Psalms 137

Baoule (NYANMIƐN NDƐ'N 1998)

1Kɛ e titi Babilɔni nzue ba'm bé nuan lɔ'n, bɔ e nyin kpɛnkpɛn Siɔn su'n, e sunnin.

2E fali e jru mun e satali be nzue ba'n i nuan waka'm bé su.

3Kpɛkuun be nga be trali e ɔli'n be waan e to jue e kle be. E yalɛ klefuɛ'm be waan e to aklunjuɛ jue. Be waan: «An `to Siɔn lɔ jue'n wie kle ye.»

4?E to Anannganman i jue'n mɛn uflɛ nun sɛ bɔ cɛ yɛ ɔ yo ye-ɔ?

5Ee! Zerizalɛm, sɛ mín wla fi wɔ cɛ'n, man mín sa fama'n ɔ wu min wun.

6Zerizalɛm, sɛ mín wla jaso ɔ su'n, sɛ like uflɛ i ndɛ lo min tra wɔ'n, man min taaman'n ɔ mantan min lalolalo nun.

7Anannganman, nán ɔ́ wla fi Edɔmfuɛ'm be su. Kɛ nyrɛnnɛn'n ɔ tɔli Zerizalɛm su'n, be yɛ be seli kɛ: «An `kpu klɔ'n su treketreke, an `kpu su lele to i bo ase wlawlɛ'n.»

8Babilɔni wɔ bɔ a wa bo'n, sa tɛ nga a fa yoli ye'n, sran ng'ɔ ´yi man wɔ'n, i liɛ su ti ye!

9Sran ng'ɔ tra ɔ mma mun'n, b'ɔ wɛtɛ be kpangba'n su'n, i liɛ su ti ye!

← Chapter 136 Chapter 138 →