Isaiah 16

cebuano-2011

1Nagpadala sila ug mga nating karnero ngadto sa pangulo sa yuta, gikan sa Sela, agi sa kamingawan, ngadto sa bukid sa anak nga babaye sa Zion.

2Sama sa mga naglupadlupad nga langgam, sama sa nagkatibulaag nga mga kuyabog, mao usab ang mga anak nga babaye sa Moab diha sa mga tabokanan sa Arnon.

3“Paghatag ug tambag, ipakita ang hustisya, ang imong landong himoa nga sama sa gabii taliwala sa kaudtohon; tagoi ang mga hininginlan, ayaw luibi ang kagiw;

4papuy-a uban kaninyo ang mga hininginlan gikan sa Moab, panalipdi sila gikan sa tiglaglag. Sa diha nga ang tigdaodaog mawala, ug ang paglaglag mohunong, ug siya nga nagyatak mahanaw gikan sa yuta,

5usa ka trono ang tukoron diha sa gugmang walay paglubad diha sa tolda ni David, ug diha niini molingkod sa pagkamatinumanon ang maghukom ug ang mangita sa hustisya ug ang abtik nga mobuhat sa pagkamatarong.”

6Kami nakabati sa pagpagarbo sa Moab, unsa siya ka mapagarbohon; sa iyang pagkamapahitas-on ug sa iyang pagpagarbo ug sa iyang pagkamayubiton; ang iyang mga pagpangandak kawang lamang.

7Busa paminataya ang Moab, ang matag usa paminataya alang sa Moab. Magbangutan sila, mag-antos sa hilabihan, alang sa mga torta nga pasas sa Kir-hareset.

8Kay ang kaumahan sa Hesbon nangalaya, ug ang parasan sa Sibma; gipamutol sa mga agalon sa kanasoran ang mga sanga niini, nga miabot hangtod sa Jazer ug mikaylap ngadto sa kamingawan; ang iyang mga saha mikuyanap ug mitabok sa dagat.

9Tungod niini ako mihilak uban sa paghilak sa Jazer tungod sa parasan sa Sibma; humdon ko ikaw sa akong mga luha, O Hesbon ug Eleale; kay diha sa imong mga bunga ug sa imong ani miabot ang singgit sa gubat.

10Ug gikuha ang kasadya ug ang kalipay gikan sa mabungahon nga uma; ug didto sa parasan walay alawiton nga giawit, walay singgit nga gipatugbaw; wala nay tigpuga nga nagpuga sa bino diha sa pug-anan; ang singgit gipahunong.

11Busa ang akong kasingkasing miagulo sama sa usa ka lira alang sa Moab, ug ang akong kasingkasing alang sa Kirheres.

12Sa diha nga ang Moab magpakita sa iyang kaugalingon, sa diha nga kapoyan na siya sa iyang kaugalingon ibabaw sa habog nga dapit sa dihang moadto siya sa iyang balaang dapit aron mag-ampo, siya dili molampos.

13Mao kini ang pulong nga gisulti sa Ginoo mahitungod sa Moab sa miaging panahon.

14Apan karon ang Ginoo miingon, “Sulod sa tulo ka tuig, sama sa mga tuig sa usa ka sinuholan, ang himaya sa Moab tamayon, uban sa dakong panon sa katawhan, ug kadtong mahibilin diyotay ug huyang kaayo.”

← Chapter 15 Chapter 17 →