Numbers 36

cebuano-2011

1Unya ang mga pangulo sa mga panimalay sa katigulangan sa mga kaliwat ni Gilead, ang anak ni Makir nga anak ni Manases, sa mga panimalay sa katigulangan sa mga kaliwat ni Jose, miduol ug misulti sa atubangan ni Moises ug sa atubangan sa mga pangulo, sa mga pangulo sa mga panimalay sa katigulangan sa katawhan sa Israel,

2ug sila miingon, “Ang Ginoo nagsugo sa akong agalon sa paghatag sa yuta ingon nga panulundon pinaagi sa pagripa ngadto sa katawhan sa Israel, ug ang akong agalon gisugo sa Ginoo sa paghatag sa panulundon ni Zelofehad nga among igsoon nga lalaki ngadto sa iyang mga anak nga babaye.

3Apan kon sila mangaminyo sa bisan kinsang anak nga lalaki sa laing mga banay sa katawhan sa Israel, ang ilang panulundon kuhaon gikan sa panulundon sa among katigulangan, ug madugang ngadto sa panulundon sa banay diin sila mahisakop, busa kini makuha gikan sa natumngan nga among panulundon.

4Ug sa diha nga ang tuig sa kalipay sa katawhan sa Israel moabot na, ang ilang panulundon madugang ngadto sa panulundon sa banay diin sila mahisakop busa ang ilang panulundon kuhaon gikan sa panulundon sa banay sa among katigulangan.”

5Ug si Moises misugo sa katawhan sa Israel sumala sa pulong sa Ginoo, nga nag-ingon, “Ang banay sa mga anak ni Jose nagsulti sa matarong.

6Mao kini ang butang nga gisugo sa Ginoo mahitungod sa mga anak nga babaye ni Zelofehad: ‘Paminyoa sila kang bisan kinsa nga ilang gihunahuna nga labing maayo, apan sulod lamang sa panimalay sa banay sa ilang amahan sila magminyo.

7Ang panulundon sa katawhan sa Israel dili balhinon gikan sa laing banay ngadto sa usa ka banay; kay ang matag usa sa katawhan sa Israel magpabilin diha sa iyang panulundon sa banay sa iyang katigulangan.

8Ug ang tanang anak nga babaye nga makapanag-iya ug usa ka panulundon sa bisan diin nga banay sa katawhan sa Israel, kinahanglan nga maasawa sa usa ka lalaki sa panimalay sa banay sa iyang amahan aron ang matag usa sa katawhan sa Israel magbaton sa panulundon sa iyang katigulangan.

9Busa walay panulundon nga balhinon gikan sa usa ka banay ngadto sa laing banay kay ang matag banay sa katawhan sa Israel magpabilin diha sa iyang kaugalingong panulundon.’ ”

10Ang mga anak nga babaye ni Zelofehad nagbuhat sumala sa gisugo sa Ginoo kang Moises,

11kay si Mahla, si Tirsa, si Holga, si Milca ug si Noa, ang mga anak nga babaye ni Zelofehad, nangaminyo ngadto sa mga anak sa mga igsoon sa ilang amahan.

12Sila nangaminyo ngadto sa mga panimalay sa mga anak ni Manases nga anak ni Jose, ug ang ilang panulundon nagpabilin diha sa banay sa panimalay sa ilang amahan.

13Kini mao ang mga kasugoan ug ang mga tulumanon nga gisugo sa Ginoo pinaagi kang Moises ngadto sa katawhan sa Israel didto sa kapatagan sa Moab duol sa Jordan dapit sa Jerico.