Revelation 7

Baoule Bible 1996 (Kuo :Dele')

1:Yee': yeh eh 'wluh-a 'o,: yee' 'on 'ye 'enjor-nyor⧾: nyieh, mo-:: nyna dih 'de 'bluhba-a' 'for⧾: ne-a: nyieh bo, 'de on kan 'bluhba-a' 'for⧾: ne-a: nyieh: pobor'-a 'wluh-dih-a bo 'i, 'de: pobor' 'ye 'noror 'bluhba ken-a' yi-a' 'bor,: korn 'de yobo' ken-: 'dekorn: tu⧾-a' 'yi: bla-eh-:.

2:Yee' 'on 'ye 'enjor:: noror', or-: 'wluh-dih: 'de 'yluh-a' 'kwla 'wluh-dih: 'da, 'de or 'ble 'kmo: ne-Nyorsoa-a' deh or 'dhu-dih-a nyor⧾ yubo-da 'de or 'kwa. 'De or wele: 'enjor-nyor⧾: nyieh: dao',: on 'kpih 'nyi-eh: on 'ye-a 'bluhba-: 'dekorn: yobo'-: 'kor-dih:.

3Or 'dae:, A-a' 'kor-dih:-' 'bluhba-: yobo'-: 'dekorn: tu⧾-: kele'a: o,: a 'ye Nyorsoa-a' 'bhoi-nynuu yubo-da 'dhu 'do an-a' 'yuba-sehn 'i o.

4'De on zela: 'on: gwluhuh', on 'da, nyor⧾: on: korn-a 'yuba-sehn 'i 'dhu-eh yubo-da, on no nyor⧾-a' 'wlu-a': kehehn': due' 'wlu-a': kwlaa: nyieh 'wlu: nyieh (144,000), on 'wluh 'de 'Ezlea 'di-a' 'dlu⧾-a' klehkpeh 'nyne-'.

5Nyor⧾-a' 'wlu-a': bhue: 'yor 'sororn', mo-: 'wluh 'de 'Juda 'di 'nyne-', mo-: 'dhu-eh yubo-da. 'Wlu-a': bhue: 'yor 'sororn', mo-: 'wluh 'de: Wluben' 'di 'nyne-'. 'Wlu-a': bhue: 'yor 'sororn', mo-: 'wluh 'de 'Gaeh 'di 'nyne-'.

6'De 'wlu-a': bhue: 'yor 'sororn', mo-: 'wluh 'de 'Aseh 'di 'nyne-'. 'Wlu-a': bhue: 'yor 'sororn', mo-: 'wluh 'de 'Natali 'di 'nyne-'. 'Wlu-a': bhue: 'yor 'sororn', mo-: 'wluh 'de: Mana'sa 'di 'nyne-'.

7'De 'wlu-a': bhue: 'yor 'sororn', mo-: 'wluh 'de 'Simior 'di 'nyne-'. 'Wlu-a': bhue: 'yor 'sororn', mo-: 'wluh 'de 'Livae 'di 'nyne-'. 'Wlu-a': bhue: 'yor 'sororn', mo-: 'wluh 'de 'Esaka 'di 'nyne-'.

8'De 'wlu-a': bhue: 'yor 'sororn', mo-: 'wluh 'de 'Zehbilor 'di 'nyne-'. 'Wlu-a': bhue: 'yor 'sororn', mo-: 'wluh 'de 'Joseh 'di 'nyne-'. 'De 'wlu-a': bhue: 'yor 'sororn', mo-: 'wluh 'de 'Behnjemeh 'di 'nyne-'. 'De an-a' klehkpeh: daa, on 'dhu-eh: yubo-da.

9:Yee': yeh deh⧾: daa, en no: ao', 'de en zi-a, 'de 'an pobo-a 'de: neheh',: yee' 'on 'ye: gwlor-nyor:⧾: doru' nyor⧾ se-a zlo-a' 'beh-dih:,: on 'wluh-a 'bluhba⧾-dlu⧾ ken dih-:: bai' 'di dih-: 'dawor'⧾-dlu⧾-: 'dekorn: wlu⧾ 'doror: 'dor: po-nyor⧾-: an-a' klehkpeh, mo-:: nyna 'o 'keen: kpala': dao'-: 'dekorn: 'Blae'-yu:: dao'-: ybei' dih. 'De on pa: gba 'vuu:⧾-plu⧾-', 'de on 'gba yuh⧾-wlon⧾ kwa.

10'De an po 'geh⧾, an no,: A-a' Nyorsoa: or: dhe-a dih 'do 'keen: kpala' ken-: 'dekorn: 'Blae'-yu-: on 'puh-dih:: a 'weh.

11'De 'enjor-nyor⧾-a' klehkpeh, on: nyna 'keen: kpala': dao'-: nyor⧾: klaba'⧾: dao'-: 'dekorn: 'kmo: ne-deh⧾: nyieh: dao'-: 'de dih. 'De on 'jli dih 'do: kpala': dao' ybei', 'de an za Nyorsoa-a': weheh',

12an no, 'Ka-: eh 'ye: ne. 'Nyne ya: po-eh-: dhih-a' 'i 'beh-a'-:: toror'-: 'zio: po-eh-: ya: dhe-eh-: 'kpih-: 'dekorn: 'kpih ken: ne-eh-: 'do: a-a' Nyorsoa bo: ka ti-a mu-a 'dlu-': tehn klehkpeh klehkpeh. 'Ka-: eh 'ye: ne.

13:Yee' nyor⧾: klaba'⧾: dao', an-a' nyor: due' dhele: 'on-: dih, or 'da, Deh 'i-deh-nyor:⧾ 'o: on: dhe dih,: on pa: gba 'vuu:⧾-plu⧾-': eh? 'De mor, dha on 'wluh: eh?

14'De 'on: wlu 'de or bo, 'on 'da, Nyor: Klaba',: mor yubo-eh. 'De or 'da, Nyor⧾: on: yi-dih:-a 'de 'kle 'ye-eh: 'kawehn 'di, mo-: 'o: on: dhe dih. 'Blae'-yu:: daa, or-:: korn nyomor on no, 'de on worlor: an-a'a:: gba 'vuu:⧾: dao', 'de en: ne 'pu-'.

15Eh-:: korn dhih on: nyna 'o Nyorsoa-a' 'keen: kpala' ybei' dih, 'de an no or-a' 'bhoi-nynuu-deh 'gwie-:: glaa'e-: 'de or-a' 'sla 'zorn.: Yee' 'yu: or: dhe-a 'keen: kpala': dao' ken, or mu-uh 'yli-eh bo 'dhu-:, deh: se-uh': no i.

16'Moeh:: se-uh': no i: neheh'. 'Ni 'na-ton:: se-uh': no i: neheh'. 'De mor 'yluh-:: eh beh 'yluh-a': fuun'-: en-' deh-beh: se-uh': no i: neheh'.

17Deh no-eh, 'Blae'-yu:: or: ne-a 'de 'keen: kpala': dao' 'bhun, or-: mu an-a' 'blae'⧾-a' 'yli-eh bo 'dhu-nyor: no. Or-: mu-uh son bo: na-dih:, 'de on 'ye 'ni: eh 'nyi-a nyor⧾ 'kmo: sie:: febeh' ken: yeh-dih:.: Yee' Nyorsoa-a mu-uh 'mii-tehn-a' klehkpeh 'yi dih 'slan-:.

← Chapter 6 Chapter 8 →