Galatians 5

Baoule Bible 1996 (Kuo :Dele')

1:Yee': ka 'Klae zelie:: a-uh,: yee': a zelie-eh:-' deh 'jeh. 'De mor 'nyi a gweh nyor⧾: on zelie-eh: ke. A-a' 'worn-:-' nyor⧾-a': no-eh' 'de a-a': ne-' 'kmo: eh gweh-a: ka 'ge-nynuu 'i: neheh'.

2'Mor: or 'dhu-a: Poror'-', a: to deh 'an yi-a: za 'da: dou'⧾ bo.: Mor eh 'dhu a 'worn-dih-eh ken dih, 'de nyor⧾: noo' 'ye a: bhlororn' 'dba,: yee' 'Klae se deh-' 'dhu-eh: 'do a bo klehkpeh klehkpeh.

3:Yee' 'an zela a: gwluhuh': dele' ka, nyor: or 'worn-dih-eh ken dih, nyor⧾: noo' 'ye a: bhlororn' 'dba,: yee' or: korn or 'ye 'o: Mose'-a' 'tele'⧾-a' klehkpeh dih dhe: dueh'leh:.

4:Yee' a: mor: yuh: an 'bhorn-a: on 'ye-a 'o: Mose'-a' 'tele' dih dhe, 'de Nyorsoa 'ye-a a 'yi 'sleh-nyor⧾ 'da-dih:, a: za 'o a-a' 'jeh 'do 'Klae 'bhun 'weh, 'de a: tehn-dih: Nyorsoa-a' mla bo dih.

5Jorwor:: a: mor: mloror', Nyorsoa-a': Zulu:: za-dih:: a-uh', 'de: a 'beh-dih:: a 'ye 'de ybei' pobo:, 'de: a-a' 'Klae-a' dhih 'jeh-': po-eh 'di, 'de: a dhe-eh: gwlii': ka Nyorsoa-a mu-a: a 'yi 'sleh-nyor⧾ 'da-dih:.

6Deh no-eh,: mor eh 'dhu: a: ne: Yusu' 'Klae-',: yee' 'meh: bhlororn' o, se: bhlororn' 'meh o, en: se-' deh 'da. Jorwor: deh: eh 'dhu-a deh-', eh-: 'dhu,: a-a' 'Klae-a' dhih 'jeh-': po-eh-',: eh no-eh 'de: a: ybeh-a nyor⧾-'.

7A po 'de 'kpih 'weh: dee' 'jeh ka. Jorwor:: or no-eh, 'de a 'bor dhih-a' 'yor-eh-a' 'tele'-a' dih: dhe-eh: eh?

8'On yubo-eh', eh: se Nyorsoa: or 'da a-uh, or: se-eh' no.

9:A 'ble 'dlan, or-:: a po,: a 'da, Deh⧾: en 'vu-dih-a 'bhlee, en-': bhebe'-deh⧾-bei:, me-: 'vu-dih 'bhlee:: kpuan'-a' klehkpeh.

10'On: kpa-dih:: Gwlor: baa': gwluhuh'. Eh-: no-eh, 'de 'on yubo-eh deh 'jeh,: ka a: se-a 'o nyor: noror' wlu klei' 'kpa-: i. Nyor: or 'beh-dih-a a-a' 'dlu⧾ 'worn dih, nyor: yor or mu-a-' 'dhu-eh, Nyorsoa-a mu-or 'kle 'ye-eh 'dlu: po.

11:Yee' 'an 'Klae: de-di'-boi'-a:,: mor eh 'dhu,: ka nyor⧾: noo' 'da-a, on no-a, tubo-wlu:⧾ 'an po-a en 'da, nyor: korn or 'ye: bhlororn' 'meh: gbor: gbor,: yee': eh: korn dhih nyor⧾-a 'ye-dih 'on 'kle 'gboror:: eh?: Yee': mor eh 'dhu, 'on: taa-eh no 'jeh ka,: yee' tubo-wlu:⧾ 'an po-a,: en 'dhu-a, 'Klae 'meh-' 'do tu 'i, en: se 'de: zaa'za: ya i: dee'.

12Jorwor:: yuh: dao': an 'beh-dih-a a 'worn dih,: mor 'on: ne: due',: yee' on kpa-eh 'dlu bo, on 'ye an-a' 'jeh gbor-' dih 'dba.

13:Yee' 'an 'Klae: de-di'-boi'-a:, a: mor: mloror', Nyorsoa 'da a 'weh, a 'ye 'de 'gegeye 'wluh.: Yee': ka a 'wluh-a 'de 'gegeye: naa,: yee' a-a': yi-dih-eh:-' 'i, 'de a-a' no deh⧾-zon:⧾ a-a': gwlor-nyor-tu-a 'bhorn-a. Jorwor: a no a 'bei'-a' 'bhoi-nynuu, 'de: ybeh-dih: ka 'di.

14Deh no-eh,: Mose'-a' 'tele'⧾-a' klehkpeh 'wluh 'noror 'tele': due': daa 'di,: eh 'dhu-a,: Ybeh nyor⧾: on: ne 'ti-a: dha: due'-',: ka: on no-a: an-a' 'jeh-a': ybeh-a'.

15:Yee': mor a: taa-' 'memeh, 'de a 'ye a 'bei' 'kle 'ye-dih:: eh gweh-a 'dle-: ji-:,: yee' a 'dhu-eh: dhororn': mor a se: gwluhuh' dih 'wla, a-a': dha: due' 'kpa-eh mu ya: gba 'tene': kpeen:.

16Deh 'an za-a-', eh-:: dhe dih. A 'nyi Nyorsoa-a': Zulu: korn a-a' 'kmo: ne-eh wlu 'ken.: Yee' deh⧾-zon:⧾ a-a': gwlor-nyor-tu-a 'bhorn-a a 'ye-a' no, a: se-': no i.

17Deh no-eh, deh⧾-zon:⧾ a-a': gwlor-nyor-tu-a 'bhorn-a-: 'dekorn: deh Nyorsoa-a': Zulu-a 'bhorn-a-: en se: gwie: due' kpa. 'De mor wlu-' dih 'worn-eh se 'o en 'nyne bo: ne. Eh-: no-eh, 'de a-a' no deh a 'bhorn-a a 'ye-a' no.

18:Yee': mor eh 'dhu Nyorsoa-a': Zulu: taa a na-dih,: yee' a se 'o: Mose'-a' 'tele' 'zorn: ne.

19Deh⧾-zon:⧾: en 'wluh-a 'de: gwlor-nyor⧾-a' 'bhororn'-deh⧾ bo, nyor⧾ yubo-ih', me-: 'dhu, 'tmeor:⧾: korn-eh-: se: vlehehn'-': gweh-deh⧾-: 'pebe' 'i 'kpa-eh-:

20nyor⧾: an za-a zuu⧾-a': weheh'-:: yuh: on no-a 'gwiorn⧾-: nyor⧾: on 'nyeh-a on 'bei'-: 'dekorn:: yuh: korn-a wlu⧾-a vorn-a 'de an-a' 'jeh 'nyne-:: gwlehehn': korn-nyor⧾-: 'chehn-': gwlii': ne-nyor⧾-: nyor⧾: an zi-a on: due' dhih-:, a: za a-a' 'jeh 'sororn'-: 'de a 'kpuhba: ya dih-:: korn mor 'cheh 'ya 'cheh 'ya-:

21:porluh-a' sin-a' 'do deh⧾-a' klehkpeh bo-: nomor 'na-eh-: 'nynor⧾: zie-dih-eh-a' gor⧾ deh⧾-' dih-: 'dekorn: noo-deh:⧾: nee': en: ne-a: yih: daa en-' goor-dih:-a-:: ke. 'On 'dhu a 'slen 'weh: zai'. Jorwor: 'an za-ih-' de: neheh', nyor⧾: an no-a deh⧾: en: ne: ao', on: se-' Nyorsoa-a' nyor⧾ wlu 'ken: korn-eh 'zorn: pa i.

22Jorwor: Nyorsoa-a': Zulu-a: no-eh, 'de nyor⧾-a ybeh-dih, 'de 'mona 'yi-dih nyor⧾-' dih, 'de on 'ble wlu-' dih 'worn-eh-:: porluh-a' dih: kpon-eh-:: porluh-a' 'yi dih: nmor-eh-: deh⧾ 'jeh: no-eh-: 'dekorn:: dhehehn-nyor⧾-:.

23'De: Zulu:: ne-a: due', an no-eh, 'de nyor⧾-a kpon-eh 'i, 'de an korn an-a' 'jeh wlu 'ken, on: ne-' deh-zon no. Eh se 'tele': korn: eh 'ye deh-zon-': za, 'do deh⧾: daa 'bhun.

24'De mor nyor⧾: on: korn-a 'de: Yusu' 'Klae bo, an-a' 'worn an-a': gwlor-nyor-tu-a' 'bhororn'-deh⧾-zon:⧾: en an 'bhorn-a on 'ye-a' no 'gabaa, en-' korn-uh wlu 'ken: neheh'.

25Nyorsoa-a': Zulu: no-eh, 'de: a: ne 'kmo.: Yee' 'nyi on: korn: a-a' 'kmo: ne-eh wlu 'ken.

26:Yee' a 'bor a-a' 'jeh 'i 'beh-dih-eh, 'de mor a 'bor a 'bei' 'chehn-' dih: po-eh-: 'dekorn: a 'bei': gwlehehn' bo: no-eh-:.

← Chapter 4 Chapter 6 →