Isaiah 45

Baoule (NYANMIƐN NDƐ'N 1998)

1Anannganman kan ndɛ kle Siris b'ɔ sieli i ngunmin'n, bɔ i waan ɔ `tia nvle'm be su nan ɔ `de famiɛn'm be tinmin'n mɛn i'n, yɛ ɔ `tike klɔ'm bé wun talɛ'm be anuan mun mɛn i nan nán be nyin be kun'n, ndɛ'n b'ɔ kan'n yɛ:

2«N wa dun mmua ɔ nyrun, n ´yo atin nga b'a saci'n be kpa, n ´saci aaba anuan mun, m ´bubu anuan'm be nun gboklo'm be nun.

3N ´fa ninnge kpakpa bɔ be o asiɛ'n nun'n, m ´man wɔ, n ´fa anyanbeun ninnge bɔ be ti fiawa'n m ´man wɔ kɛ ɔ ´yo nan w'a si kɛ n ti Anannganman, yɛ n ti Izraɛl Nyanmiɛn bɔ n fa ɔ dunman'n yɛ n fa flɛ wɔ'n ti.

4Zakɔb i osu'n nunfuɛ bɔ be ti min sufuɛ'n be dunman nun ti, ɔ nin Izraɛlfuɛ'm bɔ n kplali be'n be dunman nun ti, n fali ɔ dunman'n n flɛli wɔ. N fali junman dan kun n wlali ɔ́ sa nun. I nun sɔ nun'n, wuun a si-man min bɔbɔ.

5Min yɛ n ti Anannganman nin-ɔn, uflɛ fi nun-man min sin kun, sɛ be san min wun'n, be wun-man Nyanmiɛn uflɛ kun. M mannin wɔ tinmin. I nun sɔ nun'n, wuun a si-man min bɔbɔ.

6N yo i sɔ nan kɛ ɔ fɛ i wia afiliɛ lɔ'n b'ɔ fa ´ju wia atɔliɛ lɔ'n, b'a si jrɛiin kɛ sɛ be san mín wun'n, be wun-man like fi kun. N ti Anannganman, Anannganman uflɛ fi nun-man lɛ kun.

7N yi lika b'ɔ kpaja weiin'n, yɛ n yi aosin tuun'n. N yo man sran'm bé wun jɔ be fɔuun, yɛ n kunngba'n n yo man nyrɛnnɛn'n ɔ ba be su. M bɔbɔ min Anannganman, min yɛ n yo ninnge sɔ'm be kwlakwla-a.

8Sɛ bɔlɛ ufue'n ɔ ´fin nyanmiɛn su lɔ ´gua o, sɛ sa kpa'n i yolɛ'n ɔ ´fin nyanmiɛn ble'n nun ɔ ´gua kɛ nzue'n b'ɔ tɔ'n sa o, sɛ asiɛ'n ɔ ´kpaci nan sran'm bé ti nyanlɛ'n ɔ ´bo nyrɛ nun kɛ waka sa o, yɛ sɛ sa kpa'n i yolɛ'n ɔ ´fifi nun kɛ waka mma sa o, min Anannganman, min yɛ n yo sa sɔ'm be kwlakwla-a!»

9Sran ng'ɔ nin sran b'ɔ yili i'n be si akplowa'n, i yako! Ɔ ti kɛ sɛ sa ɔ wo i wiengu sɛ'm be afiɛn! Ufa'n ɔ usa sran ng'ɔ fɛ i wu like'n kɛ: «?Nguɛ yɛlɛ nga a ´yo i lɛ'n?» ?Sɛ'n kusu se i ufuɛ'n kɛ: «A si-man like fi yo ?»

10Sran ng'ɔ se i si kɛ: «?Nzu ti yɛ a wuli min'n?» Annzɛ ɔ se i nin kɛ: «Nzu ti yɛ a wuli min'n?» I sɔfuɛ'n i yako!

11Anannganman b'ɔ ti Izraɛl Nyanmiɛn'n, b'ɔ yili Izraɛlfuɛ mun'n, ɔ usa kɛ: «?Amun waan amun ´usa min sa sa nga be wa ju'n be su? ?Amun waan amun ´kle min like ng'ɔ fata kɛ n yo man min mma mun'n, ɔ nin junman ng'ɔ fata kɛ n yo be'n?

12Min yɛ n yili asiɛ nin-ɔn. Min yɛ n yili i su sran mun-ɔn. Nyanmiɛn'n b'ɔ la nglo lɔ plaii'n, m bɔbɔ min yɛ n fali ń sa n tinngɛli nun-ɔn. Min yɛ n sie nzraama mun-ɔn.

13Kɛ bɔ n yo sa i nuan su'n ti, n ko fali Siris m bali. I nyrun atin nga b'a saci'n, n ´yo be kpa. Ɔ wa kplan min klɔ'n i uflɛ, yɛ min sran nga be trali be ɔli mɛn wie nun'n, ɔ ´yaci be nun be ´sa bé sin bé mɛn'n nun. Ɔ su de-man dein, ɔ su usa-man kɛ be mɛn i adi.» Anannganman b'ɔ sie mɛn wunmuan'n yɛ ɔ kan sɔ-ɔ.

14Izraɛlfuɛ mun, Anannganman wan yoo: «Eziptfuɛ'm be junman'n i su mmlusuɛ'n, yɛ Etiopifuɛ'm be ninnge nga be nyannin be'n be su mmlusuɛ'n, ɔ nin Sebafuɛ bɔ be ti sran jajraajra'n be kusu be ninnge'm be su mmlusuɛ'n, i kwlaa sɔ'n ɔ ´sin amun ja su, yɛ i kwlaa sɔ'n ɔ ´yo amun liɛ. Sran sɔ'm be ´su amun su, be ´ci be, be ´koto amún bo, yɛ ndɛ nga be ´kan kle amun'n, ɔ ´yo kɛ srɛlɛ bɔ be srɛ'n sa. Be ´se kɛ: ‹Amun kunngba cɛ amún wun lɔ yɛ Nyanmiɛn'n wo-ɔ. Uflɛ fi nun-mɛn i sin.› »

15Izraɛl Nyanmiɛn, wɔ bɔ a de sran mun'n, nanwlɛ, a ti Nyanmiɛn kun bɔ a ti fiawa!

16Be nga be yo amuɛn mun'n, nyannzuɛn'n ɔ'a kun be kpo, bé nyin'n ɔ'a gua ase, be kan bé ti ase yɛ be kɔ-ɔ.

17Sanngɛ Izraɛlfuɛ'm be liɛ'n, Anannganman yɛ ɔ de be-ɔ, be ´ka sɔ tititi. Be nyin su gua-man ase le, Be su wun-man nyannzuɛn le.

18Anannganman yili nglo'n. Ɔ siesieli asiɛ'n i wafa'n, kpɛkuun yɛ ɔ yili-ɔ, yɛ ɔ man ɔ yoli cinnjinnjin-ɔn. Ɔ'a yi-mɛn i ngbɛn, ɔ yili kɛ be tran su. Ndɛ ng'ɔ kan'n yɛ: «Min yɛ n ti Anannganman nin-ɔn, uflɛ fi nun-man n sin.

19Ndɛ nga n kannin'n, m'an kɛn-mɛn i nvialiɛ nun, m'an kɛn-mɛn i asiɛ'n i lika tuun wie nun. M'an se-man Zakɔb osu nunfuɛ'm be kɛ be kunndɛ min kan like fi nun-man lɛ'n! Min, Anannganman n kan ndɛ ng'ɔ ti i su'n, n kan ndɛ nanwlɛ.»

20Nvle-nvle'm be nunfuɛ mun, amun nga amun kali lɛ'n, amun `tian amun nuan nan amun `bla, amun `wunnge wa likawlɛ. «Be nga be sua be waka sran'n, bɔ be srɛ amuɛn b'ɔ kwla de-man be'n, be sɔfuɛ'm be si-man ngwlɛlɛ.»

21Amun `kan amun nuan su ndɛ mun, amun `kan sa nga amun jran su kan ndɛ'n. Amun `wun amún wun bɔbɔ. ?Wan yɛ ɔ boli sa nga be wa ju'n be su lalaa-a? ?Wan yɛ ɔ dun mmua yili be nglo nan b'a ju-ɔ? ?Nán min Anannganman-an? Sɛ be san mín wun'n, be wun-man Nyanmiɛn fi kun. Nyanmiɛn b'ɔ ti nanwlɛfuɛ b'ɔ de sran'n, sɛ be san min wun'n, be su wun-mɛn i sɔ Nyanmiɛn kun.

22Amun nga amun wo asiɛ'n i mmua lɔ'n, amun `kpɛ amún nyin mín wun wa, yɛ amun ´fite nun! Afin Nyanmiɛn'n yɛlɛ min, uflɛ fi nun-man lɛ kun.

23M bɔbɔ n ta mín wun nda, ndɛ ng'ɔ ti su'n yɛ ɔ fin mín nuan fite-ɔ, ndɛ sɔ'n n su kaci-mɛn i, sran'm be kwlaa be ´koto ḿ bo yɛ be kwlaa be ´ta nda min dunman nun.

24Be ´se kɛ: «Anannganman kunngba cɛ yɛ ɔ di nanwlɛ-ɔ, i kunngba cɛ yɛ ɔ lɛ wunmiɛn-ɔn.» Be kwlaa nga be jasoli i wun'n, be ´bɛ i sin, yɛ be ´wun nyannzuɛn.

25Sanngɛ Anannganman ɔ ´bu Izraɛlfuɛ'm be sran kpa, yɛ be ´fɛ i sɔ'n di bé nuan.

← Chapter 44 Chapter 46 →