Acts 25

cebuano-2011

1Sa pag-abot na ni Festo sa iyang lalawigan, human sa tulo ka adlaw, miadto siya sa Jerusalem gikan sa Cesarea.

2Ug ang mga pangulong pari ug ang mga kadagkoan sa mga Judio nagpahibalo kaniya batok kang Pablo. Ug sila mihangyo kaniya,

3naghangyo nga unta iyang ipadala si Pablo ngadto sa Jerusalem, naglaraw ug usa ka pagpangatang aron mapatay nila siya diha sa dalan.

4Apan si Festo mitubag nga si Pablo gibilanggo didto sa Cesarea, ug nga siya gayod naghunahuna sa pag-adto didto sa dili madugay.

5Siya miingon, “Busa palugsonga didto ang inyong mga pangulo uban kanako, ug kon aduna may sala kanang tawhana, pasumbonga sila batok kaniya.”

6Sa nakapabilin na siya uban kanila sa dili molabaw sa walo o napulo ka adlaw, siya milugsong ngadto sa Cesarea. Ug sa pagkasunod adlaw siya milingkod sa lingkoranan sa hukmanan ug nagsugo nga ipakuha si Pablo.

7Ug sa pag-abot na ni Pablo, ang mga Judio nga gikan sa Jerusalem mialirong kaniya nga mipasaka batok kaniya sa daghang mga bug-at nga sumbong nga dili nila mapamatud-an.

8Ug sa iyang pagpanalipod si Pablo miingon, “Wala gayod ako makasala batok sa balaod sa mga Judio o batok sa templo o batok kang Cesar.”

9Apan si Festo nga nagtinguha sa pagpahimuot sa mga Judio miingon kang Pablo, “Buot ba ikaw nga moadto sa Jerusalem, aron adto ikaw hukmi bahin niining mga sumbong sa akong atubangan?”

10Apan si Pablo mitubag kaniya, “Ako ania nagbarog sa atubangan sa hukmanan ni Cesar, diin kinahanglang anhi ako hukman. Ngadto sa mga Judio wala ako makabuhat ug kalapasan sumala sa imo nang nahibaloan pag-ayo.

11Apan kon nakasala man gani ako ug nakabuhat ug bisan unsa nga angay sa kamatayon, dili ako mobalibad sa pagpakamatay. Apan kon wala may hinungdan kining ilang mga sumbong batok kanako, walay bisan kinsa nga makahimo sa pagtugyan kanako ngadto kanila. Modangop ako kang Cesar.”

12Unya si Festo, human makigsulti sa iyang mga magtatambag, mitubag, “Kay midangop man ikaw kang Cesar; kang Cesar ikaw moadto.”

13Unya sa paglabay na sa pipila ka adlaw, si Agripa nga hari ug si Bernice miabot sa Cesarea aron sa pagyukbo kang Festo.

14Samtang nagpabilin sila didto sulod sa daghang mga adlaw, gibutyag ni Festo ang kaso ni Pablo sa atubangan sa hari nga nag-ingon, “Aniay usa ka tawo dinhi nga gibiyaang binilanggo ni Felix.

15Ug samtang didto ako sa Jerusalem, ang mga pangulong pari ug mga kadagkoan sa mga Judio mihatag kanako ug kasayoran mahitungod kaniya, ug nangayo ug hukom batok kaniya.

16Gitubag nako sila nga dili batasan sa mga Romanhon ang pagtugyan kang bisan kinsa aron silotan samtang ang sinumbong wala pa ikapaatubang sa mga magsusumbong, ug wala pa kahatagi ug higayon sa pagpanalipod sa iyang kaugalingon mahitungod sa sumbong nga gipasaka batok kaniya.

17Busa sa nagkatigom na sila dinhi, wala ako maglangan, hinuon sa pagkasunod adlaw milingkod ako sa hukmanan ug nagsugo nga dad-on sa sulod ang maong tawo.

18Sa dihang mitindog ang iyang mga magsusumbong, wala silay gikasumbong batok kaniya nga daotan sumala sa akong gidahom.

19Aduna hinuon silay mga punto sa pakiglalis batok kaniya mahitungod sa ilang kaugalingong patuotuo ug mahitungod sa usa ka Jesus nga patay na, apan gipatuo ni Pablo nga buhi.

20Ug kay nalibog na man ako kon unsaon sa pag-usisa kining mga butanga, nangutana ako kon buot ba siya nga moadto sa Jerusalem ug didto hukman mahitungod niining mga butanga.

21Apan sa dihang mihangyo si Pablo nga magpabilin siya nga binilanggo alang sa paghukom sa emperador, nagsugo ako nga bantayan siya hangtod nga ikapadala nako siya ngadto kang Cesar.”

22Ug si Agripa miingon kang Festo, “Buot akong mamati niining tawhana.” Siya mitubag, “Ugma, makapamati ikaw kaniya.”

23Busa sa pagkaugma si Agripa ug si Bernice miabot uban sa dakong pasundayag, ug misulod sila sa dapit nga tigomanan, kinuyogan sa mga pangulo sa kasundalohan ug mga kadagkoan sa siyudad. Ug tuman sa sugo ni Festo, gidala sa sulod si Pablo.

24Ug si Festo miingon, “Hari Agripa ug kamong tanan nga ania dinhi uban kanamo, nakita ninyo kining tawhana nga mahitungod kaniya ang tibuok panon sa mga Judio naghangyo kanako didto sa Jerusalem ug dinhi usab, nagsinggit nga kinahanglang dili siya tugotan nga mabuhi pa.

25Apan akong nakita nga wala siyay nabuhat nga takos sa kamatayon ug kay siya midangop man sa emperador, ako nakahukom nga ipadala nako siya.

26Apan wala akoy bisan unsa nga ikasulat sa akong labaw mahitungod kaniya. Busa gidala nako siya sa inyong atubangan ilabi na gayod kanimo, Hari Agripa, aron nga human nato siya masukitsukit aduna na akoy ikasulat.

27Kay alang kanako daw dili makatarunganon ang pagpadala ug binilanggo nga walay sumbong nga gipasaka batok kaniya.”

← Chapter 24 Chapter 26 →