Psalms 43

Baoule (NYANMIƐN NDƐ'N 1998)

1Ee, Nyanmiɛn! Di min jɔlɛ mun klanman man min, jran min sin man e nin be bɔ be si-man wɔ'n e kan. De min gblɛfuɛ mun nin ndrunmun difuɛ'm bé sa nun.

2?Wɔ bɔ a ti min Nyanmiɛn'n bɔ wɔ yɛ a sasa min'n, ɔ yo sɛ ti yɛ a yi min blo-ɔ? ?Ɔ yo sɛ ti yɛ ɔ fata kɛ awlaboɛ kun min-ɔn? ?Ɔ yo sɛ ti yɛ min kpɔfuɛ'm be mianmian min sa nin-ɔn?

3Fa ɔ́ kannin'n blɛ min yɛ fa ɔ nanwlɛ'n wla min nun. Man ɔ́ kannin sɔ'n nin ɔ nanwlɛ'n be kle min atin nan n wɔ ɔ oka'n su lɔ, nan n wɔ kan a tran lɔ'n.

4Ee Nyanmiɛn, min Nyanmiɛn, n klun b'ɔ jɔ nin min wun b'ɔ kpaja min'n ti'n, n ´kɔ ɔ sɔwlɛ'n su lɔ, n ´kɔ wɔ sin, nan m ´bo jru m ´manman wɔ.

5?Nguɛ ti yɛ man n wla'n ɔ ko bo min wun-ɔn? ?Nguɛ ti yɛ man n ko fɛfɛ-ɔ? Ɔ fata kɛ n fa mín wla'n n guɛ i Nyanmiɛn'n su, yɛ m mɛnmɛn i, afin ɔ ti min defuɛ, i kunngba'n ɔ ti min Nyanmiɛn.

← Chapter 42 Chapter 44 →