1 John 1

cebuano-2011

1Kadto nga diha na sukad pa sa sinugdan nga among nadungog, among nakita pinaagi sa among mga mata, among nasud-ong ug nahikap pinaagi sa among mga kamot, mahitungod sa pulong sa kinabuhi—

2ang kinabuhi gipadayag ug kami nakakita niini ug nagpamatuod niini ug nagsangyaw kaninyo sa kinabuhing dayon nga diha kauban sa Amahan ug nga gipadayag kanamo—

3unsay among nakita ug nadungog among gisangyaw kaninyo, aron kamo usab makabaton sa pakig-ambitay uban kanamo; ug ang atong pakig-ambitay uban sa Amahan ug sa iyang Anak nga si Jesu-Cristo.

4Ug kini gisulat namo aron mahingpit ang among kalipay.

5Kini mao ang mensahe nga among nadungog gikan kaniya ug among gisangyaw kaninyo nga ang Dios kahayag ug diha kaniya wala gayoy kangitngit.

6Kon kita mag-ingon nga may pakig-ambitay kita uban kaniya apan naglakaw kita diha sa kangitngit, namakak kita ug wala magsubay sa kamatuoran.

7Apan kon kita naglakaw diha sa kahayag, ingon nga siya anaa sa kahayag, kita may pakig-ambitay sa usa ug usa, ug ang dugo ni Jesus nga iyang Anak naghinlo kanato gikan sa tanang sala.

8Kon kita mag-ingon nga wala kitay sala, gilimbongan nato ang atong kaugalingon ug wala kanato ang kamatuoran.

9Kon isugid nato ang atong mga sala, siya kasaligan ug matarong nga mopasaylo kanato sa atong mga sala ug maghinlo kanato gikan sa tanang pagkadili matarong.

10Kon kita mag-ingon nga wala kita makasala, siya atong gihimong bakakon ug wala kanato ang iyang pulong.