Isaiah 59

cebuano-2011

1Tan-awa, ang kamot sa Ginoo dili mubo nga kini dili makaluwas, o ang iyang dalunggan bungol, nga kini dili makadungog;

2apan ang inyong mga kasal-anan maoy nakapahimulag kaninyo ug sa inyong Dios, ug ang inyong mga sala nakapatago sa iyang nawong gikan kaninyo, nga tungod niana siya dili makadungog.

3Kay ang inyong mga kamot nahugawan sa dugo, ug ang inyong mga tudlo nahugawan sa kasal-anan; ang inyong mga ngabil nagsulti ug bakak, ang inyong dila naglitok ug mga kangil-aran.

4Walay nangaliyupo nga minatarong, walay naghangyo nga matinud-anon; sila nagsalig sa kakawangan ug nagsulti ug mga bakak, sila nagsamkon ug daotan ug nanganak ug kasal-anan.

5Sila nagpapusa ug mga itlog sa mga lala nga bitin, ug naghimo ug balay sa lawalawa; siya nga mokaon sa ilang mga itlog mamatay, ug niadtong mapusa mogula ang lala nga bitin.

6Ang ilang mga lawa dili mangahimo nga mga bisti; ang mga tawo dili magtabon sa ilang kaugalingon pinaagi sa ilang mga buhat. Ang ilang mga buhat mao ang mga buhat sa kadaotan, ug ang mga buhat sa pagpanglupig anaa sa ilang mga kamot.

7Ang ilang mga tiil managan padulong sa kadaotan, ug sila magdali sa pagpaagas sa dugo sa walay sala; ang ilang mga hunahuna, hunahuna sa kasal-anan, kasub-anan ug kalaglagan anaa sa ilang mga dalan.

8Sila wala mahibalo sa dalan sa pakigdait, ug walay hustisya diha sa ilang mga agaianan; sila naghimo sa ilang mga dalan nga likoliko, walay naglakaw niini nga nakaila ug pakigdait.

9Tungod niini ang hustisya layo kanamo, ug ang pagkamatarong wala makaapas kanamo; kami nangita sa kahayag, apan tan-awa, kangitngit, ug sa kasanag, apan kami naglakaw sa kadulom.

10Kami nagpanghikap sa bungbong sama sa buta, kami nagpanghikap sama niadtong walay mga mata; kami nadagma diha sa kaudtohon ingon sa kilomkilom, taliwala kanila nga himsog, kami sama sa mga tawong patay.

11Kaming tanan nagngulob sama sa mga oso, nag-agulo pag-ayo sama sa mga salampati; kami nangita sa hustisya, apan walay nakaplagan; sa kaluwasan, apan kini layo kanamo.

12Kay ang among mga kalapasan gipadaghan sa imong atubangan, ug ang among mga sala nagpamatuod batok kanamo, kay ang mga kalapasan ania uban kanamo, ug kami nakaila sa among mga kasal-anan:

13naglapas ug naglimod sa Ginoo, ug mibiya gikan sa pagsunod sa among Dios, nagsulti ug pagpanglupig ug pagsupil, naghunahuna ug nagsulti ug mga pulong nga bakak gikan sa kasingkasing.

14Ang hustisya gisalikway, ug ang pagkamatarong nagpaantaw; kay ang kamatuoran napukan sa kadalanan, ug ang katarong dili makasulod.

15Ang kamatuoran kulang, ug kadtong mobiya sa daotan naghimo sa iyang kaugalingon nga usa ka tukbonon. Ang Ginoo nakakita niini, ug kini nakapasubo kaniya nga walay hustisya.

16Siya nakakita nga walay bisan usa, ug nahibulong nga walay nagpataliwala; busa ang iyang kaugalingon nga bukton nagdala ug kaluwasan kaniya, ug ang iyang pagkamatarong mao ang naglig-on kaniya.

17Iyang gisul-ob ang pagkamatarong ingon nga usa taming sa dughan, ug ang helmet sa kaluwasan sa iyang ulo; iyang gisul-ob ang mga bisti sa panimalos ingon nga bisti ug gitabonan ang iyang kaugalingon sa kapungot ingon sa usa ka kupo.

18Sumala sa ilang binuhatan, siya usab magbalos, kaligutgot ngadto sa iyang mga kabatok, panimalos ngadto sa iyang kaaway, sa mga pulo siya magpahamtang sa tumbas.

19Tungod niini sila mahadlok sa ngalan sa Ginoo gikan sa kasadpan, ug sa iyang himaya gikan sa sidlakan; kay siya moanhi sama sa magbaha nga suba, nga gihuyop sa hangin sa Ginoo.

20“Ug siya moabot sa Zion ingon nga Manunubos, ngadto kanila nga anaa kang Jacob, nga naglikay sa kasal-anan, nag-ingon ang Ginoo.

21“Ug alang kanako, kini mao ang akong kasabotan uban kanila, nag-ingon ang Ginoo: ang akong Espiritu nga anaa sa ibabaw nimo, ug ang akong mga pulong nga akong gibutang sa imong baba, dili mobulag gikan sa imong baba, o gikan sa baba sa imong mga anak, o gikan sa baba sa mga anak sa imong mga anak, nag-ingon ang Ginoo, sukad karon ug hangtod sa kahangtoran.”

← Chapter 58 Chapter 60 →