagtagad man kaniya, o ang anak sa tawo nga ikaw naghunahuna man kaniya?

4Ang tawo sama sa gininhawa ang iyang mga adlaw sama sa lumalabay nga anino.

5Ipaubos ang imong kalangitan, O Ginoo, ug kanaog! Hikapa ang kabukiran aron kini moaso!

6Pakidlata ang mga kilat ug patibulaaga sila, ipadala ang imong mga udyong ug buntoga sila!

7Tuy-ora ang imong kamot gikan sa kahitas-an, luwasa ako ug ipalingkawas ako gikan sa daghang katubigan, gikan sa kamot sa mga langyaw,

8nga ang mga baba nagsulti ug bakak, ug nga ang tuong kamot mao ang tuong kamot sa kabakakan.

9Moawit ako ug bag-ong alawiton kanimo, O Dios; sa alpa nga may napulo ka kuwedras magtugtog ako alang kanimo,

10nga naghatag ug kadaogan sa mga hari, nga nagluwas kang David nga imong alagad.

11Luwasa ako, gikan sa bangis nga espada ug luwasa ako gikan sa kamot sa mga langyaw, nga ang mga baba nagsulti ug bakak, ug nga ang tuong kamot mao ang tuong kamot sa kabakakan.

12Ang among mga anak nga lalaki diha sa ilang kabatan-on, mahisama unta sa mga tanom nga hingpit nga pagkatubo, ang among mga anak nga babaye mahisama unta sa mga haligi sa daplin nga gitabas alang sa pagtukod sa balay sa hari;

13mapuno unta ang among mga kamalig, nga sangkap sa tanang matang sa abot; ang among mga karnero magpasanay unta ug linibo, ug tagnapulo ka libo sa among mga kapatagan;

14Ang among kahayopan modaghan unta ang mga nati nga walay madaot o makuha; wala untay maghilak sa kasubo diha sa among kadalanan!

15Malipayon ang katawhan nga natumngan sa maong mga panalangin? Malipayon ang katawhan nga ang ilang Dios mao ang Ginoo!

← Chapter 143 Chapter 145 →