Jeremiah 18

cebuano-2011

1Ang pulong nga midangat kang Jeremias gikan sa Ginoo:

2“Tindog ug lakaw ngadto sa balay sa magkukulon, ug didto ipabati nako kanimo ang akong mga pulong.”

3Busa miadto ako sa balay sa magkukulon, ug didto nagbuhat siya diha sa iyang ligid.

4Ug ang sudlanan nga gibuhat niya gikan sa yuta nga kulonon nadaot diha sa kamot sa magkukulon ug gibuhat niya kini pag-usab ngadto sa lain nga sudlanan, ingon nga maayong buhaton sumala sa magkukulon.

5Unya ang pulong sa Ginoo midangat kanako,

6“O balay sa Israel, dili ba nako mahimo kanimo ang gihimo niining magkukulon? nag-ingon ang Ginoo. Sama sa yutang kulonon nga anaa sa kamot sa magkukulon, mao usab ikaw dinhi sa akong kamot, O balay sa Israel.

7Kon sa bisan unsang taknaa nga ako magpahayag mahitungod sa usa ka nasod, sa usa ka gingharian, nga akong ibton ug lampagon ug laglagon kini,

8ug kon kanang nasura nga akong gihisgotan motalikod sa ilang pagkadaotan, maghinulsol ako sa daotan nga akong gihunahuna nga buhaton niini.

9Ug kon sa bisan unsang taknaa ako magpahayag mahitungod sa usa ka nasod, sa usa ka gingharian, nga kini akong tukoron ug itanom,

10ug kon kini magbuhat ug daotan sa akong panan-aw, nga sila dili mamati sa akong tingog, maghinulsol ako sa kaayohan nga akong gihunahuna nga akong buhaton niini.

11Busa karon, isulti sa mga tawo sa Juda, ug sa mga nagpuyo sa Jerusalem: ‘Mao kini ang giingon sa Ginoo: Tan-awa, nag-umol ako ug daotan batok kaninyo, ug naghunahuna ug usa ka laraw batok kaninyo. Pamalik kamo, ang matag usa gikan sa iyang pamaagi nga daotan ug usba ninyo ang inyong mga pamaagi ug ang inyong mga buhat.’

12“Apan sila miingon, ‘Kawang lamang kana! Sundon namo ang among kaugalingong mga plano, ug ang matag usa kanamo magbuhat sumala sa kagahi sa iyang kasingkasing nga daotan.’

13“Busa mao kini ang giingon sa Ginoo: Pangutana kamo karon sa mga nasod, kinsa ang nakadungog sa sama niini? Ang ulay nga Israel nakabuhat ug ngil-ad nga butang.

14Mawala ba ang yelo sa Lebanon nga gikan sa bato sa Sirion? Mohubas ba ang mga tubig sa bukid, ang mga nagbaha nga bugnawng sapa?

15Apan ang akong katawhan nangalimot kanako, sila nagsunog ug insenso ngadto sa mga mini nga dios; sila nangapandol diha sa ilang mga agianan, sa mga karaang dalan, ug nangadto sa gagmayng mga dalan, dili sa dakong dalan,

16naghimo sa ilang yuta nga kalisangan, usa ka butang nga talamayon hangtod sa kahangtoran. Ang matag usa nga moagi niini malisang ug maglingolingo sa iyang ulo.

17Sama sa hangin gikan sa silangan katagon nako sila sa atubangan sa kaaway. Pakitaon nako sila sa akong likod, ug dili sa akong nawong, sa adlaw sa ilang katalagman.”

18Unya sila miingon, “Dali kamo, maglaraw kita batok kang Jeremias kay ang balaod dili mawagtang gikan sa pari, o ang mga tambag gikan sa mga maalamon, o ang pulong gikan sa propeta. Dali kamo, asdangon nato siya pinaagi sa dila, ug dili nato pamation ang bisan unsa sa iyang mga pulong.”

19Pamatia ako, O Ginoo, ug patalinghogi ang akong hangyo.

20Ang daotan balos ba sa maayo? Apan sila nagkalot ug gahong alang sa akong kalag. Hinumdomi nga ako mitindog sa imong atubangan aron sa pagsulti ug maayo alang kanila, aron ipalikay ang imong kaligutgot gikan kanila.

21Busa itugyan ang ilang mga anak ngadto sa gutom; itugyan sila ngadto sa gahom sa espada, himoa nga ang ilang mga asawa mawad-an ug mga anak ug mabiyuda. Mangamatay unta ang ilang kalalakin-an pinaagi sa kamatay, ang ilang batan-on mangamatay pinaagi sa mga espada diha sa gubat.

22Madungog unta ang singgit gikan sa ilang mga balay, sa diha nga sa kalit ikaw magpadala ug mga tawo nga misulong! Kay sila nagkalot ug gahong aron sa pagdakop kanako, ug nagbutang ug mga lit-ag alang sa akong mga tiil.

23Apan ikaw, O Ginoo, nasayod sa tanan nilang mga paglaraw aron sa pagpatay kanako. Ayaw sila pasayloa sa ilang kasal-anan, o papason ang ilang mga sala gikan sa imong panan-aw. Pukana hinuon sila sa imong atubangan, himoa kana kanila sa panahon sa imong kasuko.

← Chapter 17 Chapter 19 →