Isaiah 37

cebuano-2011

1Sa pagkadungog niini Hari Hesekias, gigisi niya ang iyang mga bisti, ug nagtabon sa iyang kaugalingon ug sako, ug misulod sa balay sa Ginoo.

2Ug iyang gipaadto si Eliakim nga tinugyanan sa panimalay, ug si Sebna nga sekretaryo, ug ang mga kadagkoan sa mga pari, nga nagsul-ob ug bisti nga sako, ngadto kang Isaias nga propeta, ang anak ni Amos.

3Sila miingon kaniya, “Mao kini ang giingon ni Hesekias, ‘Kining adlawa mao ang adlaw sa kasamok, sa pagbadlong ug sa pagpanamastamas; ang mga bata ipanganak na unta apan wala nay kusog aron sa pagpahimugso kanila.

4Tingali nga ang Ginoo nga imong Dios namati sa mga pulong sa Rabsakes nga gipadala sa hari sa Asiria nga iyang agalon aron sa paghagit sa Dios nga buhi, ug mobadlong sa mga pulong nga nadungog sa Ginoo nga imong Dios. Busa ipatugbaw ang imong pag-ampo alang sa salin nga nahabilin.’ ”

5Sa diha nga ang mga sulugoon ni Hari Hesekias nangadto kang Isaias,

6si Isaias miingon kanila, “Sultihi ang inyong agalon, ‘Mao kini ang giingon sa Ginoo: Ayaw kahadlok tungod sa mga pulong nga imong nadungog nga pinaagi niini ang mga sulugoon sa hari sa Asiria nagpasipala kanako.

7Tan-awa, magbutang ako ug usa ka espiritu diha kaniya, ug siya makadungog ug mga balita, ug mopauli sa iyang kaugalingon nga yuta, ug himoon nako nga sa iyang kaugalingong yuta mapukan siya pinaagi sa espada didto.’ ”

8Ang Rabsakes mipauli, ug nakaplagan niya ang hari sa Asiria nga nakiggubat batok sa Libna, kay siya nakadungog nga ang hari nakagikan na sa Lakis.

9Ang hari nakadungog mahitungod kang Tirhaka nga hari sa Etiopia, “Siya migula aron sa pagpakig-away batok kanimo.” Ug sa diha nga nakadungog siya niini, siya nagpadala ug mga sinugo ngadto kang Hesekias, nga nag-ingon,

10“Mao kini ang isulti ninyo ngadto kang Hari Hesekias sa Juda, ‘Ayaw pagpalimbong sa imong Dios nga imong gisaligan pinaagi sa pagpasalig nga ang Jerusalem dili itugyan ngadto sa kamot sa hari sa Asiria.

11Tan-awa, ikaw nakadungog kon unsa ang nahimo sa mga hari sa Asiria sa tanang kayutaan, gilaglag kini paghurot. Ug maluwas ba ikaw?

12Nakaluwas ba kanila ang mga dios sa mga nasod nga gipanglaglag sa akong katigulangan: ang Gosan, ang Haran, ang Resef, ug ang katawhan sa Eden nga diha sa Telesar?

13Hain man ang hari sa Hamat, ug ang hari sa Arpad, ang hari sa siyudad sa Sefarbaim, ang hari sa Hana o ang hari sa Iva?’ ”

14Nadawat ni Hesekias ang sulat gikan sa kamot sa mga sinugo, ug gibasa kini, ug si Hesekias misaka ngadto sa balay sa Ginoo, ug gibuklad niya kini sa atubangan sa Ginoo.

15Ug si Hesekias nangamuyo sa Ginoo,

16“O Ginoo sa mga panon, ang Dios sa Israel, nga naglingkod ibabaw sa mga kerubin, ikaw mao ang Dios, ikaw lamang, sa tanang mga gingharian sa yuta, ikaw ang nagbuhat sa langit ug sa yuta.

17Ikiling ang imong igdulungog, O Ginoo, ug pamati; bukha ang imong mga mata, O Ginoo, ug tan-awa, ug pamatia ang mga pulong ni Senakerib, nga iyang gipadala aron sa pagbugalbugal sa Dios nga buhi.

18Sa pagkatinuod, O Ginoo, ang mga hari sa Asiria naglaglag sa mga nasod ug sa ilang mga yuta,

19ug nagsalibay sa ilang mga diosdios ngadto sa kalayo, kay sila dili man mga dios, kondili buhat sa mga kamot sa mga tawo, kahoy ug bato; busa gilaglag kini.

20Busa karon, O Ginoo nga among Dios, luwasa kami gikan sa iyang kamot, aron ang tanang mga gingharian sa yuta makaila nga ikaw lamang ang Ginoo. ”

21Unya si Isaias nga anak ni Amos mipaadto kang Hesekias, nga nag-ingon, “Kini mao ang giingon sa Ginoo, ang Dios sa Israel: Tungod kay ikaw nangamuyo mahitungod kang Senakerib nga hari sa Asiria,

22mao kini ang pulong nga gisulti sa Ginoo mahitungod kaniya: ‘Ang anak nga ulay sa Zion nagyubit kanimo ug nagkatawa sa pagtamay kanimo. Ang anak nga babaye sa Jerusalem naglingolingo sa iyang ulo sa luyo nimo.

23‘Kinsa ang imong gihagit ug gipasipalahan? Batok kang kinsa man nimo gipatugbaw ang imong tingog ug gisulinga nimo ang imong mga mata? Batok sa Balaan sa Israel!

24Pinaagi sa imong mga sulugoon gipakaulawan nimo ang Ginoo, ug ikaw nag-ingon, “Sa panon sa akong mga karwahi ako nakadangat sa kinahabogan sa kabukiran, ngadto sa kinahiladman nga mga bahin sa Lebanon, giputol nako ang mga tag-as nga mga cedro niini, ang pinili nga mga kahoyng sipre; ug akong naabot ang labing layo nga kahitas-an, ang kinabag-an sa mga lasang niini.

25Ako nagkalot ug mga atabay ug nakainom ug tubig, ug pinaagi sa lapalapa sa akong mga tiil nauga ang tanang mga suba sa Ehipto.”

26‘Wala ba ikaw makadungog nga gitakda na nako kini sa dugay nang panahon? Gilaraw nako sa dugay nang panahon ang akong gituman karon, nga kamo maghimo sa mga kinutaan nga siyudad ngadto sa mga pinundok nga mga bato,

27samtang ang mga nagpuyo niini nakabsan ug kusog, nangalisang ug nangalibog, ug nangagubot, ug nahimong sama sa mga tanom sa kapatagan ug sama sa humok nga balili, sama sa balili sa mga atop sa balay, nalaya sa wala pa makatubo.

28‘Ako nahibalo sa imong paglingkod, ug sa imong paggula, ug sa imong pagsulod ug sa imong pagkasuko batok kanako.

29Tungod kay ikaw nasuko kanako ug ang imong pagkamapahitas-on miabot sa akong dalunggan, ibutang nako ang akong kaw-it diha sa imong ilong, ug ang akong bokado diha sa imong baba; ug pabalikon ko ikaw sa dalan nga imong giagian.’

30“Ug kini mao ang ilhanan alang kanimo: niining tuiga kamo magkaon sa moturok sa iyang kaugalingon lamang ug sa ikaduha nga tuig niadtong motubo sa mao gihapon, ug sa ikatulo nga tuig magpugas kamo ug mag-ani, ug magtanom ug mga parasan, ug magkaon sa bunga niini.

31Ang salin nga mahabilin sa balay ni Juda manggamot paingon sa ubos ug mamunga paingon sa ibabaw;

32kay gikan sa Jerusalem mogula ang usa ka salin, ug gikan sa Bukid sa Zion mogawas ang usa ka pundok sa mga nahibilin. Ang mainitong tinguha sa Ginoo sa mga panon maghimo niini.

33“Busa mao kini ang giingon sa Ginoo mahitungod sa hari sa Asiria: Siya dili moanhi dinhi niining siyudara o mopana ug usa ka udyong didto, o moanhi sa atubangan niini nga may taming o maghimo ug usa ka bundo batok niini.

34Sa dalan nga iyang giagian, sa mao gihapon nga dalan siya mobalik, ug siya dili moanhi niining siyudara, nag-ingon ang Ginoo.

35Kay ako manalipod niining siyudara aron sa pagluwas niini, tungod sa akong kaugalingon ug tungod sa akong alagad nga si David.”

36Unya ang anghel sa Ginoo migula ug mipatay sa 185,000 diha sa kampo sa mga Asirianhon, ug sa pagbangon sa mga tawo sayo sa pagkabuntag, nakita nila nga kining tanan mga patayng lawas.

37Busa si Senakerib nga hari sa Asiria mibiya, ug mipauli ug mipuyo didto sa Ninibe.

38Ug sa diha nga nagsimba siya didto sa balay ni Nisroc nga iyang dios, si Adramelek ug si Sareser nga iyang mga anak mipatay kaniya pinaagi sa espada ug mikagiw ngadto sa yuta sa Ararat. Ug si Esarhadon nga iyang anak maoy naghari puli kaniya.

← Chapter 36 Chapter 38 →