Ezekiel 11

cebuano-2011

1Unya ang Espiritu mibayaw kanako ug midala kanako ngadto sa silangan nga ganghaan sa balay sa Ginoo, nga nag-atubang sa silangan. Ug didto sa pultahan sa ganghaan dihay 25 ka tawo, ug akong nakita uban kanila si Jaasanias nga anak ni Asur ug si Pelatias nga anak ni Benaias, mga pangulo sa katawhan.

2Ug siya miingon kanako, “Anak sa tawo, mao kini ang mga tawo nga nagmugna ug kasal-anan, ug naghatag ug daotang tambag niining siyudara.

3Sila nag-ingon, ‘Dili duol ang panahon sa pagtukod ug mga balay, kining siyudara mao ang kawa ug kita mao ang unod.’

4Busa pagpropesiya batok kanila, pagpropesiya, O anak sa tawo.”

5Ug ang Espiritu sa Ginoo migahom kanako, ug siya miingon kanako, “Sulti, Mao kini ang giingon sa Ginoo: Mao kini ang giingon ninyo, O balay sa Israel, kay ako nahibalo sa mga butang nga moabot sa inyong hunahuna.

6Kamo nagpadaghan sa inyong mga pinatay niining siyudara, ug gipuno ninyo ang kadalanan sa mga pinatay.

7Busa mao kini ang giingon sa Ginoong Dios: Ang inyong mga pinatay nga inyong gibutang sa taliwala niini, sila unod, ug kining siyudara mao ang kawa, apan kamo pagawason gikan niini.

8Kamo nahadlok sa espada, ug dad-on nako ang espada nganha kaninyo, nag-ingon ang Ginoong Dios.

9Ug dad-on kamo nako gikan sa taliwala niana, ug itugyan kamo nako ngadto sa mga kamot sa mga langyaw, ug ipakanaog nako ang hukom nganha kaninyo.

10Kamo mangapukan pinaagi sa espada. Hukman ko kamo diha sa utlanan sa Israel ug kamo makaila nga ako mao ang Ginoo.

11Kining siyudara dili mahimo nga inyong kawa ug dili kamo ang unod sa taliwala niini. Hukman ko kamo diha sa utlanan sa Israel,

12ug kamo makaila nga ako mao ang Ginoo, kay wala kamo maglakaw diha sa akong mga lagda o magtuman sa akong mga tulumanon, hinuon nagbuhat sumala sa mga tulumanon sa mga nasod nga naglibot kaninyo.”

13Unya samtang ako nagpropesiya, si Pelatias nga anak ni Benaias namatay. Unya mihapa ako ug misinggit sa kusog nga tingog ug miingon, “Ah Ginoong Dios! Hutdon ba gayod nimo ang nahibilin sa Israel?”

14Unya ang pulong sa Ginoo midangat kanako,

15“Anak sa tawo, ang imong kaigsoonan, bisan ang imong mga igsoon, ang imong kauban nga mga binihag, ug ang tibuok nga balay sa Israel, silang tanan, mao ang giingon sa mga nagpuyo sa Jerusalem, ‘Nagpalayo sila gikan sa Ginoo, kanamo kining yutaa gihatag aron panag-iyahon.’

16Busa isulti, ‘Mao kini ang giingon sa Ginoong Dios: Bisan ug gipadala nako sila ngadto sa layo uban sa mga nasod, ug tungod kay akong gipatibulaag sila sa mga kayutaan, bisan pa niana ako nahimong balaan nga dapit sa makadiyot alang kanila didto sa mga kayutaan nga ilang giadtoan.’

17Busa isulti, ‘Mao kini ang giingon sa Ginoong Dios: Tigumon ko kamo gikan sa mga katawhan, ug pundokon gikan sa mga kayutaan diin kamo gipatibulaag, ug ako maghatag kaninyo sa yuta sa Israel.’

18Sa diha nga sila moabot didto, ilang kuhaon gikan niini ang tanang ngil-ad nga mga butang ug ang tanang mga dulumtanan niini.

19Ako maghatag kanila ug usa ka kasingkasing, ug ako magbutang ug usa ka bag-ong espiritu sa sulod nila. Kuhaon nako ang batoon nga kasingkasing gikan sa ilang unod, ug hatagan nako sila sa kasingkasing nga unod,

20aron sila maglakaw diha sa akong mga lagda ug magtamod sa akong mga tulumanon ug magtuman niini, sila mahimo nga akong katawhan ug ako mahimo nga ilang Dios.

21Apan sila nga ang kasingkasing nagsunod sa ilang mga ngil-ad nga butang ug sa ilang mga dulumtanan, silotan nako tungod sa ilang binuhatan, nag-ingon ang Ginoong Dios.”

22Unya ang mga kerubin miisa sa ilang mga pako uban sa mga ligid nga diha sa tupad nila, ug ang himaya sa Dios sa Israel diha sa ibabaw nila.

23Ug ang himaya sa Ginoo mikayab gikan sa taliwala sa siyudad, ug mihunong sa ibabaw sa bukid dapit sa silangan nga bahin sa siyudad.

24Ang Espiritu mibayaw kanako ug midala kanako sa usa ka panan-awon pinaagi sa Espiritu sa Dios ngadto sa Caldea, ngadto sa mga binihag. Unya ang panan-awon nga akong nakita mibiya kanako.

25Unya gisultihan nako ang mga binihag mahitungod sa tanang mga butang nga gipakita sa Ginoo kanako.

← Chapter 10 Chapter 12 →