2 Chronicles 14

cebuano-2011

1Busa si Abias mipahulay uban sa iyang mga katigulangan ug ilang gilubong siya didto sa siyudad ni David ug si Asa nga iyang anak mao ang naghari puli kaniya. Sa iyang mga adlaw ang yuta malinawon sulod sa napulo ka tuig.

2Gihimo ni Asa ang maayo ug matarong diha sa mga mata sa Ginoo nga iyang Dios.

3Iyang gikuha ang mga halaran sa mga langyaw ug ang mga habog nga dapit ug gigun-ob ang mga haligi ug giputol ang mga Asera.

4Gisugo niya ang Juda sa pagpangita sa Ginoo, ang Dios sa ilang mga katigulangan, ug sa pagtuman sa balaod ug sa sugo.

5Iya usab nga gipanguha gikan sa tanang mga siyudad sa Juda ang mga habog nga dapit ug ang mga halaran sa insenso. Ug ang gingharian malinawon ilalom kaniya.

6Siya nagtukod ug mga kinutaang siyudad sa Juda kay ang yuta malinawon ug kini walay gubat niadtong mga tuiga tungod kay ang Ginoo naghatag kaniya ug kalinaw.

7Siya miingon sa Juda, “Atong tukoron kining mga siyudara ug palibotan nato kini ug mga paril, mga tore, mga ganghaan ug mga trangka. Ang yuta atoa pa gihapon kay atong gipangita ang Ginoo nga atong Dios; gipangita siya nato ug siya naghatag kanato ug pahulay sa tanang dapit.” Busa nagtukod sila ug miuswag.

8Si Asa may 300,000 ka sundalo gikan sa Juda nga sangkap sa mga taming ug mga bangkaw ug 280,000 gikan sa Benjamin nga nagdala ug mga taming ug naggamit ug pana; kining tanan mga bantogang tawo sa kaisog.

9Unya si Zera nga Etiopianhon migula batok kanila uban sa usa ka milyon ka sundalo ug tulo ka gatos ka karwahi ug miadto hangtod sa Maresa.

10Unya si Asa migula aron sa pagsugat kaniya ug sila nagpahimutang sa ilang han-ay alang sa gubat diha sa walog sa Zefata didto sa Maresa.

11Ug si Asa mituaw sa Ginoo nga iyang Dios, “O Ginoo walay sama kanimo nga motabang taliwala sa gamhanan ug sa huyang. Tabangi kami, O Ginoo nga among Dios, kay kami nagsalig kanimo, ug diha sa imong ngalan kami mianhi batok niining panon. O Ginoo, ikaw ang among Dios; ayaw itugot nga ang tawo mopatigbabaw batok kanimo.”

12Busa gibuntog sa Ginoo ang mga Etiopianhon sa atubangan ni Asa ug sa atubangan sa Juda, ug ang mga Etiopianhon nanagan.

13Gigukod sila ni Asa ug sa mga tawo nga uban kaniya hangtod sa Gerar, ug ang mga Etiopianhon nangapukan hangtod nga walay nahibiling buhi kay sila gilaglag sa atubangan sa Ginoo ug sa iyang mga sundalo. Ang katawhan sa Juda nakadala ug daghan kaayong mga inilog.

14Unya ilang gilaglag ang tanang mga siyudad nga naglibot sa Gerar kay ang pagkahadlok sa Ginoo miabot kanila. Ilang gipanguhaan ang tanang mga siyudad kay may daghang sinakmit diha kanila.

15Ilang gisulong usab ang mga tolda sa adunay mga kahayopan ug gidala ang daghan kaayong karnero ug mga kamilyo. Unya mibalik sila ngadto sa Jerusalem.

← Chapter 13 Chapter 15 →