Matthew 10

cebuano-2011

1Unya gipaduol ni Jesus kaniya ang iyang napulo ug duha ka tinun-an ug gihatagan niya sila ug kagahom sa pagpagula sa mga hugaw nga espiritu ug sa pag-ayo sa tanang sakit ug sa tanang balatian.

2Ang mga ngalan sa napulo ug duha ka apostoles mao kini: una, si Simon nga ginganlan ug Pedro ug si Andres nga iyang igsoon, si Santiago ug ang iyang igsoon nga si Juan nga mga anak ni Zebedeo,

3si Felipe ug si Bartolome, si Tomas ug si Mateo nga tigpaningil ug buhis, si Santiago nga anak ni Alfeo ug si Tadeo,

4si Simon nga Cananeo ug si Judas Iscariote nga nagbudhi kang Jesus.

5Unya kining napulo ug duha gipalakaw ni Jesus human sila matugon niya nga nag-ingon, “Ayaw kamo pag-adto sa dapit sa mga Gentil ug ayaw kamo pagsulod sa mga lungsod sa Samaria

6apan pangadto hinuon kamo sa mga nawala nga karnero sa banay ni Israel.

7Ug samtang manglakaw kamo, pagwali kamo nga mag-ingon, ‘Ang gingharian sa langit nagkaduol na.’

8Ayoha ninyo ang mga masakiton, banhawa ang mga patay, hinloi ang mga sanlahon, pagulaa ang mga demonyo. Nakadawat kamo nga walay bayad, panghatag nga walay bayad.

9Ayaw kamo pagdala ug bulawan o plata o bronsi diha sa inyong mga bakos,

10walay bag alang sa inyong panaw o ilisan nga kamisola o mga sandalyas o sungkod, kay ang mamumuo takos sa iyang pagkaon.

11Sa bisan unsang lungsod o balangay nga inyong adtoan, tan-awa kon kinsa ang takos, ug puyo kamo didto sa iyang balay hangtod sa inyong pagbiya.

12Ug sa dihang mosulod kamo sa balay, pangatahoran kamo.

13Kon ang balay takos niini, ipadangat ang inyong kalinaw niini, ug kon dili kini takos, bakwia ninyo ang maong kalinaw.

14Kon kamo dili dawaton ni bisan kinsa ug dili pamation ang inyong mga pulong, itaktak ang mga abog gikan sa inyong mga tiil sa pagbiya ninyo sa maong balay o lungsod.

15Sa pagkatinuod, sultihan ko kamo nga sa adlaw sa paghukom arang-arang pa unya alang sa yuta sa Sodoma ug sa Gomora kay sa maong lungsod.

16“Tan-awa, ako nagpadala kaninyo ingon nga daw mga karnero taliwala sa mga lobo, busa pagmaalamon kamo sama sa mga bitin ug lumo sama sa mga salampati.

17Pagbantay kamo sa mga tawo kay itugyan kamo nila ngadto sa mga hukmanan, ug bunalan sa sulod sa ilang mga sinagoga,

18ug tungod kanako dad-on kamo ngadto sa atubangan sa mga pangulo ug sa mga hari aron kamo mosaksi ngadto kanila ug sa mga Gentil.

19Ug sa diha nga itugyan na kamo nila, ayaw kamo kabalaka kon unsaon ninyo pagsulti o unsay inyong isulti, kay unsay inyong isulti ihatag kaninyo nianang taknaa,

20kay dili man kamo ang magsulti kondili ang Espiritu sa inyong Amahan mao ang magsulti pinaagi kaninyo.

21Ang igsoon magtugyan sa iyang igsoon ngadto sa kamatayon ug ang amahan sa iyang anak ug ang mga anak mosukol sa ilang mga ginikanan ug ipapatay sila.

22Dumtan kamo sa tanang tawo tungod sa akong ngalan. Apan ang molahutay hangtod sa kataposan maluwas.

23Sa diha nga lutoson kamo nila didto sa usa ka lungsod, pangagiw kamo ngadto sa sunod kay sa pagkatinuod sultihan ko kamo nga sa dili pa gani ninyo mahurot paglibot ang tanang kalungsoran sa Israel, ang Anak sa Tawo moabot na.

24“Ang tinun-an dili labaw sa iyang magtutudlo o ang ulipon labaw sa iyang agalon.

25Igo na alang sa tinun-an nga mahisama sa iyang magtutudlo ug sa ulipon nga mahisama sa iyang agalon. Kon ang pangulo sa panimalay ilang ginganlan ug Beelzebul, unsa pa kaha ka ngil-ad sa ilang ingalan sa mga sakop sa iyang panimalay!

26“Busa ayaw kamo kahadlok kanila kay walay nalilong nga dili mapadayag o tinagoan nga dili mabutyag.

27Ang gisulti nako kaninyo diha sa ngitngit, isulti ninyo kini diha sa hayag ug ang inyong nadungog nga gihunghong kaninyo, isinggit ninyo ibabaw sa mga atop.

28Ayaw ninyo kahadloki kadtong mopatay sa lawas apan dili makahimo pagpatay sa kalag apan kahadloki hinuon ninyo ang makahimo paglaglag sa kalag ug lawas didto sa imperno.

29Dili ba ang duha ka sayaw gibaligya ug duha ka sensilyo. Ug walay bisan usa kanila nga mahulog sa yuta nga dili mahibaloan sa inyong Amahan.

30Bisan gani ang mga buhok sa inyong ulo giihap ang tanan.

31Busa ayaw kamo kahadlok, kamo labaw pa ug bili kay sa daghang mga langgam.

32Busa bisan kinsa kadtong moila kanako sa atubangan sa mga tawo, ilhon usab nako sa atubangan sa akong Amahan nga anaa sa langit,

33apan bisan kinsa kadtong molimod kanako sa atubangan sa mga tawo, ilimod usab nako atubangan sa akong Amahan nga anaa sa langit.

34“Ayaw kamo pagdahom nga mianhi ako aron sa pagdala ug kalinaw dinhi sa kalibotan, wala ako moanhi aron sa pagdala ug kalinaw kondili espada.

35Kay mianhi ako aron ang tawo makigbingkil batok sa iyang amahan ug ang anak nga babaye batok sa iyang inahan ug ang umagad nga babaye batok sa iyang ugangang babaye,

36ug ang mga kaaway sa tawo anaa ra sa sulod sa iyang kaugalingong panimalay.

37Ang nahigugma sa iyang amahan o inahan labaw kanako, dili takos kanako, ug ang nahigugma sa iyang anak nga lalaki o anak nga babaye labaw kanako, dili takos kanako,

38ug ang wala magpas-an sa iyang krus ug wala magsunod kanako, dili takos kanako.

39Ang mangita sa iyang kinabuhi mawad-an niini, apan ang mawad-an sa iyang kinabuhi tungod kanako, makakaplag hinuon niini.

40“Ang nagdawat kaninyo nagdawat kanako ug ang nagdawat kanako nagdawat sa nagpadala kanako.

41Ang nagdawat sa propeta tungod kay siya usa ka propeta, modawat ug ganti nga alang sa usa ka propeta ug ang nagdawat sa tawong matarong tungod kay siya usa ka tawong matarong, modawat ug ganti nga alang sa usa ka tawong matarong.

42Ug si bisan kinsa nga mohatag ug bisan usa na lang ka baso nga bugnawng tubig aron ipainom sa usa niining ubos nakong mga tinun-an tungod kay siya usa ka tinun-an, sa pagkatinuod sultihan ko kamo, dili gayod siya kawad-an sa iyang ganti.”

← Chapter 9 Chapter 11 →