Colossians 1

cebuano-2011

1Si Pablo, apostol ni Cristo Jesus pinaagi sa kabubut-on sa Dios, ug si Timoteo nga atong igsoon,

2Alang sa mga balaan ug kasaligang mga igsoon diha kang Cristo nga anaa sa Colosas: Ang grasya ug kalinaw maanaa kaninyo gikan sa Dios nga atong Amahan.

3Sa kanunay nagpasalamat kami sa Dios, ang Amahan sa atong Ginoong Jesu-Cristo, sa dihang mag-ampo kami alang kaninyo,

4kay kami nakadungog man mahitungod sa inyong pagtuo kang Cristo Jesus ug sa gugma nga inyong nabatonan alang sa tanang mga balaan,

5tungod sa paglaom nga gikatagana alang kaninyo didto sa langit. Nadungog kini ninyo kaniadto pinaagi sa pulong sa kamatuoran sa Maayong Balita

6nga miabot kaninyo. Ingon nga kini namunga gayod ug nagmalamboon sa tibuok kalibotan mao usab diha kaninyo, sukad pa niadtong adlaw nga nakadungog ug nakasabot kamo sa grasya sa Dios diha sa kamatuoran,

7ingon nga inyo kining nakat-onan gikan kang Epafras nga atong hinigugma nga kaubang ulipon. Siya kasaligan nga alagad ni Cristo alang kanato

8ug siya mao ang nagsugilon kanamo mahitungod sa inyong gugma diha sa Espiritu.

9Busa sukad sa adlaw sa among pagkadungog niini, wala kami mohunong sa pag-ampo alang kaninyo ug sa pagpangamuyo nga unta mapuno kamo sa kahibalo mahitungod sa iyang kabubut-on diha sa tanang espirituhanong kaalam ug pagpanabot,

10aron kamo magkinabuhi nga takos sa Ginoo, hingpit nga kahimut-an niya, magmabungahon sa tanang mga maayong buhat ug magtubo sa kahibalo mahitungod sa Dios.

11Hinaot unta nga malig-on kamo sa tanang kusog, sumala sa iyang mahimayaong gahom, alang sa tanang paglahutay ug pagpailob uban sa kalipay,

12maghatag sa mga pasalamat ngadto sa Amahan nga mao ang naghimo kanato nga takos sa pag-ambit sa panulundon sa mga balaan diha sa kahayag.

13Siya mao ang nagluwas kanato gikan sa gahom sa kangitngit ug nagbalhin kanato ngadto sa gingharian sa iyang pinalanggang Anak,

14nga diha kaniya kita nakabaton sa pagkatinubos, sa kapasayloan sa mga sala.

15Siya mao ang dagway sa dili makita nga Dios, ang panganay sa tibuok nga kabuhatan.

16Kay pinaagi kaniya gibuhat ang tanang mga butang, diha sa langit ug dinhi sa yuta, makita ug dili makita, mga trono o kamandoan o pamunoan o kagahom. Ang tanang mga butang gibuhat pinaagi kaniya ug alang kaniya.

17Siya mao na sa wala pa ang tanang mga butang, ug diha kaniya ang tanang mga butang nalangkob.

18Siya mao ang ulo sa lawas, ang iglesia. Siya mao ang sinugdan, ang panganay gikan sa mga patay, aron nga diha sa tanang mga butang siya mahimong labaw sa tanan.

19Kay diha kaniya nahimuot sa pagpuyo ang tibuok nga kahingpitan sa Dios,

20ug pinaagi kaniya mipasig-uli nganha sa iyang kaugalingon ang tanang mga butang sa kayutaan o sa kalangitan, ug naghimo sa pakigdait pinaagi sa iyang dugo diha sa krus.

21Ug kamo, nga kaniadto nahimulag ug mga kaaway diha sa panghunahuna pinaagi sa mga daotang buhat,

22karon iya nang napasig-uli ngadto kaniya diha sa iyang lawas nga unodnon pinaagi sa iyang kamatayon, aron iya kamong ikapaatubang nga balaan ug putli ug walay ikasaway diha sa iyang atubangan,

23kon kamo magpadayon gayod sa pagtuo, dili matarog ug lig-on ug dili mobulag sa paglaom sa Maayong Balita nga inyong nadungog nga giwali ngadto sa tanang mga binuhat ilalom sa langit ug nga niini ako, si Pablo, nahimong alagad.

24Gikalipay nako karon ang akong mga pag-antos tungod ug alang kaninyo, ug dinhi sa akong lawas akong gihingpit ang mga kasakit nga nakulang sa mga pag-antos ni Cristo alang sa iyang lawas nga mao ang iglesia

25Niini ako nahimong alagad sumala sa diosnong katungdanan nga gipiyal kanako alang kaninyo aron ipadayag sa hingpit ang pulong sa Dios,

26ang misteryo nga natago sulod sa mga kapanahonan ug mga kaliwatan apan karon gipadayag na ngadto sa iyang mga balaan.

27Mihukom ang Dios sa pagpaila ngadto kanila unsa ka dako sa himaya sa maong misteryo alang sa mga Gentil, nga si Cristo nga mao ang paglaom sa himaya anaa kaninyo.

28Siya mao ang among gisangyaw sa among pagpasidaan sa tanang mga tawo ug sa among pagpanudlo sa tanang mga tawo diha sa tanang kaalam, aron among ikapaatubang silang tanan ingon nga mga hamtong diha kang Cristo.

29Alang niini ako naghago, nanglimbasog sumala sa kusog nga iyang gihatag nga naggahom sa sulod nako.