Jeremiah 27

cebuano-2011

1Sa sinugdan sa paghari ni Zedekias nga anak ni Josias, ang hari sa Juda, kining pulonga midangat kang Jeremias gikan sa Ginoo.

2Mao kini ang giingon sa Ginoo kanako: “Paghimo ug mga higot ug mga yugo ug ibutang kini sa imong liog.

3Pagpadala ug mensahe ngadto sa hari sa Edom, sa hari sa Moab, sa hari sa mga kaliwat ni Amon, sa hari sa Tiro ug sa hari sa Sidon, pinaagi sa kamot sa mga sinugo nga moanha sa Jerusalem ngadto kang Zedekias nga hari sa Juda.

4Ihatag kanila kining sugo alang sa ilang mga agalon, ‘Mao kini ang giiingon sa Ginoo sa mga panon, ang Dios sa Israel: Mao kini ang isulti ninyo sa inyong mga agalon:

5“Ako, pinaagi sa akong dakong gahom ug sa akong tinuy-od nga bukton, mao ang nagbuhat sa yuta, lakip ang mga tawo ug ang mga mananap nga anaa sa yuta, ug ihatag nako kini ngadto kang bisan kinsa nga matarong sa akong pagtan-aw.

6Karon gihatag na nako kining tibuok nga yuta ngadto sa kamot ni Nabucodonosor nga hari sa Babilonia, nga akong alagad, ug gihatag usab nako kaniya ang mga mananap sa kapatagan aron sa pag-alagad kaniya.

7Ang tanang mga nasod mag-alagad kaniya ug sa iyang anak, ug sa anak sa iyang anak, hangtod nga moabot ang panahon sa iyang kaugalingong yuta; unya daghang mga nasod ug gamhanang mga hari ang mag-ulipon kaniya.

8“ ‘Apan kon adunay nasod o gingharian nga dili mag-alagad sa maong Nabucodonosor nga hari sa Babilonia, ug dili magpasangon sa ilang liog sa yugo sa hari sa Babilonia, akong silotan ang maong nasod pinaagi sa espada, pinaagi sa gutom ug pinaagi sa kamatay, nag-ingon ang Ginoo, hangtod nga mapuo nako sila pinaagi sa iyang kamot.

9Busa ayaw kamo pamati sa inyong mga propeta, sa inyong mga tigpanagna, sa inyong mga tighubad sa damgo, sa inyong mga tighubad sa mga tilimad-on o sa inyong mga tigsalamangka nga nag-ingon kaninyo, “Dili kamo mag-alagad sa hari sa Babilonia.”

10Kay bakak ang ilang gipropesiya kaninyo nga maoy makaingon nga kamo balhinon ngadto sa layo gikan sa inyong yuta, ug hinginlan ko kamo ug nga kamo mangahanaw.

11Apan ang nasod nga magpasangon sa ilang liog sa yugo sa hari sa Babilonia ug mag-alagad kaniya, akong ibilin sa kaugalingon niini nga yuta, aron mag-uma niini ug magpuyo niini, nag-ingon ang Ginoo. ’ ”

12Ngadto kang Zedekias nga hari sa Juda, ako nagsulti sa samang paagi: “Pasangoni ninyo ang inyong mga liog sa yugo sa hari sa Babilonia ug alagari siya ug ang iyang katawhan, ug mangabuhi kamo.

13Nganong magpakamatay man ikaw ug ang imong katawhan pinaagi sa espada, sa gutom ug sa kamatay, sumala sa gisulti sa Ginoo mahitungod sa nasod nga dili moalagad sa hari sa Babilonia?

14Ayaw kamo pamati sa mga pulong sa mga propeta nga magsulti kaninyo, ‘Dili kamo mag-alagad sa hari sa Babilonia,’ kay bakak ang ilang gipropesiya kaninyo.

15Ako wala magpadala kanila, nag-ingon ang Ginoo, apan nagpropesiya sila ug bakak pinaagi sa akong ngalan, nga tungod niana ako magpapahawa kaninyo, ug kamo mangamatay, kamo ug ang mga propeta nga nagpropesiya kaninyo.”

16Misulti usab ako sa mga pari ug niining tibuok nga katawhan, nga nag-ingon, “Mao kini ang giingon sa Ginoo: Ayaw pamati sa pulong sa inyong mga propeta nga nagpropesiya kaninyo, nga nag-ingon, ‘Ang mga kagamitan sa balay sa Ginoo sa dili madugay dad-on na usab gikan sa Babilonia,’ kay bakak ang ilang gipropesiya kaninyo.

17Ayaw kamo pamati kanila; alagari ang hari sa Babilonia ug mabuhi kamo. Nganong mahimo man gayod nga biniyaan kining siyudara?

18Kon sila mga propeta ug kon ang pulong sa Ginoo anaa kanila, papangamuyoa sila karon sa Ginoo sa mga panon, aron ang mga kagamitan nga nahibilin sa balay sa Ginoo, sa balay sa hari sa Juda ug sa Jerusalem, dili mahiadto sa Babilonia.

19Kay mao kini ang giingon sa Ginoo sa mga panon mahitungod sa mga haligi, sa tangke, sa mga tungtonganan ug sa uban nga mga kagamitan nga nahibilin niining siyudara,

20nga wala kuhaa ni Nabucodonosor nga hari sa Babilonia, sa diha nga iyang gidala nga binihag si Jeconias nga anak ni Jehoiakim, ang hari sa Juda ug ang tanang mga inila sa Juda ug sa Jerusalem, gikan sa Jerusalem ngadto sa Babilonia.

21Mao kini ang giingon sa Ginoo sa mga panon, ang Dios sa Israel, mahitungod sa mga kagamitan nga nahibilin diha sa balay sa Ginoo, sa balay sa hari sa Juda, ug sa Jerusalem:

22Kini dad-on ngadto sa Babilonia, ug kini magpabilin didto, hangtod sa adlaw nga moadto ako niini, nag-ingon ang Ginoo. Unya dad-on nako kini pagbalik ug ibalik kini niining dapita.”

← Chapter 26 Chapter 28 →