Genesis 35

cebuano-2011

1Unya ang Dios miingon kang Jacob, “Tindog, tungas ngadto sa Betel ug puyo didto, ug pagbuhat ug usa ka halaran alang sa Dios nga nagpakita kanimo sa dihang mikagiw ikaw gikan sa imong igsoon nga si Esau.”

2Busa si Jacob miingon sa iyang panimalay ug sa tanan nga uban kaniya, “Isalikway ninyo ang laing mga dios nga anaa kaninyo, ug panghinlo kamo sa inyong kaugalingon ug pag-ilis kamo sa inyong mga bisti.

3Ug manindog kita ug manungas ngadto sa Betel aron magbuhat ako didto ug usa ka halaran alang sa Dios nga nagtubag kanako sa adlaw sa akong kagul-anan ug nag-uban kanako bisan diin ako miadto.”

4Busa gihatag nila kang Jacob ang tanan nga mga laing dios nga diha kanila ug ang mga ariyos nga diha sa ilang dalunggan ug gitagoan kini ni Jacob sa ilalom sa usa ka dakong kahoy nga didto duol sa Sekem.

5Ug samtang sila nagpanaw, ang kahadlok gikan sa Dios miabot ngadto sa mga kalungsoran nga naglibot kanila mao nga sila wala mogukod sa mga anak ni Jacob.

6Unya si Jacob miabot sa Luz nga mao ang Betel nga anaa sa yuta sa Canaan, siya ug ang tibuok nga katawhan nga uban kaniya.

7Ug nagtukod siya didto ug usa ka halaran, ug gitawag ang maong dapit ug El-Betel kay didto nagpakita kaniya ang Dios, sa pagkagiw niya gikan sa iyang igsoon.

8Unya si Debora, ang tig-atiman ni Rebecca, namatay ug gilubong siya sa ubos sa Betel sa ilalom sa usa ka dakong kahoy ug ang ngalan niini gitawag ug Alon-bacut.

9Unya ang Dios mipakita pag-usab kang Jacob sa pagbalik niya gikan sa Padan-aram ug gipanalanginan siya.

10Ang Dios miingon kaniya, “Ang imong ngalan si Jacob, ang imong ngalan dili na tawgon ug Jacob, kondili Israel na ang imong ngalan.” Busa ang iyang ngalan gitawag ug Israel.

11Ug ang Dios miingon kaniya, “Ako mao ang Dios nga Labing Gamhanan, pagmabungahon ka ug sanay, usa ka nasod ug pundok sa mga nasod maggikan kanimo ug ang mga hari maggikan kanimo.

12Ug ang yuta nga gihatag nako kang Abraham ug kang Isaac, ihatag nako kanimo ug sa imong mga kaliwat sunod kanimo.”

13Ug ang Dios mikayab gikan kaniya sa dapit diin siya nakigsulti kaniya.

14Ug si Jacob nagpatindog ug usa ka haligi didto sa dapit diin ang Dios nakigsulti kaniya, usa ka haligi nga bato, ug iya kining gibuboan ug halad nga ilimnon ug lana sa ibabaw niini.

15Busa kadtong dapita ginganlan ni Jacob ug Betel, diin nakigsulti ang Dios kaniya.

16Unya mipanaw sila gikan sa Betel, ug sa dihang may igo pang gilay-on gikan sa Efrata, si Raquel nagbati ug naglisod sa iyang pagpanganak.

17Ug samtang naglisod siya sa iyang pagpanganak, miingon kaniya ang mananabang, “Ayaw kahadlok, kay karon makabaton ikaw ug laing anak nga lalaki.”

18Ug sa dihang himatyon siya, kay namatay man siya, gitawag niya ang iyang ngalan ug Ben-oni, apan ang iyang amahan nagngalan kaniya ug Benjamin.

19Ug namatay si Raquel ug gilubong siya sa dalan sa Efrata nga mao ang Betlehem.

20Ug gibutangan ni Jacob ug usa ka haligi ang ibabaw sa iyang lubnganan. Kini mao ang haligi sa lubnganan ni Raquel nga anaa gihapon hangtod karon.

21Ug mipadayon pagpanaw si Israel ug gipabarog niya ang iyang tolda didto sa unahan sa tore sa Eder.

22Samtang nagpuyo si Israel niadtong yutaa, si Ruben misulod ug mihigda uban kang Bilha nga puyopuyo sa iyang amahan ug nadunggan kini ni Israel. Ang mga anak nga lalaki ni Israel napulo ug duha.

23Ang mga anak ni Lea: si Ruben nga kamagulangan ni Jacob, si Simeon, si Levi, si Juda, si Isacar ug si Zabulon.

24Ang mga anak ni Raquel: si Jose ug si Benjamin.

25Ug ang mga anak ni Bilha, ang katabang ni Raquel: si Dan ug si Neftali.

26Ang mga anak ni Zilfa, ang katabang ni Lea: si Gad ug si Aser. Kini sila mao ang mga anak nga lalaki ni Jacob nga nangatawo kaniya sa Padan-aram.

27Ug miadto si Jacob kang Isaac nga iyang amahan didto sa Mamre, sa lungsod sa Kiriat-arba nga mao ang Hebron, diin mipuyo si Abraham ug si Issac.

28Ug ang mga adlaw ni Isaac 180 ka tuig.

29Ug si Isaac miginhawa sa iyang kataposan ug namatay siya ug gitipon siya didto sa iyang katawhan, tigulang ug hupong sa mga adlaw. Ug siya gilubong nila ni Esau ug ni Jacob.

← Chapter 34 Chapter 36 →