Isaiah 19

cebuano-2011

1Ang mensahe mahitungod sa Ehipto. Tan-awa, ang Ginoo nagsakay sa usa ka tulin nga panganod ug moadto sa Ehipto; ug ang mga diosdios sa Ehipto mangurog sa iyang atubangan, ug ang kasingkasing sa mga Ehiptohanon matunaw sa sulod nila.

2Hagiton nako ang mga Ehiptohanon batok sa mga Ehiptohanon, ug sila mag-away, ang matag tawo batok sa iyang igsoon, ug ang matag tawo batok sa iyang silingan, siyudad batok sa siyudad, gingharian batok sa gingharian;

3ug ang espiritu sa mga Ehiptohanon sa sulod nila mawala, ug akong libogon ang ilang mga laraw; ug sila magpakisayod sa mga diosdios ug sa mga tigsalamangka, ug sa mga tigpakisayod ug mga espiritu, ug sa mga tigpanglamat;

4itugyan nako ang mga Ehiptohanon ngadto sa kamot sa usa ka bangis nga agalon; ug ang usa ka hari nga bangis maoy mohari kanila, nag-ingon ang Ginoo, ang Ginoo sa mga panon.

5Ug ang katubigan sa Nilo mohubas, ug ang suba mauga ug magmala;

6ug ang mga agianan sa tubig mangabaho ug ang mga sapa sa Ehipto mohubas ug mauga, ang mga bugang ug mga kupongkupong mangalaya.

7Mahawan unya ang daplin sa Nilo, ang mga tampi sa Nilo; ug ang tanan nga gipugas daplin sa Nilo mangauga, mapadpad ug mawala.

8Ang mga mangingisda magsubo ug magbangutan, ang tanan nga namasol sa Nilo; ug magsubo sila nga nagbukhad ug pukot diha sa katubigan.

9Ang mga tigbuhat ug lino mawad-an ug paglaom, ingon man ang mga tighabol ug puti nga panapton.

10Kadtong mga haligi sa yuta dugmokon, ug sila nga naghago tungod sa suhol masubo.

11Ang mga pangulo sa Zoan mga buangbuang gayod; ang mga maalamon nga magtatambag sa Paraon naghatag ug binuang nga tambag. Unsaon man ninyo pag-ingon sa Paraon, “Ako anak sa maalamon, anak sa mga karaang hari”?

12Hain na man ang inyong maalamon nga mga tawo? Pasultiha sila kanimo ug magpahibalo kon unsa ang gitinguha sa Ginoo sa mga panon mahitungod sa Ehipto.

13Ang mga pangulo sa Zoan nahimong mga buangbuang, ang mga pangulo sa Memfis nalimbongan; kadtong mga bato nga sukaranan sa iyang mga banay nagpahisalaag sa Ehipto.

14Ang Ginoo nagbubo sa sulod niya ug usa ka espiritu sa kalibog; ug gipasamparay niya ang Ehipto diha sa tanan niyang buluhaton, sama sa usa ka tawong hubog nga natumba diha sa iyang sinuka.

15Wala nay bisan unsa alang sa Ehipto, nga mahimo sa ulo o sa ikog, sa sanga o sa bugang.

16Nianang adlawa ang mga Ehiptohanon mahimong sama sa mga babaye, ug sila mangurog uban ang kahadlok tungod sa kamot nga gibakyaw ibabaw kanila sa Ginoo sa mga panon nga iyang gibakyaw ibabaw kanila.

17Ug ang yuta sa Juda mahimong usa ka kalisangan alang sa mga Ehiptohanon, ang matag usa nga makabati sa paghisgot niini mahadlok tungod sa tuyo sa Ginoo sa mga panon nga iyang gitinguha batok kanila.

18Nianang adlawa may lima ka siyudad sa yuta sa Ehipto nga mosulti sa pinulongan sa Canaan, ug manumpa ngadto sa Ginoo sa mga panon, ang usa niini tawgon ug Siyudad sa Adlaw.

19Nianang adlawa may halaran alang sa Ginoo sa taliwala sa yuta sa Ehipto ug usa ka haligi sa Ginoo didto sa utlanan niini.

20Kini mahimong usa ka timaan ug usa ka saksi sa Ginoo sa mga panon didto sa yuta sa Ehipto. Sa dihang sila magtuaw ngadto sa Ginoo tungod sa mga madaogdaogon, siya magpadala kanila ug usa ka manluluwas, ug labanan ug luwason sila.

21Ang Ginoo magpaila sa iyang kaugalingon ngadto sa mga Ehiptohanon, ug ang mga Ehiptohanon makaila sa Ginoo nianang adlawa ug sila magsimba uban ang halad nga inihaw ug ang halad nga sunogon ug sila maghimo ug panaad ngadto sa Ginoo ug buhaton kini.

22Ug kastigohon sa Ginoo ang Ehipto, samaran ug ayohon, ug sila mamalik ngadto sa Ginoo, ug siya mamati sa ilang hangyo ug ayohon sila.

23Nianang adlawa adunay usa ka dalan nga lapad gikan sa Ehipto ngadto sa Asiria, ug ang Asirianhon mangadto sa Ehipto ug ang Ehiptohanon ngadto sa Asiria, ug ang mga Ehiptohanon magsimba uban sa mga Asirianhon.

24Nianang adlawa ang Israel mahimo nga ikatulo uban sa Ehipto ug uban sa Asiria, usa ka panalangin diha sa taliwala sa yuta,

25nga gipanalanginan sa Ginoo sa mga panon, nga nag-ingon, “Bulahan ang Ehipto nga akong katawhan, ug ang Asiria nga buhat sa akong mga kamot, ug ang Israel nga akong panulundon.”

← Chapter 18 Chapter 20 →