Ezra 4

cebuano-2011

1Karon sa pagkadungog sa mga kabatok sa Juda ug sa Benjamin nga ang mga nahiuli nga binihag nagtukod ug usa ka templo sa Ginoo, ang Dios sa Israel,

2sila miduol kang Zerubabel ug sa mga pangulo sa mga panimalay sa mga katigulangan ug miingon kanila, “Patabanga kami sa pagtukod uban kaninyo, kay kami nagsimba sa inyong Dios, sama sa inyong gibuhat ug kami naghalad kaniya sukad pa sa mga adlaw ni Esar-hadon nga hari sa Asiria nga maoy nagdala kanamo dinhi.”

3Apan si Zerubabel, si Jesua ug ang uban nga mga pangulo sa mga panimalay sa mga katigulangan sa Israel miingon kanila, “Kamo walay labot kanamo sa pagtukod ug balay sa among Dios, apan kami lamang ang magtukod alang sa Ginoo, ang Dios sa Israel, sumala sa gisugo kanamo ni Hari Ciro nga hari sa Persia.”

4Unya gibugnaw sa katawhan sa maong yuta ang katawhan sa Juda ug gihadlok sila sa pagtukod,

5ug nanuhol ug mga magtatambag batok kanila, aron sa pagpakyas sa ilang katuyoan, sa tanang mga adlaw ni Ciro nga hari sa Persia, bisan hangtod sa paghari ni Dario nga hari sa Persia.

6Ug sa paghari ni Ahasuero, sa pagsugod sa iyang paghari, nagsulat sila ug usa ka sumbong batok sa mga nagpuyo sa Juda ug sa Jerusalem.

7Ug sa mga adlaw ni Artaxerxes, si Bislam, si Mitredat, si Tabeel ug ang uban sa iyang mga kaubanan misulat ngadto kang Artaxerxes nga hari sa Persia. Ang sulat gihimo sa Aramaico ug gihubad.

8Si Rehum nga tigmando ug si Simsai nga eskriba nagsulat ug usa ka sulat batok sa Jerusalem ngadto kang Artaxerxes nga hari ingon niining mosunod—

9unya misulat si Rehum nga tigmando, si Simsai nga eskriba ug uban pa niyang kaubanan, ang mga maghuhukom, ang mga gobernador, ang mga tinugyanan, ang mga Persianhon, ang katawhan sa Erec, ang mga taga-Babilonia, ang katawhan sa Susa nga mao ang mga Elamhanon,

10ug ang uban sa mga nasod nga gihinginlan sa gamhanan ug halangdon nga Asurbanipal ug mipahimutang didto sa mga siyudad sa Samaria, ug sa ubang lalawigan tabok sa Suba ug karon

11mao kini ang kopya sa sulat nga ilang gipadala—“Ngadto kang Artaxerxes nga hari: Ang imong mga alagad, mga katawhan sa lalawigan sa tabok sa Suba, nangumosta kaninyo.

12Ug karon ipahibalo ngadto sa hari nga ang mga Judio nga gikan kanimo ug miabot kanamo miadto sa Jerusalem. Ilang gitukod pag-usab ang masupilon ug daotan nga siyudad. Hapit na nila mahuman ang mga kuta ug giayo ang mga patukoranan.

13Karon ipahibalo sa hari, nga kon kining siyudara matukod pag-usab ug ang mga kuta mahuman, sila dili mobayad ug buhis, alkabala, o bayranan alang sa dalan, ug mokunhod gayod ang makita nga salapi sa gingharian.

14Karon tungod kay kami nagkaon sa asin sa balay sa hari, ug dili angay kanamo ang pagtan-aw sa hari nga kakuhaan sa kadungganan, busa nagpadala kami ug nagpahibalo sa hari

15aron nga ang pagsusi himoon unta diha sa basahon sa mga kaagi sa imong mga katigulangan. Imong makita diha sa basahon sa mga kaagi, ug mahibaloan nga kining siyudara masupilon nga siyudad, makadaot sa mga hari ug sa mga lalawigan, ug nga sila naghimo ug pag-alsa batok niini sa unang panahon. Mao kini ang hinungdan nga kining siyudara nagun-ob.

16Kami nagpahibalo sa hari nga kon kining siyudara matukod ug ang mga kuta mahuman, ikaw wala nay mapanag-iya sa lalawigan tabok sa Suba.”

17Unya ang hari nagpadala ug tubag: “Ngadto kang Rehum, nga tigmando ug ngadto kang Simsai nga eskriba, ug ngadto sa uban pa nilang mga kauban nga nagpuyo sa Samaria ug sa uban nga lalawigan tabok sa Suba, kumosta.

18Ug karon ang sulat nga imong gipadala kanamo gibasa sa tin-aw gayod sa akong atubangan.

19Ug ako nagsugo, ug ang pagsusi gihimo, ug nakita nga kining siyudara sukad sa unang panahon misukol batok sa mga hari ug nga ang pag-alsa ug pagsukol gihimo didto.

20Mga gamhanang hari ang nagmando sa Jerusalem, naghari sa tibuok nga lalawigan tabok sa Suba diin ang buhis, alkabala, ug bayranan alang sa dalan gibayad ngadto kanila.

21Busa paghimo ug usa ka sugo sa pagpahunong niining mga tawhana ug nga kining siyudara dili matukod hangtod nga ang usa ka sugo akong himoon.

22Ug pagbantay nga kamo dili magluyaluya niining butanga. Ngano nga palamboon man ang butang nga makadaot sa hari?”

23Unya sa diha nga ang kopya sa sulat ni Hari Artaxerxes gibasa sa atubangan ni Rehum ug ni Simsai nga eskriba ug sa ilang mga kauban, sila miadto nga nagdali ngadto sa mga Judio sa Jerusalem ug gipahunong sila pinaagi sa pagpugos ug sa gahom.

24Unya nahunong ang pagbuhat sa balay sa Dios nga didto sa Jerusalem, ug kini nahunong hangtod sa ikaduhang tuig sa paghari ni Dario nga hari sa Persia.

← Chapter 3 Chapter 5 →