Genesis 3

cebuano-2011

1Karon, ang bitin labawng malinglahon kay sa tanang ihalas nga mananap nga gibuhat sa Ginoong Dios. Ug miingon siya sa babaye, “Nag-ingon ba ang Dios, ‘Dili kamo makakaon gikan sa bisan unsa nga kahoy sa tanaman’?”

2Ug ang babaye mitubag sa bitin, “Makakaon kami sa bunga sa mga kahoy sa tanaman,

3apan miingon ang Dios, ‘Ayaw kamo pagkaon sa bunga sa kahoy nga anaa sa taliwala sa tanaman o bisan sa paghikap niana, aron dili kamo mamatay.’ ”

4Ug ang bitin miingon sa babaye, “Dili kamo mamatay.

5Kay nasayod ang Dios nga sa dihang kamo mokaon niini mabuka ang inyong mga mata ug mahimo kamo nga sama sa Dios, mahibalo sa maayo ug sa daotan.”

6Ug sa dihang nakita sa babaye nga ang kahoy maayong kaonon ug nga kini makalipay sa mga mata ug nga ang kahoy angay nga tinguhaon aron mahimong maalamon, mikuha siya sa bunga niini ug mikaon. Ug gihatagan niya ang iyang bana nga uban kaniya ug mikaon siya.

7Unya nabuka ang mga mata nilang duha, ug sila nakaamgo nga sila hubo, busa nagtahi sila ug mga dahon sa igera ug gihimo nilang mga tapis alang sa ilang kaugalingon.

8Ug nadungog nila ang kasikas sa Ginoong Dios nga naglakaw didto sa tanaman sa pagkakilomkilom. Ug mitago ang tawo ug ang iyang asawa didto sa taliwala sa mga kakahoyan sa tanaman.

9Apan ang Ginoong Dios mitawag sa tawo ug miingon kaniya, “Hain ka?”

10Ug mitubag siya, “Nadungog nako ang imong kasikas diha sa tanaman, ug nahadlok ako kay hubo man ako, busa mitago ako.”

11Ug miingon siya, “Kinsa ba ang nag-ingon kanimo nga hubo ikaw? Mikaon ba ikaw gikan sa kahoy nga gidili nako kanimo sa pagkaon?”

12Ug ang tawo miingon, “Ang babaye nga gihatag nimo kanako aron akong ikauban, siya ang naghatag kanako sa bunga sa kahoy, ug mikaon ako.”

13Ug ang Ginoong Dios miingon sa babaye, “Unsa man kining imong gibuhat?” Ug ang babaye miingon, “Ang bitin milingla kanako, ug mikaon ako.”

14Ug ang Ginoong Dios miingon sa bitin, “Tungod kay ikaw nagbuhat niini, tinunglo ikaw labaw sa tanan nga mga kahayopan ug labaw sa tanan nga ihalas nga mga mananap; pinaagi sa imong tiyan magkamang ikaw, ug magkaon ikaw ug abog sa tanan nga mga adlaw sa imong kinabuhi.

15Ug ibutang nako ang panag-away tali kanimo ug sa babaye ug tali sa imong kaliwat ug sa iyang kaliwat; siya magsamad sa imong ulo, ug ikaw magsamad sa iyang tikod.”

16Ngadto sa babaye miingon siya, “Padaghanon nako pag-ayo ang kasakit sa imong pagpanamkon ug sa kasakit ikaw magpahimugso ug mga anak, apan mangandoy gihapon ikaw sa imong bana ug siya magbuot kanimo.”

17Ug miingon siya kang Adan, “Tungod kay namati man ikaw sa tingog sa imong asawa ug mikaon sa bunga sa kahoy nga niini ako nagsugo kanimo, ‘Ayaw pagkaon niini,’ tinunglo ang yuta tungod kanimo. Pinaagi sa pagbudlay makakaon ikaw gikan niini sa tanang mga adlaw sa imong kinabuhi.

18Kini magpaturok usab kanimo ug mga tunokong sampinit ug mga sagbot ug magkaon ikaw sa mga tanom sa kapatagan.

19Pinaagi sa singot sa imong nawong makakaon ikaw sa pan hangtod nga mobalik ikaw sa yuta tungod kay ikaw gikuha gikan niini; ikaw abog ug sa abog ikaw mobalik.”

20Ug ginganlan sa tawo ug Eva ang iyang asawa tungod kay siya mao ang inahan sa tanan nga buhi.

21Ug ang Ginoong Dios nagbuhat ug mga bisti nga panit alang kang Adan ug sa iyang asawa ug iyang gibistihan sila.

22Ug ang Ginoong Dios miingon, “Tan-awa, ang tawo nahimo nga sama sa usa kanato, nahibalo sa maayo ug sa daotan. Ug karon tingali unya ug mokab-ot siya ug mokuha usab gikan sa kahoy sa kinabuhi ug mokaon, ug mabuhi hangtod sa kahangtoran.”

23Tungod niini ang Ginoong Dios mihingilin kaniya gikan sa tanaman sa Eden aron sa pag-uma sa yuta diin siya gikuha.

24Busa gipapahawa niya ang tawo, ug didto sa silangang dapit sa tanaman sa Eden gibutang niya ang mga kerubin ug ang nagsiga nga espada nga nagtuyok aron pagbantay sa dalan ngadto sa kahoy sa kinabuhi.

← Chapter 2 Chapter 4 →