2 Chronicles 34

cebuano-2011

1Si Josias walo ka tuig ang panuigon sa iyang pagsugod sa paghari ug siya naghari sulod sa 31 ka tuig didto sa Jerusalem.

2Siya nagbuhat sa matarong diha sa mga mata sa Ginoo ug naglakaw sa dalan ni David nga iyang amahan ug wala motipas ngadto sa tuo o ngadto sa wala.

3Kay sa ikawalo nga tuig sa iyang paghari, samtang batan-on pa siya, siya nag-alagad sa Dios ni David nga iyang amahan ug sa ikanapulo ug duha nga tuig siya nagsugod sa paghinlo sa Juda ug sa Jerusalem sa mga habog nga dapit, sa mga Asera, ug sa mga kinulit ug sa mga tinunaw nga larawan.

4Ilang gitumpag ang mga halaran sa mga Baal diha sa iyang atubangan ug gibuak ang mga halaran sa insenso nga diha sa ibabaw niini ug gidugmok ang mga Asera ug ang mga kinulit ug mga tinunaw nga larawan ug gihimo kining abog ug gisabwag kini sa ibabaw sa mga lubnganan niadtong mga naghalad kanila.

5Gisunog usab niya ang bukog sa mga pari ibabaw sa ilang mga halaran, ug gihinloan ang Juda ug ang Jerusalem.

6Sa mga siyudad sa Manases sa Efraim ug sa Simeon, hangtod sa Neftali, diha sa ilang mga nangaguba nga naglibot,

7iyang gitumpag ang mga halaran ug gidugmok ang mga Asera ug ang mga larawan hangtod naabog, ug gipamutol ang mga halaran sa insenso sa tibuok yuta sa Israel, unya mibalik siya ngadto sa Jerusalem.

8Sa ikanapulo ug walo nga tuig sa iyang paghari, sa diha nga nahinloan na niya ang yuta ug ang balay, iyang gipaadto si Safan nga anak ni Asalias ug si Maasias nga gobernador sa siyudad ug si Joa nga anak ni Joahas nga tiglista aron sa pag-ayo sa balay sa Ginoo nga iyang Dios.

9Nangadto sila kang Hilkias nga labawng pangulong pari, ug gihatag ang salapi nga gidala ngadto sa balay sa Dios nga natigom sa mga Levihanon nga mga tigbantay sa pultahan gikan sa kamot ni Manases ug ni Efraim, ug gikan sa tanang salin sa Israel ug gikan sa tibuok Juda ug Benjamin, ug gikan sa mga nagpuyo sa Jerusalem.

10Gihatag nila kini ngadto sa kamot sa mga mamumuo nga nag-alagad didto sa balay sa Ginoo ug ang mga mamumoo nga nagbuhat sa balay sa Ginoo mihatag niini aron sa pag-ayo ug sa pagtukod pagbalik sa balay.

11Gihatag nila kini ngadto sa mga panday ug sa mga magtutukod aron sa pagpalit ug mga sinapsapan nga bato, ug kahoy alang sa mga igsusumpay ug sa mga sagbayan alang sa mga balay nga gipaguba sa mga hari sa Juda.

12Ang mga tawo nagbuhat nga matinumanon sa buluhaton, ug ibabaw kanila mao si Jahat ug si Obadias nga mga Levihanon sa mga kaliwat ni Merari ug si Zacarias ug si Mesulam sa mga kaliwat sa mga Kohatihanon aron sa pagdumala. Ang mga Levihanon, ang tanan nga batid sa mga tulunggon sa musika

13maoy nagdumala sa mga tigdala sa mga bug-at nga butang ug nagdumala sa tanang nagbuhat sa tanang matang sa pagpangalagad. Pipila sa mga Levihanon mga eskriba, ug mga tinugyanan ug mga tigbantay sa ganghaan.

14Samtang gidala nila sa gawas ang salapi nga gidala ngadto sa balay sa Ginoo, si Hilkias nga pari nakakita sa basahon sa Balaod sa Ginoo nga gihatag pinaagi kang Moises.

15Unya si Hilkias miingon kang Safan nga sekretaryo, “Akong nakit-an ang basahon sa Balaod diha sa balay sa Ginoo.” Ug gihatag ni Hilkias ang basahon ngadto kang Safan.

16Ug gidala ni Safan ang basahon ngadto sa hari ug misugilon pa gayod ngadto sa hari, “Ang tanan nga gitugyan sa imong mga alagad, ilang gibuhat.

17Gihabwa nila ang salapi nga nakit-an didto sa balay sa Ginoo ug gihatag kini ngadto sa kamot sa mga tigdumala ug sa mga mamumuo.”

18Unya si Safan nga sekretaryo misugilon sa hari, “Si Hilkias nga pari mihatag kanako ug usa ka basahon.” Ug gibasa kini ni Safan sa atubangan sa hari.

19Sa diha nga ang hari nakadungog sa mga pulong sa Balaod, iyang gigisi ang iyang mga bisti.

20Ug ang hari misugo kang Hilkias, kang Ahikam nga anak ni Safan, kang Abdon nga anak ni Mica, kang Safan nga sekretaryo ug kang Asaias nga alagad sa hari, nga nag-ingon,

21“Panglakaw kamo, pakisayod sa Ginoo alang kanako ug kanila nga nahibilin sa Israel ug sa Juda, mahitungod sa mga pulong sa basahon nga nakit-an kay dako ang kapungot sa Ginoo nga gibubo kanato, tungod kay ang atong mga katigulangan wala magtuman sa pulong sa Ginoo, sa pagbuhat sumala sa tanan nga nasulat niining basahona.”

22Busa si Hilkias, ug kadtong gisugo sa hari, miadto kang Hulda nga propeta nga asawa sa tinugyanan sa mga bisti nga si Sallum nga anak ni Tokhat, anak nga lalaki ni Hasra. Si Hulda nagpuyo sa Jerusalem sa ikaduhang puluy-anan, ug sila nakigsulti kaniya mahitungod niining nahitabo.

23Siya miingon kanila, “Kini mao ang gisulti sa Ginoo, ang Dios sa Israel, ‘Sultihi ang tawo nga nagpadala kaninyo nganhi kanako,

24Kini mao ang giingon sa Ginoo: Magpadala ako ug kadaotan niining dapita ug sa ibabaw sa mga nagpuyo niini, ang tanang mga tunglo nga nasulat sa basahon nga ilang nabasa sa atubangan sa hari sa Juda.

25Tungod kay sila mibiya kanako ug nagsunog ug insenso ngadto sa laing mga dios, aron paghagit kanako sa pagkasuko pinaagi sa tanang mga buhat sa ilang mga kamot, busa ang akong kasuko ibubo niining dapita ug kini dili mapalong.

26Apan ngadto sa hari sa Juda nga nagsugo kaninyo sa pagpakisayod sa Ginoo, kini mao ang isulti ninyo kaniya: Kini mao ang gisulti sa Ginoo, ang Dios sa Israel: Mahitungod sa mga pulong nga imong nadungog,

27tungod kay ang imong kasingkasing mahinulsolon ug ikaw nagpaubos sa imong kaugalingon sa atubangan sa Dios sa diha nga nakadungog ikaw sa iyang mga pulong batok niining dapita ug batok sa mga nagpuyo niini ug nagpaubos ikaw sa imong kaugalingon sa akong atubangan, ug naggisi sa imong mga bisti ug mihilak sa akong atubangan, ako usab namati kanimo, miingon ang Ginoo.

28Tan-awa, itipon ikaw ngadto sa imong katigulangan ug ikaw ibutang ngadto sa imong lubnganan nga malinawon ug ang imong mga mata dili makakita sa tanang kadaotan nga akong ipadala niining dapita ug sa mga nagpuyo niini.’ ” Ug sila nagdala pagbalik ug mensahe ngadto sa hari.

29Unya ang hari nagpaadto ug gitigom ang tanang mga kadagkoan sa Juda ug sa Jerusalem.

30Ug ang hari miadto sa balay sa Ginoo uban ang tanang mga tawo sa Juda ug ang mga nagpuyo sa Jerusalem, ug ang mga pari ug ang mga Levihanon, ang tanang katawhan, dagko ug gagmay, ug iyang gibasa sa ilang pangdungog ang tanang mga pulong sa basahon sa kasabotan nga nakit-an didto sa balay sa Ginoo.

31Ug ang hari mitindog sa iyang dapit ug naghimo ug sa usa ka kasabotan sa atubangan sa Ginoo, sa paglakaw sunod sa Ginoo ug sa pagtuman sa iyang mga sugo, ug sa iyang mga pagpamatuod ug sa iyang mga lagda, uban sa tibuok niyang kasingkasing, ug sa tibuok niyang kalag, sa pagbuhat sa mga pulong sa kasabotan nga nasulat niining basahona.

32Unya iyang gipasaad ang tanan nga didto sa Jerusalem ug sa Benjamin; ug ang mga nagpuyo sa Jerusalem nagbuhat sumala sa kasabotan sa Dios, ang Dios sa ilang mga katigulangan.

33Gikuha ni Josias ang tanan nga mga dulumtanan gikan sa tanang mga kayutaan nga ila sa katawhan sa Israel, ug ang tanan nga didto sa Israel gipaalagad sa Ginoo nga ilang Dios. Sa tanan niyang mga adlaw sila wala mobulag gikan sa pagsunod sa Ginoo, ang Dios sa ilang mga katigulangan.

← Chapter 33 Chapter 35 →