Ezekiel 20 — Baoule (NYANMIƐN NDƐ'N 1998)

1Kɛ be trali sran'm be lomuɛn'n, i afuɛ nso su'n, i anglo nnun su'n, i cɛn ba blu su'n, kpɛnngbɛn wie'm be wa toli min, be seli min kɛ be kunndɛ kɛ be ´si Anannganman i klun sa'n.

2Yɛ Anannganman seli min kɛ:

3«Klɔ sran, kan ndɛ kle Izraɛl kpɛnngbɛn mun. Se be kɛ n ti Nyanmiɛn bɔ min nyin o su, n ta amun nda kɛ n su yaci-man min wun lɛ man amun usa-man min sa. Min Anannganman Nyanmiɛn'n yɛ n kan sɔ-ɔ.

4Klɔ sran, bu be fɔ. Bu be fɔ. Fa be nannan'm be tete sa nga be yoli'n kle be.

5Se be kɛ: ‹Anannganman Nyanmiɛn wan yoo: Cɛn nga bɔ n ´fa Izraɛl'n, m mannin mín sa su n tali nda kleli Zakɔb i osu nunfuɛ sɔ mun, n fali mín wun kleli be kɛ be o Ezipt lɔ'n. M mannin mín sa su n kleli be, n seli kɛ: Min ti Anannganman amun Nyanmiɛn.

6I cɛn sɔ nun'n, m mannin min sa su n tali be nda kɛ n ´fa be Ezipt lɔ n ´kɔ mɛn kun bɔ i asiɛ'n yo like ye kpa bɔ i kunngba'n ti nnɛn tawlɛ klanman'n i nun. Mɛn sɔ'n i klanman'n tra mɛn'm be kwlaa. Yɛ n siesieli sieli be.

7N seli be kɛ: Amun kwlaa amun `yi tete sa nga amún nyin blo su'n be ase, nán amun sɔ Eziptfuɛ'm be amuɛn mun, nán amun yo amun wun fiɛn. N ti Anannganman amun Nyanmiɛn.

8Sanngɛ be jasoli mín wun, yɛ bé nyin ɔ'a yi-man min. Be nun kun sa ɔ'a yi-mɛn i tete sa nga i nyin blo su'n i wie fi ase. B'a yaci-man Eziptfuɛ mun be amuɛn'm be sɔlɛ. M buli akunndan kɛ n ´fa bé wun ya nan n ´fa ya sɔ'n lele n guɛ i bo Eziptfuɛ'm be afiɛn lɔ.

9Sanngɛ kɛ ɔ ´yo nan min dunman'n ɔ'a saci-man be nga be nin be tran lɛ'm bé afiɛn'n ti'n, n guali min ya i ase. Afin be tili i kɛ n seli be kɛ n ´fa Izraɛlfuɛ'm be Ezipt lɔ n fite.

10N fali be Ezipt lɔ m bali nan m'an fa be m'an wɔ aawlɛ flɛnnɛn'n nun lɔ.

11N fali mín nuan su ndɛ nin min mmla'n n kleli be kɛ ɔ ´yo nan be nga be fa su'n b'a nyan nguan'n ti.

12N kpɛli wunmiɛn-delɛ-cɛn nan n ´fa yi aenguɛ nga e nin be e trali'n i nglo, kɛ ɔ ´yo nan b'a si kɛ n ti Anannganman nan n fali Izraɛl n sieli i ngunmin kɛ ɔ `su min.

13Sanngɛ Izraɛlfuɛ'm be jasoli mín wun aawlɛ flɛnnɛn nun lɔ. B'a fa-man mín nuan ndɛ'n su. Be guali min mmla nga sran fa su-ɔ ɔ nyan nguan'n be blo. B'a bu-man be like fi. Be sacili min wunmiɛn-delɛ-cɛn'n tɛtɛ kpa. M buli akunndan kɛ n ´fa bé wun ya, yɛ n ´ngua-ngua ya sɔ'n i bo nan n ´nunnun be aawlɛ nun lɔ.

14Sanngɛ kɛ ɔ ´yo nan min dunman ɔ'a saci-man nvle-nvle nga blɛ bɔ n ´fa Izraɛlfuɛ mun Ezipt lɔ m ´ba be wunnin nun'n ti'n, m'an yo-mɛn i sɔ. N guali min ya'n i ase.

15Aawlɛ flɛnnɛn nun lɔ'n, m bɔbɔ min ekun yɛ n tali be nda kɛ n fa-man be n kɔ-man mɛn klanman nga min waan n ´fa man be i nun lɔ kun nin-ɔn. Mɛn sɔ'n i nun lɔ asiɛ'n ɔ yo like ye kpa, yɛ i kunngba'n ɔ ti nnɛn tawlɛ klanman. Mɛn sɔ'n i klanman tra mɛn'm be kwlaa.

16Sa nga ti bɔ n seli sɔ'n, yɛlɛ kɛ be yo mín nuan su ndɛ'm be finfin. Be fa-man min mmla'm be su, yɛ be nian-man min wunmiɛn-delɛ-cɛn'm be su. Amuɛn sɔlɛ fuɛ'n yɛ be fa cicili be ti-ɔ.

17Sanngɛ kɛ n nian be sa'n, be yoli min annvɔ. Be nunnunlɛ ɔ'a yo-man n fɛ kun, ɔ man m'an nunnun-man be aawlɛ flɛnnɛn'n nun lɔ.› »

18«N wlali be mma'm bé su nun kpa aawlɛ flɛnnɛn nun lɔ kɛ: Nán amun fa amún si'm bé nuan ndɛ liɛ'm be su, nán amun sɔ amuɛn fa yo amun wun fiɛn.

19N ti Anannganman amun Nyanmiɛn, amun `fa mín nuan su ndɛ'n su. Amún nian min mmla be su. Amun `nanti be su.

20Amun `sie min wunmiɛn-delɛ-cɛn i ngunmin, ɔ ti nzɔliɛ kun b'ɔ o min nin amun ye afiɛn kɛ ɔ ´yo nan b'a si jrɛiin kɛ n ti Anannganman amun Nyanmiɛn'n ti.

21Sanngɛ be jasoli mín wun wie. B'a fa-man mín nuan su ndɛ'm be su, b'a fa-man min mmla bɔ sran fa su-ɔ ɔ nyɛn i ti'n be su. B'a nian-man min wunmiɛn-delɛ-cɛn'n su. M buli akunndan kɛ n ´fa bé wun ya, min waan n ´fɛ i lele n ´nguɛ i ti nin i bo aawlɛ flɛnnɛn'n nun lɔ.

22Sanngɛ kɛ ɔ ´yo nan min dunman'n ɔ'a saci-man nvle-nvle nga blɛ bɔ n ´fa Izraɛlfuɛ mun Ezipt lɔ m ba'n be wunnin nun'n be nun'n ti, m'an yo-man be like fi.

23Aawlɛ flɛnnɛn'n nun lɔ'n, m bɔbɔ n kunngba'n n tali nda kɛ n ´yo man be bo sanndi mɛn wie'm bɔ be si-man nun be nun.

24Sa ti bɔ n yo be sɔ'n yɛlɛ kɛ be fa-man min mmla'm be su, be bu-man mín nuan su ndɛ'n i ndɛ, be nian-man min wunmiɛn-delɛ-cɛn'n su, amuɛn nga be si'm be sɔ be'n yɛ be fa cici be ti-ɔ.

25M bɔbɔ n kunngba min yɛ m mannin be mmla wie bɔ b'a yo-man be kpa nin-ɔn, mmla sɔ'm be ti b'a nyan-man nguan.

26N yacili be lɛ, be yoli bé wun fiɛn, tɛ nga be fa be talua ba'm be kwlaa be yili be nun. N waan n ´fa be n wla awlaboɛ'n nun, kɛ ɔ ´yo nan b'a si jrɛiin kɛ min yɛ n ti Anannganman'n ti.»

27«I sɔ'n ti'n, klɔ sran, kan ndɛ nga kle Izraɛlfuɛ mun. Se be kɛ: ‹Anannganman Nyanmiɛn'n wan yoo: Amun nannan'm be kpɛli min nzowa ekun. Nzowa bɔ be kpɛli min'n yɛlɛ kɛ be kpɔcili min.

28Mɛn nga n tali be nda kɛ n ´fa man be'n, n fa be n ɔli nun. Be fali bé nyin bloli kpɔlɛ fleiin nin waka nga be lɛ nnya wuya'm bé su. Lɛ yɛ be yili be tɛ mun-ɔn, lɛ yɛ be kunnin min ya ɔ nin ble annzɛ like ng'ɔ ti kɛ ble sa bɔ be fa yi sraka'n, ɔ nin be tɛ'm bɔ be bɔn fannin'n, ɔ nin be nzan'm bɔ be gua be ase mun-ɔn.

29N seli be kɛ: ?Nguɛ yɛlɛ sraka yiwlɛ lika nga be o kpɔlɛ'm be su bɔ amun kɔ be nun? Be flɛli lika sɔ'm be kɛ: Sraka yiwlɛ lika ng'ɔ o kpɔlɛ'm be su'n.›

30I sɔ'n ti, kan kle Izraɛlfuɛ'm be kɛ: ‹Anannganman Nyanmiɛn'n wan yoo: ?Nán fiɛn kunngba nga amún si'm be yoli'n nin tete amuɛn kpanngban bɔ be sɔli'n yɛ amun ´nian su be yo wie lɛ-ɔ?

31Kɛ e ´se yɛ'n, amun tɛ yo amún wun fiɛn yɛlɛ kɛ amun tɛ sɔ amuɛn, yɛ amun kun amun mma mun be fa sɔ amuɛn mun. ?Izraɛlfuɛ mun, amun lafi su kɛ n ´yaci min wun lɛ kɛ amun usa min sa? Cɛcɛ, n ti Nyanmiɛn bɔ min nyin o su'n, n su yaci-man min wun lɛ kɛ amun usa min sa.› » Anannganman Nyanmiɛn yɛ ɔ kan sɔ-ɔ.

32«Amun bu i kɛ amun kwla yo kɛ mɛn kun nga'm be nunfuɛ'm be sa nan amun ´kwla sɔ waka mun nin yɛbuɛ mun, atin sin-man lɛ.

33Anannganman Nyanmiɛn wan yoo: Min nyin o su, min kwlalɛ bɔ n kwla'n yɛ n fa yo min ninnge mun-ɔn. N wa fa min ya dan'n n gua amun su, wafa nga n ´fa sie amun'n yɛ ɔ o lɛ-ɔ.

34Min kwlalɛ bɔ n kwla'n ti n ´fa amun nvle-nvle nga amun o be nun'n be afiɛn, ɔ nin mɛnmɛn nga amun bo sanndili be nun'n, be nun. N ´yiayia amun. N yo i sɔ'n ya su.

35N ´fa amun n kɔ aawlɛ flɛnnɛn'n nun mmua lɔ kan sran kun nga'm be nun-man lɛ'n, lɛ yɛ e nin amun e ´kan ndɛ nin-ɔn.

36Kɛ n fa buli amun nannan'm be fɔ aawlɛ flɛnnɛn'n nun lɔ'n, i sɔ yɛ n ´fa bu amun-ɔn, min Anannganman Nyanmiɛn'n yɛ n kan sɔ-ɔ.

37M ´mian amun kɛ amun tran min sran'm be nun, yɛ m ´mian amun kɛ amun fa aenguɛ nga e nin amun e trali'n i su ndɛ'm be su.

38N ´yi nyin keklefuɛ nga be o amun nun'n nin be nga be jasoli mín wun'n. Mɛn nga be ɔli nun'n, n ´fa be n ´jaso lɛ, sanngɛ be su sa-man bé sin Izraɛl asiɛ'n su kun. Yɛ amun wa si jrɛiin kɛ min yɛ n ti Anannganman nin-ɔn.

39Yɛ amun Izraɛlfuɛ mun, min Anannganman Nyanmiɛn n waan yoo: Amun `wɔ nan sran kun ko sɔ i amuɛn mun, sanngɛ i sin'n amun lɛ-man atin kɛ amún nyin su yi-man min. Amun ´yaci amuɛn'm be like manlɛ bɔ amun fa saci min dunman'n.

40Afin Izraɛlfuɛ mun, amun kwlaa be wa ko su min oka dan ng'ɔ o Izraɛl lɔ'n b'ɔ ti n liɛ klonglo'n i su lɔ. Min Anannganman Nyanmiɛn yɛ n kan sɔ-ɔ. Lɛ liɛ'n, n ´sɔ amun nun kpa, yɛ like kwlaa nga amun ´fa wla min sa nun'n, nga amun ´fa man min'n, ɔ nin amun ninnge kpakpa nga amun wa fa blɛ min'n, n ´se amun kɛ amun fa blɛ min.

41Kɛ n ko fa amun nvle-nvle'm be nun nin mɛnmɛn nga amun bo sanndili nun be nun n ko ba'n, bɔ n ko yiayia amun'n, n ´sɔ amun nun klanman kɛ tɛ ng'ɔ bɔn fannin'n sa. N wa fa amun n klekle nvle-nvle'm be kɛ min liɛ'n min nzuɛn'n nin klɔ sran liɛ'n ti-man kun.

42Blɛ bɔ n ko fa amun'n ko sa amun sin Izraɛl asiɛ'n su, mɛn nga n tali amun nannan'm be nda kɛ n ´fa man amun'n, i nun lɔ amun wa si jrɛiin kɛ min yɛ n ti Anannganman nin-ɔn.

43Lɛ yɛ amún wla wa kpɛn amun nzuɛn nin amún sa tɛtɛ nga amun fa amún wun wlali nun be su-ɔ. Amun bɔbɔ amun ´kpɔ amun wun tɛtɛ kpa amun sa tɛ'n kwlaa nga amun yoli'n ti.

44Izraɛlfuɛ mun, n su nian-man amun nzuɛn tɛtɛ nin amun aeliɛ tɛtɛ kpanngban'm be su yɛ n ´yo amun sa-a. Sanngɛ n ´yo man amun nyin ´yi min, yɛ amun wa si jrɛiin kɛ min yɛ n ti Anannganman nin-ɔn.»