2 Samuel 13

cebuano-2011

1Unya si Absalom nga anak ni David may usa ka igsoong babaye nga maanyag nga ginganlan ug Tamar. Ug si Amnon nga anak ni David nahigugma kaniya.

2Ug si Amnon nahasol pag-ayo ug nasakit siya tungod sa iyang igsoon nga si Tamar kay siya usa ka ulay ug lisod alang kang Amnon ang paghimo ug bisan unsa kaniya.

3Apan si Amnon may usa ka higala, nga ginganlan ug Jonadab nga anak ni Simeas nga igsoon ni David, ug si Jonadab igmat kaayo nga tawo.

4Ug siya miingon kaniya, “O anak sa hari, nganong subo man kaayo ang imong nawong matag buntag? Dili mo ba ako suginlan?” Ug si Amnon miingon kaniya, “Ako nahigugma kang Tamar, ang igsoon nga babaye sa akong igsoon nga si Absalom.”

5Si Jonadab miingon kaniya, “Higda sa imong higdaanan ug pagpasakitsakit ug kon ang imong amahan moanhi aron sa pagtan-aw kanimo, ingna siya, ‘Paanhia ang akong igsoon nga babaye nga si Tamar, aron maoy maghatag kanako ug pan aron kaonon, ug mag-andam ug pagkaon sa akong atubangan aron makita ko kini ug kaonon kini gikan sa iyang kamot.’ ”

6Busa si Amnon mihigda ug nagpasakitsakit, ug sa diha nga miabot na ang hari aron sa pagtan-aw kaniya, si Amnon miingon sa hari, “Hangyoon ko ikaw nga paanhion si Tamar nga akong igsoon ug pabuhata siya ug duha ka buok torta sa akong atubangan aron mokaon ako gikan sa iyang kamot.”

7Unya gipatawag ni David si Tamar ug giingnan niya, “Lakaw ngadto sa balay sa imong igsoon nga si Amnon ug andami siya ug pagkaon.”

8Busa si Tamar miadto sa balay sa iyang igsoon nga si Amnon diin siya naghigda. Ug nagkuha siya ug harina, ug nagmasa niini, ug naghimo ug torta sa iyang atubangan, ug nagluto niini.

9Ug iyang gikuha ang mga torta ug gidulot kini sa iyang atubangan, apan nagdumili siya sa pagkaon. Ug si Amnon miingon, “Papahawaa ang tanang mga tawo gikan kanako.” Busa ang matag usa kanila namahawa.

10Unya si Amnon miingon kang Tamar, “Dad-a ang pagkaon ngadto sa lawak aron ako mokaon gikan sa imong kamot.” Ug gikuha ni Tamar ang mga torta nga iyang gibuhat, ug gidala niya didto sa sulod ngadto sa iyang igsoon nga lalaki nga si Amnon.

11Apan sa gidala na niya kini duol kaniya aron sa pagkaon, iyang gikuptan siya ug miingon kaniya, “Dali, higda tupad nako, igsoon ko.”

12Siya mitubag kaniya nga nag-ingon, “Dili, igsoon ko, ayaw ako pugsa, kay walay butang nga ingon niana nga gibuhat dinhi sa Israel. Ayaw buhata kining mapatuyangong binuanga.

13Ako, asa man nako dad-a ang akong kaulaw? Ug mahitungod kanimo, ikaw mahimong sama sa usa sa mga mapatuyangon nga buang sa Israel. Busa karon, ako naghangyo kanimo, sultihi ang hari kay siya dili maghikaw kanako gikan kanimo.”

14Apan wala siya mamati kaniya, ug tungod kay labaw man siya ka kusgan kay kaniya, iyang gilugos siya ug midulog kaniya.

15Unya si Amnon nagdumot kaniya sa hilabihan gayod nga pagdumot, kay ang pagdumot nga iyang gibati batok kaniya labaw pa ka dako kay sa gugma nga iyang gibati kaniya. Ug si Amnon miingon kaniya, “Bangon ug lakaw.”

16Apan si Tamar miingon kaniya, “Dili mahimo, akong igsoon, kay kining imong pagpapahawa kanako ngil-ad pa kay sa uban nga imong gibuhat kanako.” Apan siya wala mamati kaniya.

17Unya gitawag ni Amnon ang batan-ong lalaki nga nag-alagad kaniya ug giingnan, “Papahawaa karon kining babayhana gikan kanako, ug trangkahi ang pultahan kon makagula na siya.”

18Siya nagsul-ob ug bisti nga taas nga binuktonan kay mao man kini ang bisti sa mga ulayng anak nga babaye sa hari. Busa ang sulugoon ni Amnon nagdala kang Tamar sa gawas ug gitrangkahan ang pultahan sa iyang paggula.

19Ug si Tamar nagbutang ug abo sa iyang ulo, ug gigisi niya ang bisti nga taas nga iyang gisul-ob ug iyang gibutang ang iyang kamot sa iyang ulo ug milakaw nga naghilak pag-ayo.

20Unya ang iyang igsoon nga si Absalom miingon kaniya, “Uban ba kanimo si Ammon nga imong igsoon? Karon paghilom, igsoon ko, kay siya imong igsoon; ayaw ibutang kining butanga sa kasingkasing.” Busa si Tamar nagpabilin nga masulub-on didto sa balay sa iyang igsoon nga lalaki nga si Absalom.

21Sa diha nga si Hari David nakadungog niining tanang mga butanga, siya nasuko sa hilabihan.

22Apan si Absalom wala mosulti kang Amnon sa maayo o sa daotan; kay si Absalom nagdumot kang Amnon tungod kay iyang gilugos ang iyang igsoon nga babaye nga si Tamar.

23Human sa tibuok duha ka tuig, si Absalom may mga tigtupi sa mga karnero didto sa Baal-hasor nga duol sa Efraim, ug gidapit ni Absalom ang tanang mga anak nga lalaki sa hari.

24Ug si Absalom miadto sa hari ug miingon, “Tan-awa, ang imong ulipon may mga tigtupi sa mga karnero. Ako naghangyo nga unta ang hari ug ang iyang mga sulugoon mouban sa imong sulugoon.”

25Apan ang hari miingon kang Absalom, “Dili, anak ko, ayaw kaming tanan paadtoa kay tingali unya ug makapabug-at kami kanimo.” Iyang gipugos siya apan wala siya moadto, hinuon gipanalanginan niya si Absalom.

26Unya si Absalom miingon, “Kon dili, ako naghangyo kanimo, paubana kanamo si Amnon nga akong igsoon.” Ug ang hari miingon kaniya, “Nganong paubanon man siya nimo?”

27Apan si Absalom namugos kaniya hangtod nga gipakuyog sa hari si Amnon ug ang tanang anak nga lalaki sa hari.

28Unya si Absalom misugo sa iyang mga sulugoon, “Timan-i ninyo sa diha nga ang kasingkasing ni Amnon magmalipayon tungod sa bino, ug sa diha nga ako moingon kaninyo, ‘Tigbasa si Amnon,’ patya siya. Ayaw kahadlok; wala ba ako magsugo kaninyo? Pagmalig-on kamo ug pagmaisogon.”

29Busa ang mga sulugoon ni Absalom mibuhat ngadto kang Amnon sumala sa gisugo ni Absalom. Unya ang tanang mga anak nga lalaki sa hari mitindog, ug ang matag tawo misakay sa iyang mula, ug miikyas.

30Samtang diha pa sila sa dalan, ang mga balita miabot kang David, “Gipatay ni Absalom ang tanang mga anak nga lalaki sa hari, ug walay usa kanila nga nahibilin.”

31Unya ang hari mitindog, ug gigisi ang iyang mga bisti ug mihigda sa yuta, ug ang tanan niyang mga sulugoon nga nagtindog uban kaniya migisi usab sa ilang mga bisti.

32Apan si Jonadab nga anak ni Simeas, igsoon ni David, miingon, “Dili unta maghunahuna ang akong agalon nga ilang napatay ang tanang mga batan-ong anak nga lalaki sa hari kay si Amnon mao lamang ang namatay, kay gilaraw na kini ni Absalom sukad pa sa adlaw nga gilugos ni Amnon ang iyang igsoon nga babaye nga si Tamar.

33Busa karon, ang akong agalong hari dili unta maguol nga ang tanang mga anak nga lalaki sa hari nangamatay kay si Amnon mao lamang ang namatay.”

34Apan si Absalom mikagiw. Ug ang batan-ong lalaki nga nagbantay miyahat sa iyang mga mata ug milantaw, ug nakita ang daghang mga tawo nga nagsingabot agi sa dalan sa Horonaim sa kiliran sa bungtod.

35Ug si Jonadab miingon sa hari, “Tan-awa, ang mga anak nga lalaki sa hari nangabot, sumala sa giingon sa imong sulugoon nahitabo kini.”

36Ug igo lang siya nga nakahuman ug sulti, ang mga anak nga lalaki sa hari nangabot, ug naninggit sila ug nanghilak ug ang hari usab ug ang tanan niyang mga sulugoon nanghilak sa hilabihan gayod.

37Apan si Absalom mikagiw ug miadto kang Talmai nga anak nga lalaki ni Amihud, ang hari sa Gesur. Ug nagbangutan si David tungod sa iyang anak sa matag adlaw.

38Busa si Absalom mikagiw ug miadto sa Gesur ug didto siya magpuyo sulod sa tulo ka tuig.

39Ug ang kalag sa hari nangandoy sa pag-adto kang Absalom, kay siya nahupay na mahitungod kang Amnon, sa pagtan-aw nga siya patay na.

← Chapter 12 Chapter 14 →