Ezekiel 36

cebuano-2011

1“Ug ikaw, anak sa tawo, pagpropesiya ngadto sa kabukiran sa Israel ug ingna, O kabukiran sa Israel, pamati sa pulong sa Ginoo.

2Mao kini ang giingon sa Ginoong Dios: Tungod kay ang mga kaaway nag-ingon batok kaninyo, ‘Aha!’ ug ‘Ang karaang mga dapit nga habog napanag-iya na nato,’

3busa pagpropesiya ug sulti: Mao kini ang giingon sa Ginoong Dios: Tungod kay gihimo nila kamo nga biniyaan ug gidugmok kamo sa tanang dapit, nga tungod niana kamo naangkon sa ubang mga nasod, ug kamo nahimong tabi ug daotang taho sa katawhan,

4busa, O kabukiran sa Israel, pamati sa pulong sa Ginoong Dios: Mao kini ang giingon sa Ginoong Dios ngadto sa kabukiran, sa kabungtoran, sa kasapaan ug sa kawalogan, sa mga awaaw nga dapit ug sa mga biniyaan nga siyudad nga nangahimong tulisonon ug yubitonon sa ubang mga nasod nga naglibot,

5busa mao kini ang giingon sa Ginoong Dios: Ako nagsulti diha sa kainit sa akong pangabubho batok sa ubang mga nasod, ug batok sa tibuok Edom, nga naggahin sa akong yuta alang sa ilang kaugalingon aron panag-iyahon uban ang kalipay sa tibuok nilang kasingkasing ug hilabihan nga pagtamay, aron ila kining maangkon ug panguhaan.

6Busa pagpropesiya mahitungod sa yuta sa Israel ug sulti ngadto sa kabukiran ug sa kabungtoran, sa kasapaan ug sa kawalogan, Mao kini ang giingon sa Ginoong Dios: Tan-awa, ako nagsulti diha sa akong pangabubho ug sa akong kaligutgot, tungod kay nag-antos kamo sa pagpakaulaw sa mga nasod.

7Busa mao kini ang giingon sa Ginoong Dios: Ako nanumpa nga ang mga nasod nga naglibot kanimo mag-antos sa kaulawan.

8“Apan kamo, O kabukiran sa Israel, magpatuybo sa inyong mga sanga, ug maghatag sa inyong bunga ngadto sa akong katawhan nga Israel, kay sila hapit na mamauli.

9Kay tan-awa, ako dapig kaninyo, ug ako molingi kaninyo ug kamo umahon ug pugsan.

10Padaghanon nako ang mga tawo diha kaninyo, ang tibuok balay sa Israel, ang tanan niini; ang mga siyudad puy-an ug ang nangagun-ob nga mga dapit tukoron pag-usab.

11Padaghanon nako diha kaninyo ang tawo ug ang mga mananap, ug sila modaghan ug magmabungahon. Himoon nako nga puy-an kamo sama sa kahimtang ninyo kaniadto ug buhaton nako ang labi pang maayo kaninyo kay sa kaniadto. Unya kamo makaila nga ako mao ang Ginoo.

12Akong palakton diha kaninyo ang mga tawo, ang akong katawhan nga Israel, ug sila manag-iya kaninyo, ug kamo mahimo nga ilang panulundon, ug sukad karon sila dili na nimo kuhaan ug mga anak.

13Mao kini ang giingon sa Ginoong Dios: Tungod kay sila nag-ingon kaninyo, ‘Ikaw nagtukob sa mga tawo ug nagkuha sa mga anak sa imong nasod,’

14busa dili na ikaw magtukob sa mga tawo o magkuha sa mga anak gikan sa imong nasod, nag-ingon ang Ginoong Dios,

15ug dili na ikaw nako padunggon sa pagpakaulaw sa mga nasod, o mag-antos pa ikaw sa pagtamay sa mga katawhan, o papandolon pa nimo ang imong nasod, nag-ingon ang Ginoong Dios.”

16Ang pulong sa Ginoo midangat kanako,

17“Anak sa tawo, sa diha nga nagpuyo pa ang balay sa Israel sa kaugalingon nilang yuta, ila kining gihugawan pinaagi sa ilang mga pamaagi ug sa ilang mga buhat. Ang ilang gawi diha sa akong atubangan sama sa kahugaw sa babaye panahon sa iyang pagkahugaw.

18Busa akong gibubo ang akong kaligutgot diha kanila tungod sa dugo nga ilang giula diha sa yuta, tungod sa mga diosdios nga ilang gihugaw niini.

19Akong gipatibulaag sila taliwala sa mga nasod, ug sila nagkatibulaag sa kayutaan. Sumala sa ilang batasan ug sumala sa ilang mga buhat gihukman nako sila.

20Apan sa diha nga miabot sila sa mga nasod, diin sila nangadto, nagpasipala sila sa akong balaan nga ngalan, nga tungod niana ang mga tawo miingon mahitungod kanila, ‘Mao kini ang katawhan sa Ginoo, apan nanggula sila gikan sa iyang yuta.’

21Apan gimahal nako ang akong balaan nga ngalan, nga gipasipad-an sa balay sa Israel taliwala sa mga nasod diin sila miadto.

22“Busa ingna ang balay sa Israel, Mao kini ang giingon sa Ginoong Dios: Dili tungod ug alang kaninyo, O balay sa Israel, nga ako magbuhat kondili tungod ug alang sa balaan nakong ngalan nga gipasipad-an taliwala sa mga nasod diin kamo miadto.

23Ug balaanon nako ang akong bantogan nga ngalan nga gipasipad-an taliwala sa mga nasod, nga inyong gipasipad-an sa ilang taliwala, ug ang mga nasod makaila nga ako mao ang Ginoo, nag-ingon ang Ginoong Dios, sa diha nga ako balaanon diha kaninyo sa atubangan sa ilang mga mata.

24Kay panguhaon ko kamo gikan sa taliwala sa kanasoran, ug tigomon ko kamo gikan sa tanang kayutaan, ug panad-on kamo ngadto sa inyong kaugalingon nga yuta.

25Unya bisbisan ko kamo sa hinlo nga tubig, ug kamo mangahinlo gikan sa tanan ninyong kahugawan, ug gikan sa tanan ninyong diosdios hinloan ko kamo.

26Hatagan ko kamo ug usa ka bag-o nga kasingkasing, ug ibutang nako sa sulod ninyo ang usa ka bag-ong espiritu. Kuhaon nako ang kasingkasing nga bato gikan sa inyong unod, ug hatagan kamo nako ug usa ka kasingkasing nga unod.

27Ug ibutang nako ang akong Espiritu sa sulod ninyo, ug palakton ko kamo diha sa akong mga lagda ug kamo magbantay sa akong mga tulumanon, ug magtuman niini.

28Unya kamo magpuyo sa yuta nga gihatag nako sa inyong mga katigulangan, ug kamo mahimo nga akong katawhan, ug ako mahimo nga inyong Dios.

29Ug ako magluwas kaninyo gikan sa tanan ninyong kahugawan. Tawgon nako ang trigo ug padaghanon kini, ug ako dili magpahamtang kaninyo sa gutom.

30Pagdaghanon nako ang bunga sa kahoy, ug ang abot sa kaumahan, aron dili na kamo mag-antos sa pagkatalamayon tungod sa gutom taliwala sa mga nasod.

31Unya mahinumdom kamo sa inyong mga daotang pamaagi ug sa inyong mga buhat nga dili maayo, ug ngil-aran kamo sa inyong kaugalingon tungod sa inyong mga kasal-anan ug sa inyong mga dulumtanang buhat.

32Dili tungod ug alang kaninyo nga gibuhat nako kini, nag-ingon ang Ginoong Dios, hibaloi kana ninyo. Pangaulaw ug pangalibog kamo tungod sa inyong mga pamaagi, O balay sa Israel.

33“Mao kini ang giingon sa Ginoong Dios: Sa adlaw nga ako maghinlo na kaninyo gikan sa tanan ninyong kasal-anan, papuy-an nako ang mga siyudad ug ang mga nangaguba nga dapit tukoron pag-usab.

34Ug ang yuta nga biniyaan umahon, inay nga kini biniyaan diha sa panan-aw sa tanan nga nangagi.

35Ug sila moingon, ‘Kining yutaa nga biniyaan nahimong sama sa tanaman sa Eden, ug ang awaaw ug biniyaan ug guba nga mga siyudad gipuy-an na ug giparilan.’

36Unya ang mga nasod nga nahibilin libot kaninyo makaila nga ako, ang Ginoo, nagtukod pag-usab sa mga dapit nga nangaguba, ug nagtanom diha nianang dapit nga biniyaan; ako, ang Ginoo, nagsulti niini ug magbuhat niini.

37“Mao kini ang giingon sa Ginoong Dios: Ipapangayo usab nako sa balay sa Israel ngari kanako ang pagbuhat niini alang kanila, nga padaghanon nako sila sama sa usa ka panon.

38Sama sa panon alang sa halad, sama sa panon didto sa Jerusalem sa iyang gitakda nga mga kasaulogan, ang mga awaaw usab nga mga siyudad mapuno sa mga panon sa mga tawo. Unya sila makaila nga ako mao ang Ginoo. ”

← Chapter 35 Chapter 37 →