Leviticus 17

cebuano-1999

1Ang Ginoo miingon kang Moises,

2“Sultihi si Aaron ug ang iyang mga anak ug ang tanang mga Israelita nga mao kini ang akong sugo kanila:

3bisan kinsa kanila nga mag-ihaw ug baka o karnero o kanding sa sulod o sa gawas sa kampo

4ug dili niya kini dad-on ngadto sa pultahan sa Tolda nga Tagboanan aron ihalad kini ingon nga gasa sa Ginoo atubangan sa Tolda nga Tagboanan nakasupak siya sa Balaod gumikan sa iyang pagpaagas ug dugo. Tungod niini, hinginlan siya gikan sa katawhan sa Dios.

5Gihimo kini aron nga dad-on sa mga Israelita ngadto sa Ginoo ang ilang mga giihaw nga ilang gihalad sa gawas sa kampo. Ihatag nila kini sa pari didto sa pultahan sa Tolda nga Tagboanan ug ihawon nila ingon nga mga halad sa pakigdait alang sa Ginoo.

6Ang dugo isablig sa pari ngadto sa halaran sa Ginoo didto sa pultahan sa Tolda nga Tagboanan ug sunogon niya ang tambok ingon nga humot nga halad alang sa Ginoo.

7Sa ingon niini, dili na sila magdala sa ilang mga halad ngadto sa mga demonyong kanding nga ilang gisimba sa walay kukaulaw. Tulomanon nila kini sa tanang panahon nga umaabot.

8“Busa sultihi sila nga bisan kinsa sa mga Israelita o langyaw nga nagpuyo tipon kanila nga maghalad ug halad nga sunogon

9nga dili niya dad-on sa pultahan sa Tolda nga Tagboanan aron ihalad kini sa Ginoo, hinginlan siya gikan sa katawhan sa Dios.

10“Ug kon may Israelita o langyaw nga nagpuyo tipon kanila nga mokaon ug bisan unsa nga dugo, makigbatok ako kaniya ug hinginlan ko siya gikan sa katawhan sa Dios.

11Kay ang kinabuhi anaa sa dugo ug gihatag ko kini kaninyo aron gamiton sa pagpapas sa sala alang sa inyong kinabuhi diha sa halaran kay ang dugo man, ingon nga tinubdan sa kinabuhi, ang makapapas sa sala.

12Kini ang hinungdan ngano nga gisultihan ko ang mga Israelita nga walay bisan kinsa kanila o sa mga langyaw nga nagpuyo tipon kanila nga mokaon ug dugo.

13“Ug bisan kinsa nga Israelita o dumuduong nga nagpuyo tipon kanila mangayam ug makakuhag mananap o langgam nga makaon, kinahanglang paagason niya ang dugo niini ug tabonag yuta ang dugo.

14Tungod kay anaa man sa dugo ang kinabuhi sa tanang binuhat busa gidid-an ko ang mga Israelita sa pagkaon sa dugo sa bisan unsang mananap. Ang mokaon ug dugo isipon nga dili na sakop sa akong katawhan.

15“Bisan kinsang tawhana, lumad o langyaw nga mokaon sa mananap nga namatayg iya ra o gipatay ba hinuon sa mga ihalas nga mananap, kinahanglang labhan niya ang iyang sapot ug maligo siya. Magpabilin siyang hugaw hangtod sa gabii. Human niini, mahinlo na usab siya.

16Apan kon dili niya labhan ang iyang sapot ug dili siya maligo, mag-antos siya sa sangpotanan.”

← Chapter 16 Chapter 18 →