Matthew 20

cebuano-2011

1“Kay ang gingharian sa langit sama sa usa ka tawo nga pangulo sa panimalay nga milakaw sayo sa kabuntagon aron sa pagpangita ug mga mamumuo alang sa iyang parasan.

2Sa nagkasabot na siya ug ang mga mamumuo nga tagsa ka denario ang ilang suhol matag adlaw, gipaadto niya sila sa iyang parasan.

3Sa ikasiyam nga takna sa buntag, samtang naglakaw siya, nakita niya sa merkado ang lain pa nga mga walay buhat.

4Ug siya miingon kanila, ‘Pangadto usab kamo sa parasan ug suholan ko kamo ug igo.’ Busa nangadto sila.

5Sa dihang milakaw na usab siya sa udtong tutok ug sa ikatulo nga takna sa hapon, mao gihapon ang iyang gihimo.

6Ug sa hapit na ang ikalima nga takna sa hapon, siya milakaw ug iyang nakita ang uban pa gayod nga nagtindog ug siya miingon kanila, ‘Nganong nagtindog man kamo dinhi nga walay mga buhat sa tibuok adlaw?’

7Miingon sila kaniya, ‘Kay wala may misuhol kanamo.’ Ug siya miingon kanila, ‘Pangadto usab kamo sa parasan.’

8Ug sa pagkakilomkilom na, ang tag-iya sa parasan miingon sa iyang piniyalan, ‘Tawga na ang mga mamumuo ug ihatag kanila ang ilang mga suhol, sugod sa mga naulahi hangtod sa mga nauna.’

9Ug sa pagduol sa mga gisuholan sa mga ikalima nga takna, ang matag usa kanila nakadawat ug usa ka denario.

10Ug sa pagduol sa mga nauna, nagdahom sila nga makadawat ug labaw apan ang matag usa kanila nakadawat ug tagsa ka denario.

11Ug sa ilang pagdawat niini, sila nagbagutbot batok sa pangulo sa panimalay.

12Sila miingon, ‘Kining mga naulahi naghago sulod lamang sa usa ka takna ug sila imong gitupong kanamo nga maoy milahutay sa buluhaton sa tibuok adlaw ug sa hilabihan nga kainit.’

13Apan ngadto sa usa kanila mitubag siya nga nag-ingon, ‘Higala, wala ako manglupig kanimo. Dili ba, nagkasabot man kita sa tagsa ka denario?

14Dawata ang imo ug lakaw. Akong pagbuot nga hatagan kining naulahi sama sa akong paghatag kanimo.

15Wala ba diay akoy katungod sa paggamit sa akong mga kabtangan sumala sa akong kabubut-on? O imo ba diay akong bagutbotan tungod sa akong pagkamahinatagon?’

16Sa ingon niana, ang mga naulahi mauna, ug ang mga nauna maulahi”

17Samtang nagtungas si Jesus paingon sa Jerusalem, iyang gidala sa daplin ang napulo ug duha ka tinun-an ug diha sa dalan siya miingon kanila,

18“Tan-awa, nagtungas kita padulong sa Jerusalem ug ang Anak sa Tawo itugyan ngadto sa mga pangulong pari ug sa mga eskriba, ug hukman nila siya sa kamatayon

19ug itugyan ngadto sa mga Gentil aron bugalbugalan ug bunalan ug ilansang sa krus apan sa ikatulo nga adlaw banhawon siya.”

20Unya ang inahan sa mga lalaking anak ni Zebedeo miduol kang Jesus uban sa iyang mga anak. Miluhod siya sa atubangan ni Jesus ug nangayo ug usa ka butang.

21Ug siya miingon sa babaye, “Unsa may imong gitinguha?” Siya mitubag, “Isulti nga kining akong duha ka anak maglingkod sa imong gingharian, ang usa anha sa imong tuo ug ang usa anha sa imong wala.”

22Apan mitubag si Jesus nga nag-ingon, “Wala kamo mahibalo sa inyong gipangayo. Makahimo ba kamo sa pag-inom sa kupa nga akong imnan?” Ug sila mitubag kaniya, “Makahimo kami.”

23Siya miingon kanila, “Kamo moinom gayod sa akong kupa apan ang pagpalingkod dapit sa akong tuo ug sa akong wala, dili akoa ang pagtugot apan kini alang lamang kanila nga gitagan-an niini sa akong Amahan.”

24Ug sa pagkadungog niini sa napulo, nangasuko sila batok sa duha ka magsoon.

25Apan gipaduol sila ni Jesus ug miingon siya kanila, “Kamo nasayod nga ang mga pangulo sa mga Gentil nagharihari kanila ug ang ilang mga kadagkoan nagpahimulos sa gahom ibabaw kanila.

26Dili kini mao diha kaninyo apan si bisan kinsa kaninyo nga buot mahimong dako kinahanglang mahimo siyang sulugoon ninyo.

27Ug si bisan kinsa kaninyo nga buot mahimong hawod kinahanglang mahimo siyang ulipon ninyo,

28sama nga ang Anak sa Tawo mianhi dili aron alagaran kondili aron sa pag-alagad ug sa paghatag sa iyang kinabuhi ingon nga lukat alang sa daghan.”

29Ug sa ilang pagbiya sa Jerico, usa ka dakong panon sa katawhan misunod kaniya.

30Ug dihay duha ka buta nga naglingkod sa daplin sa dalan, nga sa pagkadungog nila nga si Jesus lumalabay didto, sila misinggit nga nag-ingon, “Ginoo, kaluy-i intawon kami, Anak ni David!”

31Apan ang panon sa katawhan mibadlong kanila sa paghilom, apan misamot hinuon sila sa pagsinggit nga nag-ingon, “Ginoo, kaluy-i intawon kami, Anak ni David!”

32Ug si Jesus mihunong ug miingon kanila, “Unsa may buot ninyong buhaton nako alang kaninyo?”

33Sila miingon kaniya, “Ginoo, mabuka unta ang among mga mata.”

34Ug uban sa kaluoy gihikap ni Jesus ang ilang mga mata ug dihadiha nakakita sila ug misunod kaniya.

← Chapter 19 Chapter 21 →