2 Kings 18

cebuano-2011

1Sa ikatulo nga tuig ni Hosea nga anak ni Ela hari sa Israel, si Hesekias nga anak ni Ahas, hari sa Juda, nagsugod sa paghari.

2Siya 25 ka tuig ang panuigon sa pagsugod niya sa paghari ug siya naghari sulod sa 29 ka tuig didto sa Jerusalem. Ang ngalan sa iyang inahan mao si Abi nga anak ni Zacarias.

3Gibuhat niya ang matarong diha sa mga mata sa Ginoo sumala sa tanan nga gibuhat sa iyang amahan nga si David.

4Iyang giguba ang mga habog nga dapit ug gitumpag ang mga haligi nga bato ug giputol ang Asera ug iyang gidugmok ang bitin nga bronsi nga gibuhat ni Moises, kay hangtod niadtong mga adlawa ang katawhan sa Israel nagsunog man ug insenso alang niini, ug kini gitawag ug Nehustan.

5Siya misalig sa Ginoo, ang Dios sa Israel, busa walay sama kaniya sa taliwala sa tanang mga hari sa Juda nga sunod kaniya o bisan niadtong una kaniya.

6Nagpabilin siya sa Ginoo, wala siya mobiya sa pagsunod kaniya kondili nagtuman sa iyang mga sugo nga gisugo sa Ginoo kang Moises.

7Ug ang Ginoo nag-uban kaniya ug bisan asa siya moadto, siya nagmauswagon. Ug siya mialsa batok sa hari sa Asiria ug wala moalagad kaniya.

8Iyang gilaglag ang mga Filistihanon hangtod sa Gaza ug sa mga kayutaan niini, gikan sa tore hangtod sa kinutaan nga siyudad.

9Sa ikaupat nga tuig ni Hari Hesekias nga mao ang ikapito nga tuig ni Hosea nga anak ni Ela nga hari sa Israel, si Salmaneser nga hari sa Asiria misulong sa Samaria ug gilibotan kini.

10Ug human sa tulo ka tuig iya kining nailog. Sa ikaunom nga tuig ni Hesekias nga maoy ikasiyam nga tuig ni Hosea, nga hari sa Israel, nailog ang Samaria.

11Ug gibihag sa hari sa Asiria ang mga Israelinhon ngadto sa Asiria, ug gibutang sila sa Hala, ug sa Habor, sa suba sa Gosan, ug sa mga siyudad sa mga taga-Media,

12tungod kay wala sila motuman sa tingog sa Ginoo nga ilang Dios, apan milapas hinuon sa iyang kasabotan, bisan sa tanan nga gisugo ni Moises nga sulugoon sa Ginoo, wala sila mamati o magtuman niini.

13Ug sa ikanapulo ug upat nga tuig ni Hari Hesekias, si Senakerib nga hari sa Asiria misulong sa tanang kinutaan nga mga siyudad sa Juda ug nailog kini.

14Unya si Hesekias nga hari sa Juda nagpaadto sa hari sa Asiria didto sa Lakis, nga nag-ingon, “Ako nakahimo ug daotan, palayo gikan kanako ug bisan unsa ang inyong ipahamtang kanako akong sagubangon.” Ug ang hari sa Asiria nangayo kang Hesekias nga hari sa Juda ug tulo ka gatos ka talanton nga plata ug katloan ka talanton nga bulawan.

15Ug gihatag ni Hesekias kaniya ang tanang plata nga diha sa balay sa Ginoo ug diha sa mga tipiganan sa bahandi sa balay sa hari.

16Niadtong panahona gipanguha ni Hesekias ang bulawan sa mga ganghaan sa templo sa Ginoo, ug gikan sa mga haligi nga gidayandayan ni Hesekias nga hari sa Juda ug gihatag kini ngadto sa hari sa Asiria.

17Ug ang hari sa Asiria nagpadala sa Tartan sa Rabsaris ug sa Rabsakes uban sa usa ka dakong panon sa kasundalohan gikan sa Lakis ngadto kang Hari Hesekias didto sa Jerusalem. Ug sila mitungas ug miadto sa Jerusalem. Ug sa pag-abot nila, nangadto ug nanindog sila duol sa agianan sa tubig nga paingon sa dalan sa Uma sa Tiglaba.

18Ug sa pagtawag nila sa hari, migula ngadto kanila si Eliakim nga anak ni Hilkias nga sinaligan sa panimalay ug si Sebna nga sekretaryo ug si Joa nga anak ni Asaf, ang tiglista.

19Unya ang Rabsakes miingon kanila, “Sultihi si Hesekias, ‘Kini mao ang giingon sa bantogang hari nga hari sa Asiria: Sa unsa nimo gisandig ang imong pagsalig?

20Nagtuo ba ikaw nga mga pulong lamang ang paagi ug gahom alang sa gubat? Kang kinsa man ikaw nagsalig nga mialsa man ikaw batok kanako?

21Tan-awa, ikaw nagsalig karon sa Ehipto nga daw usa ka buak nga sungkod nga moduslak sa kamot ni bisan kinsa nga mosandig niini. Mao kana ang Paraon nga hari sa Ehipto ngadto sa tanan nga mosalig kaniya.

22Apan kon moingon kamo kanako, “Kami nagsalig sa Ginoo nga among Dios,” dili ba kana siya kang kansang habog nga mga dapit ug mga halaran gikuha ni Hesekias, nga nag-ingon sa Juda ug sa Jerusalem, “Kamo kinahanglang magsimba sa atubangan niining halaran sa Jerusalem”?

23Dali ngari ug pakigpusta sa akong agalon nga hari sa Asiria: Ako maghatag kanimo ug duha ka libo ka kabayo kon makahimo ikaw sa imong bahin sa pagbutang kanila ug mga tigkabayo.

24Unsaon man nimo sa pagsanta sa usa ka pangulo sa labing ubos sa mga sulugoon sa akong agalon nga nagsalig man ikaw sa Ehipto alang sa mga karwahi ug sa mga tigkabayo?

25Dugang pa niana, dili ba uban sa Ginoo nga ako mitungas batok niining dapita aron sa paglaglag niini? Ang Ginoo miingon kanako, ‘Sulonga kining yutaa ug laglaga kini.’ ”

26Unya si Eliakim nga anak ni Hilkias ug si Sebna ug si Joas miingon sa Rabsakes, “Naghangyo kami kanimo, sulti sa imong mga sulugoon sa pinulongan nga Aramaiko, kay kami makasabot niana. Ayaw pagpakigsulti kanamo sa pinulongan sa Juda, kay makadungog ang katawhan nga anaa sa ibabaw sa kuta.”

27Apan ang Rabsakes miingon kanila, “Gipaanhi ba ako sa akong agalon aron sa pagsulti niining mga pulonga ngadto sa imong agalon ug kaninyo ug dili ngadto sa mga tawo nga nanglingkod sa ibabaw sa kuta, nga uban kaninyo mokaon unya sa kaugalingon nilang kinalibang ug moinom sa kaugalingon nilang ihi?”

28Unya ang Rabsakes mitindog ug misinggit sa pinulongan sa Juda, “Pamatia ninyo ang pulong sa gamhanang hari, ang hari sa Asiria!

29Mao kini ang gisulti sa hari, ‘Ayaw itugot nga maglimbong si Hesekias kaninyo kay siya dili makaluwas kaninyo gikan sa iyang kamot.

30Ayaw itugot nga si Hesekias maghimo kaninyo nga mosalig sa Ginoo sa pag-ingon, Ang Ginoo magluwas gayod kanato ug kining siyudad dili ihatag ngadto sa kamot sa hari sa Asiria.’

31Ayaw kamo pamati kang Hesekias, kay kini mao ang gipamulong sa hari sa Asiria, ‘Himoa ang inyong pagpakigdait uban kanako ug duol kamo kanako, unya ang matag usa kaninyo magkaon sa iyang kaugalingong paras ug ang matag usa sa iyang kaugalingong igera ug ang matag usa kaninyo mag-inom sa tubig sa iyang kaugalingong atabay,

32hangtod nga ako moanhi ug magdala kaninyo ngadto sa usa ka yuta nga sama sa inyong kaugalingong yuta, usa ka yuta sa trigo ug sa bino, usa ka yuta sa pan ug mga kaparasan, usa ka yuta sa mga kahoy nga olibo ug dugos, aron kamo mangabuhi ug dili mangamatay. Ug ayaw kamo pagpamati kang Hesekias kon siya maglukmay kaninyo nga mag-ingon, Ang Ginoo magluwas kanato.

33May mga dios ba sa mga nasod nga nakaluwas gayod sa iyang yuta gikan sa kamot sa hari sa Asiria?

34Hain ang mga dios sa Hamat ug sa Arpad? Hain ang mga dios sa Sefarbaim, sa Ena, ug Iva? Naluwas ba nila ang Samaria gikan sa akong kamot?

35Kinsa ba sa mga dios sa tanan nga kayutaan nga nakaluwas sa ilang yuta gikan sa akong kamot, nga ang Ginoo magluwas sa Jerusalem gikan sa akong kamot?’ ”

36Apan ang katawhan naghilom ug wala motubag kaniya bisan usa ka pulong, kay ang sugo sa hari nag-ingon, “Ayaw siya tubaga.”

37Unya si Eliakim nga anak ni Hilkias, ang sinaligan sa panimalay ug si Sibna nga sekretaryo ug si Joas nga anak ni Asaf, ang tiglista, miabot ngadto kang Hesekias, gisi ang ilang mga bisti ug nagsugilon kaniya sa mga pulong sa Rabsakes.

← Chapter 17 Chapter 19 →