Hosea 6

Baoule (NYANMIƐN NDƐ'N 1998)

1Kpɛkuun amun ´se kɛ: «Yoo! Amun man e wɔ, e `sa e sin Anannganman wun lɔ. I yɛ ɔ boli ye kannin nin-ɔn, sanngɛ i bɔbɔ kunngba'n yɛ ɔ wa fua yɛ ɔ ´wu-ɔ. I yɛ ɔ boli ye fɛ-ɔ, sanngɛ i bɔbɔ kunngba'n yɛ ɔ wa cici su-ɔ.

2Wa nin le nnyɔn'n ɔ ´yo man e nyan nguan ekun, e ´tintin é sa ase i fanngan nun. Kpɛkuun i le nsan su'n, ɔ ´man ye su e ´yo juejue, e wa tran nguan nun i nyrun ekun.

3Man e si Anannganman. Amun man e kunndɛ kɛ e ´si i, afin i balɛ'n ti kɛ aliɛ b'ɔ cɛn b'ɔ to fuan-man'n sa. I balɛ'n wa yo kɛ nzue b'ɔ kpiti kpli tɔ'n sa. Ɔ wa yo kɛ munngun nun nzue b'ɔ man asiɛ'n jɔ'n sa.»

4Sanngɛ Anannganman ´tɛ amun su kɛ yoo: «?Efraimfuɛ mun, nguɛ li bɔ cɛ yɛ amun waan n yo m man amun-ɔn? ?Zidafuɛ mun kusu, amun waan n yo amun sɛ? Amun Nyanmiɛn klolɛ'n ti kɛ nyanmiɛn ble bɔ be wun i nglɛmun nun'n sa, ɔ ti kɛ nglɛmun nyansue sa, be wielɛ yo-man ya.

5I sɔ'n ti, ndɛ nga n ´fa wla mín nuan ijɔfuɛ'm bé nuan kɛ be `kan kle amun'n, ɔ ti amún sa yalɛ ndɛ, ɔ ti amun wie ndɛ. I sɔ ndɛ liɛ'n, ɔ ´yo weiin sran kwlakwla nyrun.

6Afin n klo aunnvuɛ nga be si sran'n tra tɛ nga be yi be man min'n. Kɛ be si kɛ n ti Nyanmiɛn'n, ɔ jɔ min klun tra tɛ nga be yi-ɔ be yrɛ i nnɛn'n kɔlikɔli'n.»

7«Adam klɔ lɔ yɛ amun nin min buli nun-ɔn, lɛ yɛ amun kacili amun sin sili min-ɔn.

8Galaad ti sa tɛ yofuɛ'm be klɔ. Ɔ lɛ-man lika kun nga be kun-man sran nun-ɔn.

9Sisɛm atin'n su lɔ'n, min nyrun jranfuɛ akpasua kun b'a kaci be liɛ kodiawiefuɛ. Be sa sran'm be nyrun yɛ be kun be-ɔ. I sɔ ndɛ liɛ'n ti kain.

10N wunnin sa tɛtɛ'n wie Izraɛl mɛn'n nun. Lɛ yɛ Efraim sili i tekle nin-ɔn, yɛ man fiɛn'n kannin Izraɛl-ɔ.»

11«Zidafuɛ mun, amun liɛ'n, fɔ nga n ko fa n ko tu amun blɛ nga n ´fa min sran nga be yoli kanga mun m ´ba'n, m'an bu m'an sie.»

← Chapter 5 Chapter 7 →