Isaiah 30

cebuano-2011

1“Alaot ang masukihon nga mga anak,” nag-ingon ang Ginoo, “nga nagbuhat sa ilang gilaraw, apan dili akoa; ug nga nakig-abin sa uban, apan dili sa akong espiritu, aron ang sala ilang madugangan ug laing sala;

2nga nanggula aron sa paglugsong ngadto sa Ehipto, nga wala magpakitambag kanako, aron sa pagdangop diha sa panalipod sa Paraon, ug sa pagpangita ug kapuy-an diha sa landong sa Ehipto!

3Tungod niini ang pagpanalipod sa Paraon kaninyo mahimo nga inyong kaulaw, ug ang salipod diha sa landong sa Ehipto mahimo nga inyong kaulawan.

4Kay bisan ug ang iyang mga tinugyanan anaa sa Zoan, ug ang iyang mga sinugo miabot sa Hanes,

5silang tanan maulawan tungod sa usa ka katawhan nga dili magpulos kanila, nga dili magdala ug tabang o kaayohan, kondili kaulaw ug pagtamay.”

6Ang mensahe mahitungod sa mga mananap sa Negeb. Latas sa yuta sa kaguol ug kasakit, diin maggikan ang bayeng liyon ug ang laking liyon, ang malala nga bitin ug ang molupad nga bitin, gidala nila ang ilang mga katigayonan diha sa ibabaw sa abaga sa mga asno, ug ang ilang mga bahandi sa bukobuko sa mga kamilyo, ngadto sa usa ka katawhan nga dili magpulos kanila.

7Kay ang tabang sa Ehipto walay kapuslanan ug kawang, busa gitawag nako siya ug “Rahab nga naglingkod nga wala maglihok.”

8Ug karon, lakaw isulat kini sa atubangan nila diha sa usa ka papan, ug isulat kini sa usa ka basahon aron sa panahon nga umaabot mahimo kini nga saksi hangtod sa kahangtoran.

9Kay sila usa ka masupilon nga katawhan, bakakon nga mga anak, mga anak nga dili mamati sa pahimangno sa Ginoo,

10nga nag-ingon sa mga tigpanagna, “Ayaw pagtan-aw”; ug ngadto sa mga propeta, “Ayaw pagpropesiya kanamo sa mga butang nga matarong, pagsulti kanamo ug malumo nga mga butang, pagpropesiya ug mga lamat,

11pahawa kamo sa agianan, tipas kamo gikan sa dalan, ayaw na kami papamatia sa Balaan sa Israel.”

12Busa mao kini ang giingon sa Balaan sa Israel, “Tungod kay inyong gitamay kining pulonga, ug nagsalig sa pagpanglupig ug pagpanglimbong, ug naglaom niini;

13tungod niini kining kasal-anan mahimo alang kaninyo nga sama sa usa ka guba sa habog nga paril, mibugdo na ug hapit na malumpag, nga ang pagkaguba modangat dayon sa kalit;

14Ug ang pagkabuak niini sama sa pagkabuak sa kulon sa magkukulon, nga gibuak sa walay kukaluoy, nga sa mga tipak niini walay makaplagan bisan usa ka tipak nga kasudlan ug kalayo gikan sa abohan o ikakuha ug tubig gikan sa atabay.”

15Kay mao kini ang giingon sa Ginoong Dios, ang Balaan sa Israel, “Sa pagpauli ug sa pagpahulay luwason kamo; sa kalinaw ug sa pagsalig anaa ang inyong kusog.” Apan kamo dili buot,

16ug kamo miingon, “Dili, kay kami motulin pagpangabayo,” tungod niini kamo tulin nga mopalayo; ug “Kami mangabayo sa tulin nga mga kabayo,” busa ang maggukod kaninyo tulin usab.

17Usa ka libo mangagiw tungod sa paghulga sa usa ka tawo; sa paghulga sa lima kamo mamiya, hangtod nga kamo mahibilin sama sa usa ka suga sa tumoy sa usa ka bukid, sama sa usa ka ilhanan ibabaw sa usa ka bungtod.

18Tungod niini ang Ginoo maghulat aron siya magmaluluy-on kaninyo; busa bayawon niya ang iyang kaugalingon aron siya adunay kaluoy kaninyo. Kay ang Ginoong Dios sa hustisya; bulahan ang tanan nga nagpaabot kaniya.

19O katawhan diha sa Zion nga nagpuyo sa Jerusalem, ikaw dili na mohilak. Siya magmaluluy-on gayod kanimo sa tingog sa imong pagtuaw; sa diha nga siya makadungog niini, siya motubag kanimo.

20Bisan ug ang Ginoo maghatag kanimo sa pan sa kagul-anan ug sa tubig sa kasakit, ang imong Magtutudlo dili na magtago sa iyang kaugalingon, kondili ang imong mga mata makakita sa imong Magtutudlo.

21Ug ang imong dalunggan makadungog sa usa ka pulong sa luyo nimo, nga nag-ingon, “Kini mao ang dalan, lakaw diha niini,” sa diha nga molingi ikaw sa tuo o sa diha nga molingi ikaw sa wala.

22Unya imong bulingan ang imong kinulit nga mga larawan nga sinapawan ug plata, ug ang imong mga larawan nga tinunaw nga gisapawan ug bulawan. Isalibay nimo kini ingon nga hugaw nga mga butang; ikaw moingon niini, “Pahawa kamo!”

23Ug siya maghatag ug ulan alang sa binhi nga ipugas nimo sa yuta, ug sa trigo, ang abot sa yuta, nga mahimong tambok ug daghan kaayo. Nianang adlawa ang imong kahayopan manibsib sa dagkong mga sibsibanan.

24Ang mga baka usab ug ang mga asno nga nag-ugmad sa yuta makakaon sa inasinan nga kompay nga pinadparan sa pala ug sa kakha.

25Ug diha sa tanang habog nga bukid ug diha sa tanang habog nga bungtod modangat ang mga sapa ug mga suba sa mga tubig, sa adlaw sa dakong pagpamatay, sa diha nga mangapukan ang mga tore.

26Dugang pa, ang kahayag sa bulan mahisama sa kahayag sa adlaw, ug ang kahayag sa adlaw mahimong pito ka pilo, ingon sa kahayag sa pito ka adlaw, sa adlaw nga ang Ginoo magbaat sa samad sa iyang katawhan ug mag-ayo sa ilang samad tungod sa iyang hampak.

27Tan-awa, ang ngalan sa Ginoo maggikan sa layo, magdilaab uban ang iyang kasuko, ug diha sa baga nga aso nga mag-utbo; ang iyang mga ngabil puno sa kasilag, ug ang iyang dila sama sa kalayo nga maglamoy;

28ang iyang gininhawa sama sa usa ka suba nga nag-awas nga makaabot bisan hangtod sa liog; aron sa pag-alig-ig sa mga nasod diha sa ayagan sa kalaglagan, ug aron sa pagtaod diha sa apapangig sa katawhan sa usa ka bukado nga magpahisalaag.

29Makabaton kamo ug usa ka alawiton ingon sa gabii sa dihang saulogon ang usa ka balaan nga kasaulogan, ug kalipay sa kasingkasing sa diha nga ang usa ka tawo magpatingog uban ang usa ka plawta aron sa pag-adto sa bukid sa Ginoo, ngadto sa Bato sa Israel.

30Ug ang Ginoo maghimo nga ang iyang halangdong tingog madungog, ug magpakita sa pagpaubos sa iyang bukton, diha sa pintas nga kasuko ug sa siga sa kalayo nga maglamoy, uban ang unos ug bagyo ug ulan nga yelo.

31Tungod sa tingog sa Ginoo ang mga Asirianhon mangalisang sa diha nga maghampak siya uban sa iyang bunal.

32Ug matag hampak sa sungkod nga igsisilot nga ipahamtang sa Ginoo kanila, duyogan sa tingog sa mga tambor ug sa mga lira, ug diha sa mga gubat uban sa pagwarawara sa iyang bukton, makig-away siya kanila.

33Kay dugay na nga giandam ang usa ka dapit nga nagdilaab, alang sa hari kini giandam. Kini gihimo niya nga lalom ug dako, pinaagi sa kalayo ug daghang kahoy. Ang gininhawa sa Ginoo, sama sa usa ka sapa nga asupre, naghaling niini.

← Chapter 29 Chapter 31 →