Mark 9 — Baoule Bible 1996 (Kuo :Dele')

1'De: Yusu' 'dae:: neheh', Dhih 'jeh, 'an zela a: gwluhuh', nyor⧾: noo', mo-:: nyna dih dha: a 'nyne-', mo-:: se-' 'meh-: i, 'de on 'ye Nyorsoa-a' nyor⧾ wlu 'ken: korn-eh 'ye, eh 'ye 'de yi, 'de 'kpih 'di.

2:Yee': yeh 'we: meheh'lo zi-a,: yee': Yusu' 'duo:: Piteh'-: 'Jeen-: 'dekorn:: Jororn'-: 'weh, 'de or kpa-uh 'de tluh: dhorno' ken, on 'ye kpor chehn.: Yeh an pobo-a 'o,: yee' or-a' yau: za-dih:-',

3'de 'tiei: or pa-a-', en: za-dih:: ke, 'de en fan, en: ne: bhoror:. Eh se nyor: korn dha yao 'zorn: or 'ye-eh' no, 'de paa-tiei 'ye: ao': bhoror:: ne-eh no.

4:Yee' on 'ye: Ila'yor-: 'dekorn:: Mose'-: mo-:: an wlu 'de or bo.

5'De: Piteh': wlu 'de or bo, or 'dae:, Nyor⧾ deh: torne-nyor:, eh: nmor-: 'yi, 'de: a: ne: daa. A 'nyi,: a po gbe: dhe dih: gbalie⧾ taan,: due' 'do: on bo,: due' 'do: Mose' bo,: due' 'do: Ila'yor bo.

6:Fano-a: no: Piteh'-: 'dekorn: or 'bei'-: 'gabaa. Eh-: no-eh 'de deh or 'ye-a': za, 'de or se-eh yubo:.

7:Yeh on: ne-a 'o,: yee' yao-pli:, me-: 'jli-uh 'dlu. 'De wlu 'wluh 'de yao-pli:: dao' 'di, on 'da, 'An-a:: dhih: kma-yu: 'o, or-:: dhe dih. A: to or-a' wlu: dou'⧾ bo.

8:Yee' 'yli: a bla-a 'i,: yeh on 'ye-a' dih pobo:,: yee' on: se-' nyor: noror' 'ye 'do on bo: neheh'. Jorwor:: Yusu': due', or-:: ne 'o.

9:Yeh an 'dhle-a tluh,: yee' or dhe-uh 'tele' 'i deh on 'ye-a, on: ne-eh' nyor-beh: gwluhuh' zela: kele'a:.: Mor 'yu an 'da-dih-a Nyor-kpalu-a' 'yu 'meh, 'de or 'ye 'de nma-dih-deh 'di 'wluh, 'de on 'ye-eh' nyor⧾: gwluhuh' zela:.

10:Yee' on 'ye: Yusu'-a' wlu-' deh, on: se-' nyor⧾: gwluhuh' zela:,: yee' an bla or-a' 'meh: sorn-' deh-a': manua:. An dhele an-a' 'jeh dih, an no, Deh 'meh: sorn-' deh 'dhu-eh:-': eh?

11'De on dhele-or dih, on 'da,: Eh: korn dhih 'de nyor⧾ 'tele': torne-nyor⧾ 'da: Ila'yor:, or-:: korn: or 'ye 'de yi: zai': eh?

12'De or zela-uh: gwluhuh', or 'da,: Ila'yor: korn or 'ye 'de yi: zai', 'de or 'ye deh⧾-a' klehkpeh 'kpa po.: Yee' eh: se-' 'chle-eh: 'de Nyorsoa-a' 'chlee-deh 'di ke: e,: ka 'yu an 'da-dih-a Nyor-kpalu-a' 'yu: korn or 'ye-a' deh⧾: dhulu'-a' 'kle 'ye, 'de on: se-a' or-a' dhih 'worn-dih: i: e?

13Jorwor: 'nyi 'on zela: a: gwluhuh',: Ila'yor 'yle: weh, 'de deh an 'bhorn-a on 'ye-or': no-dih:, 'de on: no-dih-eh or,: ka eh no-a 'chle-eh 'do or 'bhun.

14:Yee': Yusu'-: 'dekorn: or-a'a: bo: na-nyor⧾-a' nyor⧾ taan: dao'-: on: yeh-dih: on 'bei': dao' ken. 'De on 'ye nyor⧾: doru', mo-: 'gbo-dih-uh 'dlu dih. 'De nyor⧾ 'tele': torne-nyor:⧾: noo'-: 'dekorn: or-a'a: bo: na-nyor:⧾: noo'-: mo-:: an 'yea wlu⧾ ken dih.

15:Yeh nyor⧾: dhulu': dao', on 'ye-a: Yusu',: yee' eh 'ma-dih: 'de on 'di-: dih 'gabaa, 'de 'do: dha: due': dao', an ple, an 'ya-dih-or 'i, an gble-dih-or.

16'De or dhele-uh dih, or 'da,: Eh: korn dhih, on: ne a 'yea wlu⧾ ken dih: eh?

17:Yee' 'yu: due', or-:: ne 'de on 'klu-', or-:: wlu 'de or bo, or 'dae:, Nyor⧾ deh: torne-nyor:, 'noror: on bo, 'noror 'on: ya 'an-a: nyor-kpalu-yu, or-: 'kwla 'ye-dih-deh: ne 'o 'de, 'de eh no-eh, or-a': wlu.

18:Mor eh 'kpa-or ken,: yee' eh du-or' 'do 'bluhbor, 'de: feon-a bor 'o or worn 'i, or di-dih 'nyne 'i, 'de or 'sleh-dih-'. 'On dhele:: an-a'a: bo: na-nyor⧾ dih 'weh, on 'ye-eh' 'o or 'de: za. Jorwor: on se eh-a' no-a' 'beh-dih:.

19'De: Yusu': wlu 'de on bo, or 'dae:, A: mor: kana-nyor:⧾: daa: or se-a dhih 'jeh-': po-eh 'ble, ti dhie 'on 'ye dha a bo no: eh?: Kaa 'on 'ye: porluh-a' 'yi 'dba-eh no 'do a bo: eh? A: ya 'de 'yu: daa 'noror 'on bo.

20'De on kpa-or 'de or bo.: Yeh 'kwla 'ye-dih-deh 'ye-a: Yusu',: yee' 'yli: a bla-a 'i, eh no-eh', 'de or vorn. 'De eh 'ga-or dih, or klibo 'do 'bluhbor, 'de: feon-a 'wluh 'de or 'worn.

21'De: Yusu' dhele: 'yu: baa' dih, or 'da, Deh: daa eh 'kpa-a 'o or 'bhun, eh-a' ti dhie: eh? 'De or: baa' 'da, Or za-eh 'yu-yu-bla:.

22:Yee' 'do ti: dhulu' 'di, eh po-or 'de 'yli-: 'dekorn: 'nior-: eh 'ye-or' 'dba. Jorwor:: mor: on 'beh-dih:: on 'ye deh no, 'do deh: daa eh-a' dha,: yee' 'ye: a-a': wehlih,: za-dih:: a-uh'.

23'De: Yusu' 'da,: On 'da: mor 'on 'beh-dih-eh: e? Nyor: or 'ble-a dhih 'jeh-': po-eh,: yee' deh⧾-a' klehkpeh 'beh-dih: en 'ye: no-eh: 'do or bo.

24:Yeh or 'da: ao',: yee' 'yu: baa' 'dhobo:, or 'wor-', or 'dae:, 'On 'ble dhih 'jeh-': po-eh 'weh, jorwor: eh se 'i: dhie:.: On: korn 'gen, po-eh ken.

25:Yeh: Yusu' 'ye-a nyor⧾: dhulu' an ya-a 'de ple-a' 'de or bo, 'de or 'nyi 'kwla 'ye-dih-deh 'tele', or: wlu 'de eh bo, or 'dae:,: Mor 'kwla 'ye-dih-deh:: daa,: or 'sun-dih-a nyor⧾, 'de: or no-eh 'de nyor⧾-a': wlu-a', 'an kpa-dih: on 'kpih, 'wluh 'o 'yu: daa 'de,: an-a': zi 'o or 'de: neheh' o.

26:Yeh or: wlu-a 'de 'kwla 'ye-dih-deh:: dao' bo,: yee' eh: po-dih: 'yu: dao' 'geh, eh no-eh 'de or vorn 'gabaa, 'de eh mu 'o or 'de 'wluh-:.: Yeh eh no: ao',: yee' 'yu gweh: ka nyor 'meh-a.: Yee' nyor⧾: ne-a 'o, an-a': dha: dhulu' 'da, Or 'meh-'.

27Jorwor:: Yusu' kpon or-a' son-: dih, 'de or 'duo-or ya-', 'de or: sorn-', or: nyna dih.

28'De: Yusu' pa 'de 'gbu. 'Do: wor or-a'a: bo: na-nyor⧾ dhele-or dih, 'de 'slan: pa ka 'di, on 'dae:,: Eh: korn dhih 'de: a se 'kpih 'ble 'do 'yu: dao' or-a' 'kwla 'ye-dih-deh 'de: za-eh bo: eh?

29'De or zela-uh: gwluhuh', or 'dae:, Nyorsoa bo: wlu-eh-: ['dekorn: 'suehn-': pa-eh-:] en: due', me-: 'beh-dih:: en 'ye nyor⧾ 'kwla 'ye-dih-deh⧾-a': yih: dao' nyor⧾ 'de: za.

30:Yee': Yusu'-: 'dekorn: or-a'a: bo: na-nyor⧾-: on 'wluh 'o: dha on: ne-a 'weh, 'de on mu, on chehn 'o: Galali'i-bluhba ken: dhie'. Or: se-' 'bhorn: dha on: ne-a, nyor⧾ 'ye 'o yubo:,

31deh no-eh, or torne or-a'a: bo: na-nyor⧾ deh, or 'da, An mu 'yu an 'da-dih-a Nyor-kpalu-a' 'yu: plo 'de: gwlor-nyor⧾ bo. An mu-or 'dba-:.: Yee': mor 'we taan zi,: yee' or mu-': sorn.

32Jorwor: deh: daa or: za-a-', on: se-eh' dih 'worn. 'De mor: fano-a: no-uh, on 'ye-or' dih dhele:.

33:Yee': yeh on 'wluh-a 'o: dha 'o,: yee' on mu 'de: gwlor an 'da-dih-a: Kapa'nior 'di.: Yeh on pa-a 'de 'gbu: Yusu': ko-dih:-a 'di,: yee' or dhele: or-a'a: bo: na-nyor⧾-: dih, or 'dae:, Deh 'i-deh:: dhih 'o, a dhobo-' 'do: gwie 'i 'tior': eh?

34Jorwor: on: se-' deh-': za, deh no-eh, ti an yi-a 'de 'do: gwie 'i,: yee' nyor: or 'dhu-a nyor: klaba'-' 'do an-a' klehkpeh 'dlu, eh-:: korn dhih an dhobo-'.

35'De or: dhe dih, or 'da or-a'a: bo: na-nyor⧾-a': bhue: 'yor 'sororn': dao', 'do or bo, 'de or: wlu 'de on bo, or 'dae:, Nyor: or 'bhorn-a: or 'ye-a' nyor: klaba' no,: yee' 'nyi or: ya or-a' 'jeh ya, or 'ye 'bhoi-yu no 'do a-a' klehkpeh bo.

36:Yee' or 'duo: 'yu-yu-beh: due'-' 'weh. 'De or dhe-or dih 'do an-a' gwea. 'De or 'duo-or ya-', or 'dhu-or: gwlii'.: Yeh or no: ao',: yee' or: wlu-' 'de on bo, or 'da,

37Nyor: or kpon-a 'yu-yu dih, 'de 'an 'nyne 'di,: ka: yor: daa or: ne-a,: yee' nyor: dao', 'mor-: 'o or kpon dih.: Yee' nyor: or kpon-a 'on dih,: yee' eh: se 'on: due' or: se-' dih kpon. Jorwor: nyor: or dbo-a 'on, or-: 'o or kpon dih: ke.

38:Yee': Jororn': wlu-' 'de: Yusu' bo, or 'dae:, Nyor⧾ deh: torne-nyor:,: a 'ye 'yu: due', or-: za nyor⧾ 'kwla 'ye-dih-deh⧾ 'de, 'de: an-a' 'nyne 'di. 'De: a zela-or: gwluhuh' or 'ye 'bor, deh no-eh, or: se 'noror: a 'nyne-' 'wluh.

39'De: Yusu' 'dae: 'de or bo, A 'bor or-a' 'borboa' 'i: po-eh. Deh no-eh, nyor: or no-a deh: kolu' 'de 'an 'nyne 'di, or se 'beh-dih: or 'ye 'on deh⧾-zon⧾ 'bhun dih-': za-dih: 'de ybei'.

40Deh no-eh, nyor: or se-a: a bo vorn,: yee' or: ne 'noror: a-a' 'for bo.

41Dhih 'jeh, 'an zela a: gwluhuh', nyor-beh:: or 'nyi-a a 'ni-korbuh a 'ye-a' 'na, 'de 'an 'nyne 'di,: ka a na-a 'on 'de, eh-a' dhih,: yee' nyor: dao', or mu eh-a' geli': za-dih-deh 'ye-:: gbor: gbor.

42:Yee' nyor-beh-nyor-beh:: or mu-eh: no, 'de 'nynuu:: nyene': daa: on po-a 'an dhih dhih 'jeh-', on 'ye-a' 'o: gwie: 'jeh 'i 'wluh, 'de on 'ye-a': gwie-zon kpa,: yee' eh mu 'yi dih: nmor 'do nyor: dao' bo, sobu': klaba' 'ye 'o or: gwlii': san-dih-eh:, 'de or 'ye 'o yobo' worn: po-eh:.

43:Yee': mor eh 'dhu,: an-a' son no-eh, 'de: on 'ye deh-zon no,: yee' chehn-uh 'o. Eh: nmor-: 'yi: on 'ye: nea:, 'de: on 'ye 'de Nyorsoa 'bli yai' mu,: eh: zi 'o 'ble son⧾ 'sororn', 'de mu 'de 'ku 'bli, 'do: dha neh: eh se-a 'mo-a': korn, eh: ne-a, [

44:dha: samu'⧾: en di-a nyor⧾-a' yau,: en-' 'meh-a, en: ne-a, 'de neh: eh: ne-a 'de, eh-a' 'mo-a.]

45:Mor: an-a' buh no-eh 'de: on 'ye deh-zon no,: yee' chehn-uh 'o. Eh: nmor-: 'yi: on 'ye: nea:, 'de: on 'ye 'de Nyorsoa 'bli yai' mu,: eh: zi 'o 'ble buh⧾ 'sororn', 'de: on 'ye 'de 'ku 'bli: po-eh:, [

46:dha: samu'⧾: en di-a nyor⧾-a' yau,: en-' 'meh-a, en: ne-a, 'de neh: eh: ne-a 'de, eh-a' 'mo-a.]

47'De: mor: an-a' 'yli-eh no-eh 'de: on 'ye deh-zon no,: yee' za-eh 'de. Eh: nmor-: 'yi: on 'ye 'yli-eh: due' 'ble, 'de: on 'ye 'de Nyorsoa-a' nyor⧾ wlu 'ken: korn-eh 'zorn pa,: eh: zi 'o: on 'ye 'yli 'sororn' 'ble, 'de: on 'ye 'de 'ku 'bli: po-eh:,

48:dha: samu'⧾: en di-a nyor⧾-a' yau,: en-' 'meh-a, en: ne-a, 'de neh: eh: ne-a 'de, eh-a' 'mo-a.

49Nyor⧾-a' klehkpeh, neh-a mu-uh 'dlu 'wla-:: ka 'torn-a 'wla-a 'de 'soma' bo.

50'Torn: nmor-: 'yi. Jorwor:: mor or: gweh worn,: yee': eh mu-or 'torn-': no: neheh': eh? A: ne 'torn-worn 'do a-a' 'jeh bo, a-a': gweh-' worn, 'de a 'ye ken dih kpon-dih: 'de a 'nyne-'.