Nehemiah 5

cebuano-2011

1Unya didtoy usa ka dakong pagtuaw sa katawhan ug sa ilang mga asawa batok sa ilang mga kaigsoonan nga mga Judio.

2Kay aduna didtoy miingon, “Uban sa among mga anak nga lalaki ug sa among mga anak nga babaye, daghan kami. Manguha kami ug trigo aron makakaon kami ug mabuhi.”

3Aduna usab didtoy miingon, “Giprenda namo ang among kaumahan, ang among kaparasan ug ang among mga balay aron makakuha kami ug makaon tungod sa gutom.”

4Aduna didtoy miingon, “Kami nanghulam ug salapi aron ibuhis sa hari tungod sa among kaumahan ug sa among kaparasan.

5Karon ang among unod sama sa unod sa among mga kaigsoonan, ang among mga anak sama sa ilang mga anak, gani gipugos namo ang among mga anak nga lalaki ug ang among mga anak nga babaye aron mahimong ulipon, ug ang uban sa among mga anak nga babaye naulipon na. Apan wala sa among gahom ang pagtabang niini kay laing mga tawo ang nanag-iya sa among kaumahan ug sa among kaparasan.”

6Nasuko ako pag-ayo sa pagkadungog nako sa ilang pagtuaw ug niining mga pulonga.

7Akong gitimbangtimbang sa akong kaugalingon ug akong gisudyaan ang mga kadagkoan ug ang mga tinugyanan. Miingon ako kanila, “Kamo nagkuha ug tubo, ang matag usa gikan sa iyang igsoon.” Ug ako nagpatawag ug usa ka dakong tigom batok kanila,

8ug ako miingon kanila, “Kami sumala sa among nahimo naglukat sa among mga kaigsoonan nga mga Judio nga gipamaligya ngadto sa mga nasod, apan kamo nagbaligya hinuon sa inyong mga kaigsoonan aron sila mabaligya nganhi kanamo!” Nangahilom sila ug wala makakita ug pulong nga ikasulti.

9Busa ako miingon, “Ang butang nga inyong gibuhat dili maayo. Dili ba kinahanglan nga kamo maglakaw diha sa pagkahadlok sa atong Dios, aron sa pagsanta sa mga pagtamay sa atong mga kaaway?

10Dugang pa, ako ug ang akong mga kaigsoonan ug ang akong mga alagad nagpahulam kanila ug salapi ug trigo. Atong hunongon ang pagkuha ug tubo.

11Iuli kanila niining adlawa ang ilang kaumahan, ang ilang kaparasan, ang ilang kaolibohan ug ang ilang mga balay ug ang tubo sa salapi, sa trigo, sa bino ug sa lana nga inyong gipaningil kanila.”

12Unya sila miingon, “Among ipang-uli kini ug dili kami mangayo kanila ug bisan unsa. Kami magbuhat sumala sa imong gisulti.” Unya akong gitawag ang mga pari, ug gipapanumpa nako sila, nga sila magbuhat sumala sa ilang gisaad.

13Giyabyab usab nako ang akong bakos nga panapton ug miingon, “Sa ingon niini ang Dios magpapahawa unta sa matag tawo nga dili magtuman niining saad gikan sa iyang balay ug gikan sa iyang buhat. Sa ingon niini iyabyab unta siya ug kuhaan sa sulod.” Ug ang tibuok nga katilingban miingon, “Amen,” ug nagdayeg sa Ginoo. Ug ang katawhan nagbuhat sumala sa ilang gisaad.

14Dugang pa, sukad sa panahon nga ako gitudlo aron mahimo nilang gobernador sa yuta sa Juda, sukad sa ika-20 nga tuig hangtod sa ika-32 nga tuig ni Artaxerxes nga hari, napulo ug duha ka tuig, ako o ang akong mga kaigsoonan wala mokaon sa pagkaon sa gobernador.

15Ang unang mga gobernador nga nag-una kanako naghatag ug bug-at nga mga palas-anon sa katawhan ug nagkuha sa pagkaon ug bino gikan kanila, gawas sa 40 ka siklo nga plata. Bisan ang ilang mga alagad nagharihari ibabaw sa katawhan apan ako wala magbuhat sa ingon tungod sa pagkahadlok nako sa Dios.

16Nagpadayon usab ako sa pagbuhat niining paril, ug wala makaangkon ug yuta, ug ang tanan nakong mga alagad nagtigom didto alang sa buluhaton.

17Dugang pa niini, didto sa akong lamisa adunay 150 ka tawo, mga Judio ug mga tinugyanan, gawas niadtong miabot kanamo gikan sa mga nasod nga naglibot kanamo.

18Karon ang naandam alang sa usa ka adlaw usa ka baka nga laki ug unom ka piniling karnero, ang mga manok usab giandam alang kanako, ug matag napulo ka adlaw, daghang nagkalainlaing bino. Bisan pa niining tanan, wala ako mangayo sa pagkaon sa gobernador, tungod kay bug-at ang gipabuhat niining katawhan.

19Hinumdomi alang sa akong kaayohan, O akong Dios, ang tanan nga akong gibuhat alang niining katawhan.

← Chapter 4 Chapter 6 →