2 Kings 23

cebuano-2011

1Unya ang hari nagsugo nga ang tanang kadagkoan sa Juda ug sa Jerusalem nagtigom ngadto kaniya.

2Ug ang hari miadto sa balay sa Ginoo, ug uban kaniya ang tanang mga tawo sa Juda ug ang tanan nga nagpuyo sa Jerusalem ug ang mga pari ug ang mga propeta ug ang tibuok katawhan, inila ug dili inila, ug iyang gibasa sa ilang atubangan ang tanang mga pulong sa basahon sa kasabotan nga nakita didto sa balay sa Ginoo.

3Unya ang hari mitindog tupad sa haligi ug naghimo ug usa ka kasabotan sa atubangan sa Ginoo sa pagsunod sa Ginoo, ug sa pagtuman sa iyang mga sugo ug sa iyang mga pagpamatuod ug sa iyang mga lagda, sa tibuok niyang kasingkasing ug sa tibuok niyang kalag, sa pagbuhat sa mga pulong niini nga kasabotan nga nasulat niini nga basahon, ug ang tibuok katawhan misalmot sa kasabotan.

4Unya ang hari misugo kang Hilkias nga labawng pangulong pari, ug sa mga pari sa ikaduhang laray, ug sa mga tigbantay sa tugkaran, sa pagdala ngadto sa gawas sa balay sa Ginoo sa tanan nga mga sudlanan nga gihimo alang sa Baal, alang sa Asera ug alang sa tanang panon sa kalangitan. Ug iya kining gisunog sa gawas sa Jerusalem diha sa mga kapatagan sa Kidron, ug gidala ang mga abo niini ngadto sa Betel.

5Ug iyang gipapahawa ang mga pari nga nag-alagad sa mga diosdios nga gisugo sa mga hari sa Juda sa pagsunog ug insenso sa habog nga mga dapit sa mga siyudad sa Juda ug sa mga dapit nga naglibot sa Jerusalem, ingon man usab niadtong nagsunog ug insenso alang sa Baal, sa adlaw ug sa bulan ug sa mga planeta ug sa tanang panon sa kalangitan.

6Iyang gipagawas ang Asera gikan sa balay sa Ginoo ngadto sa gawas sa Jerusalem, ngadto sa sapa sa Kidron ug gisunog kini didto sa sapa sa Kidron ug gidugmok hangtod nga naabog ug gisaliyab ang abog niini sa ibabaw sa mga lubnganan sa mga anak sa mga tawo nga yano.

7Unya iyang gigun-ob ang mga balay sa mga lalaking nagbaligya sa ilang dungog nga diha sa balay sa Ginoo, diin ang mga babaye naghimo sa dayandayan alang sa Asera.

8Iyang gidala ang tanang mga pari gikan sa mga lungsod sa Juda ug gipasipalahan ang mga habog nga dapit diin ang mga pari nagsunog ug insenso, gikan sa Gibea ngadto sa Beer-seba. Ug iyang gigun-ob ang mga habog nga dapit sa mga ganghaan nga diha sa agianan sa ganghaan ni Josue nga gobernador sa siyudad, nga diha dapit sa wala sa ganghaan sa siyudad.

9Bisan pa niana ang mga pari sa mga habog nga dapit wala moadto sa halaran sa Ginoo didto sa Jerusalem, kondili nangaon sila ug pan nga walay patubo uban sa ilang mga kaigsoonan.

10Ug iyang gipasipalahan ang Tofet nga anaa sa walog sa mga anak ni Hinom, aron walay bisan kinsa nga makasunog sa iyang anak nga lalaki o anak nga babaye ingon nga halad ngadto kang Molec.

11Ug iyang gikuha ang mga kabayo nga gihalad sa mga hari sa Juda ngadto sa adlaw, sa agianan padulong sa balay sa Ginoo, dapit sa lawak ni Natan-melek nga tinugyanan sa balay nga didto sa mga hawanan ug iyang gisunog sa kalayo ang mga karwahe sa adlaw.

12Ang mga halaran nga diha sa atop sa kinatas-an nga lawak ni Ahas, nga gibuhat sa mga hari sa Juda ug ang mga halaran nga gibuhat ni Manases didto sa duha ka hawanan sa balay sa Ginoo, iyang gilumpag ug gipulpog ug ilang gisaliyab ang abog didto sa sapa sa Kidron.

13Gipasipalahan sa hari ang mga habog nga dapit nga diha sa silangan sa Jerusalem, dapit sa habagatan sa Bungtod sa Pagkadunot nga gitukod ni Solomon nga hari sa Israel alang kang Astarot nga dulumtanan nga iya sa mga Sidonhanon, ug alang kang Camos nga dulumtanan nga iya sa Moab ug alang kang Milcom nga dulumtanan nga iya sa mga Amonihanon.

14Ug iyang gipanugmok ang mga haligi ug gipamutol ang mga Asera ug gipuno ang ilang nga dapit sa mga bukog sa mga tawo.

15Dugang pa, ang halaran nga diha sa Betel, ang habog nga dapit nga gibuhat ni Jeroboam nga anak ni Nebat nga naghimo sa Israel sa pagpakasala, kadtong halaran sa habog nga dapit iyang gilumpag ug gidugmok ang mga bato niini, gipulpog hangtod nga naabo ug gisunog usab niya ang Asera.

16Ug sa paglingi ni Josias, iyang nakita ang mga lubnganan nga diha sa bukid, ug siya nagpaadto ug gikuha ang mga bukog sa mga lubnganan ug gisunog sila sa ibabaw sa halaran, ug gipasipalahan kini, sumala sa pulong sa Ginoo nga gipadayag sa tawo sa Dios nga nagpahibalo niining mga butanga.

17Unya siya miingon, “Unsa kanang monyumento nga akong nakita?” Ug ang mga tawo sa siyudad misulti kaniya, “Kana mao ang lubnganan sa tawo sa Dios nga miabot gikan sa Juda ug nagpahibalo niining mga butanga nga imong nabuhat batok sa halaran sa Betel.”

18Ug siya miingon, “Pasagdi siya; ayaw itugot nga adunay magbalhin sa iyang mga bukog.” Busa ilang gipasagdan ang iyang mga bukog, uban sa mga bukog sa propeta nga migula sa Samaria.

19Ang tanang mga templo usab sa mga habog nga dapit, nga diha sa mga siyudad sa Samaria, nga gihimo sa mga hari sa Israel, aron sa paghagit sa Ginoo sa pagkasuko, gikuha ni Josias ug gibuhat ngadto kanila ang tanan nga iyang gibuhat didto sa Betel.

20Ug iyang gipamatay ang tanan nga mga pari sa habog nga dapit nga didto sa mga halaran ug gisunog ang mga bukog sa mga tawo sa ibabaw nila. Unya mibalik siya ngadto sa Jerusalem.

21Unya ang hari nagsugo sa tibuok katawhan, “Tumana ang Kasaulogan sa Pagsaylo alang sa Ginoo nga inyong Dios, sumala sa nasulat niining basahon sa kasabotan.”

22Walay Kasaulogan sa Pagsaylo nga nahimo sukad sa mga adlaw sa mga maghuhukom nga naghukom sa Israel o sa tanang mga adlaw sa mga hari sa Israel o sa mga hari sa Juda,

23apan sa ikanapulo ug walo nga tuig ni Hari Josias kini nga Kasaulogan sa Pagsaylo gihimo alang sa Ginoo didto sa Jerusalem.

24Dugang pa, gihinginlan ni Josias ang mga tawo nga tigpakisayod ug mga espiritu ug ang mga salamangkiro ug ang mga gagmayng larawan ug ang mga diosdios ug ang tanang mga dulumtanan nga nakita didto sa yuta sa Juda ug sa Jerusalem, aron iyang matuman ang mga pulong sa Balaod nga nasulat sa basahon nga nakaplagan ni Hilkias nga pari sa balay sa Ginoo.

25Ug walay hari nga una kaniya nga sama kaniya nga mibalik sa Ginoo uban ang tibuok niyang kasingkasing ug uban ang tibuok niyang kalag ug uban ang tibuok niyang gahom, sumala sa tibuok Balaod ni Moises, o may ulahi pa kaniya nga sama kaniya.

26Apan bisan pa niini ang Ginoo wala mobiya gikan sa kabangis sa iyang dakong kaligutgot, diin ang iyang kasuko misilaob batok sa Juda, tungod sa tanang mga paghagit ni Manases kaniya.

27Ug ang Ginoo miingon, “Kuhaon usab nako ang Juda gikan sa akong panan-aw, ingon sa akong pagkuha sa Israel ug isalikway nako kining siyudad nga akong gipili, ang Jerusalem ug ang balay nga niini ako miingon, Ang akong ngalan anha diha.”

28Karon ang uban nga mga buhat ni Josias ug ang tanan niyang nahimo, wala ba kini masulat sa basahon sa mga Kasaysayan sa mga Hari sa Juda?

29Sa iyang mga adlaw, ang Paraon nga si Neco nga hari sa Ehipto misulong sa hari sa Asiria ngadto sa suba sa Eufrates. Si Hari Josias misugat kaniya ug ang Paraon nga si Neco mipatay kaniya didto sa Megido sa iyang pagkakita kaniya.

30Ug ang iyang mga sulugoon nagbutang sa iyang patayng lawas diha sa usa ka karwahi gikan sa Megido ug gidala siya ngadto sa Jerusalem, ug gilubong siya didto sa iyang kaugalingong lubnganan. Ug ang katawhan sa yuta mikuha kang Jehoahas nga anak ni Josias ug gidihogan siya ug gihimo siya nga hari puli sa iyang amahan.

31Si Jehoahas 23 ka tuig ang panuigon sa pagsugod niya sa paghari ug siya naghari sulod sa tulo ka bulan didto sa Jerusalem. Ang ngalan sa iyang inahan mao si Hamutal nga anak ni Jeremias sa Libna.

32Iyang gibuhat ang daotan diha sa panan-aw sa Ginoo sumala sa gihimo sa iyang katigulangan.

33Ug gipabilanggo siya sa Paraon nga si Neco didto sa Ribla sa yuta sa Hamat, aron dili siya makahari sa Jerusalem, ug gipabuhis niya ang katawhan ug usa ka gatos ka talanton nga plata ug usa ka talanton nga bulawan.

34Unya ang Paraon nga si Neco naghimo kang Eliakim nga anak ni Josias ingon nga hari puli kang Josias nga iyang amahan ug giilisan ang iyang ngalan ug Jehoiakim. Apan iyang gikuha si Jehoahas ug miadto siya sa Ehipto ug namatay didto.

35Unya gihatag ni Jehoiakim ang plata ug ang bulawan ngadto sa Paraon, apan iyang gipabuhisan ang yuta aron ihatag ang salapi sumala sa sugo sa Paraon. Iyang gikuha ang plata ug ang bulawan sa katawhan sa yuta, ang matag usa sumala sa iyang buhis, aron ihatag sa Paraon nga si Neco.

36Sa Jehoiakim 25 ka tuig ang panuigon sa pagsugod niya sa paghari ug siya naghari sulod sa napulo ug usa ka tuig didto sa Jerusalem. Ang ngalan sa iyang inahan mao si Zebida nga anak ni Pedaias sa Ruma.

37Ug iyang gibuhat ang daotan diha sa panan-aw sa Ginoo, sumala sa tanan nga gihimo sa iyang katigulangan.

← Chapter 22 Chapter 24 →