Exodus 34

Baoule (NYANMIƐN NDƐ'N 1998)

1Anannganman seli Moiz kɛ: «Sɛ yɛbuɛ paplaapla nnyɔn kɛ klikli liɛ'm be sa, yɛ n wa klɛ bé su ndɛ kunngba nga n fa klɛli klikli liɛ nga a bubuli be nun'n bé su'n.

2Siesie ɔ́ wun ye ainman nglɛmun ndɛ kpa'n. Aliɛ njɛnniɛn su'n, fu Sinai oka'n su nan to min lɔ.

3Nán sran fi nin wɔ be fu lɔ, nán be wun sran fi oka'n i lika fi. Nán man bua, annzɛ boli, annzɛ nannin'm be didi oka'n wun koko lɛ.»

4Moiz sɛli yɛbuɛ paplaapla nnyɔn kɛ klikli liɛ'm be sa. Ɔ jasoli nglɛmun ndɛ kpa'n, yɛ ɔ fuli Sinai oka'n su kɛ Anannganman fa kan kleli i'n sa. Ɔ ´kɔ'n, ɔ fali yɛbuɛ paplaapla nnyɔn mun.

5Anannganman jrali sin wɛnsrɛn tianman kun nun, ɔ wa jrannin Moiz i wun lɛ. Yɛ ɔ boli i dunman seli kɛ: «Anannganman nin-ɔn.»

6I sin ɔ sinnin Moiz i nyrun lɛ, ɔ seli i ekun kɛ: «N ti Anannganman. N ti Nyanmiɛn aklunyefuɛ, nin aunnvuɛ sifuɛ, n fa-man ya ndɛndɛ. Min aklunye'n ti dan, yɛ sa nga n kan kɛ n ´yo be'n, n ´yo be.

7N yi min aklunye'n i nglo sran'm be lika lele n fa wlu be anunman'm be anunman liɛ'm be nun lele ju be akpasua akpi su. N yaci bé sa tɛ mun, nin bé nyin kekle, ɔ nin be fɔnlɛ mun n cɛ be. Sanngɛ sran ng'ɔ yo sa tɛ'n, n se-mɛn kɛ ɔ'a yo-man like fi. N tu siɛ'm be fɔ lele fa wlu be mma nin be anunman'm be nun, kpɛkuun ɔ wlu be anunman siansian'm be nun.»

8Moiz kɛnnin i wun ase ndɛndɛ, ɔ kotoli yɛ ɔ utuli i nyin ase.

9I sin ɔ seli kɛ: «Sɛ ɔ waan a ´yo min ye sakpa'n, Anannganman, n ´srɛ wɔ, ɔ bɔbɔ a nin e wɔ. Ɔ ti nanwlɛ kɛ minniɛn nga'm be nyin ti kekle kpa. Sanngɛ yaci é wun sa'n nin é fɔnlɛ mun cɛ ye, sɔ e nun kɛ ɔ sran mun sa.»

10Anannganman seli Moiz kɛ: «Nian, e nin amun e wa tra aenguɛ. Nvlefuɛ'm be kwlaa be nyrun'n, n wa yo abonuan sa bɔ be nian wun-mɛn i asiɛ wunmuan'n su wa, ɔ nin mɛn'm be kwlaa be nun le'n. Izraɛlfuɛ nga a o be afiɛn yɛ'n be kwlaa, be ´wun min Anannganman min sa nuan junman mun. Wɔ yɛ n ´fa wɔ n ´di junman sroesroe sɔ mun-ɔn.

11Amun `nian nga n se amun kɛ amun yo i ndɛkɛn yɛ'n su kpa amun `yo. N wa dun mmua amun nyrun, n ´fuan Amɔrfuɛ mun, nin Kanaanfuɛ mun, nin Ɛtfuɛ mun, nin Ferezfuɛ mun, nin Evfuɛ mun, ɔ nin Zɛbisfuɛ mun.

12Nán amun nin mɛn nga amun wa wlu nun lɔ lɛ'n i nunfuɛ mun be tra aenguɛ, kɛ ɔ ´yo nan b'a kaci-man kɛ aya sa, nan amu'an tɔ-man nun'n ti.

13Amun `bubu be amuɛn sɔwlɛ mun. Amun `bubu be yɛbuɛ nga be takali be'n, ɔ nin be waka nga be sɔ be'n.

14Nán amun koto amuɛn'm bé bo, afin min Anannganman, n ti Nyanmiɛn kun bɔ n klo kɛ be su min kunngba cɛ. N si kwla.

15Nán amun nin mɛn sɔ'n nunfuɛ'm be tra aenguɛ wie fi, kɛ ɔ ´yo nan blɛ bɔ be ´sɔ be amuɛn mun'n, b'a flɛ-man amun kɛ amun ko sɔ wie nan amu'an di-man be amuɛn nnɛn'n wie'n ti.

16I kunngba'n, kɛ ɔ ´yo nan amu'an fa-man lɔ bla amu'an man-man amun wa yasua mun, nan bla sɔ'm be kusu kɛ be ´sɔ be amuɛn mun'n, b'a cuɛn-man amun mma liɛ mun b'a wla-man amuɛn sɔ'm be sɔlɛ nun wie'n ti.

17Nán amun klo like kɛ jɛtɛ ufue, annzɛ sika ɔkwlɛ, annzɛ aaba fa kaci amun amuɛn.

18Amun `di kpaun bɔ kpaun ayre nun-man nun'n i cɛn'n. Amun `di i cɛn ba nso Abib anglo'n nun. Afin anglo sɔ'n nun yɛ amun tuli Ezipt lɔ-ɔ. Amun `di kpaun nga kpaun ayre nun-man nun'n kɛ n kan kleli amun kɛ amun `di'n sa.

19Ba yasua klikli nga be wu i'n ti min liɛ. Nnɛn'm bé wa yasua klikli mun: sɛ nannin ba o, sɛ bua ba o, sɛ boli ba o, be ti min liɛ wie.

20Amun `fa bua yasua nga ɔ'a kpɛ cro'n `fa kpɔ aflunmun ba yasua klikli'n i ti. Sɛ amun waan amun kpɔ-mɛn i'n, amun `fa like wie fin i kɔminsin `kun i. Amun `kpɔ amun nvle'n nun ba yasua klikli'm bé ti. Nán amun ba min nyrun nin amún sa ngbɛn.

21Amun `di junman cɛn ba nsiɛn, sanngɛ amun `fa cɛn nso su'n de wunmiɛn. Kannzɛ junman dilɛ blɛ o, sɛ kacɛ tulɛ blɛ o, sɛ ble kpɛlɛ blɛ o, amun `yo i sɔ.

22Amun `di ble mma klikli'n i kpɛlɛ blɛ'n i cɛn'n, yɛ afuɛ nuan'n i awieliɛ'n, kɛ bɔ amun ko wie amun fie nga amun dili i su ninnge be su yiayia'n, amun `di i su cɛn'n.

23«Afuɛ kwlaa nun'n, man yasua'm be kwlaa be bla min Anannganman bɔ n ti Izraɛl Nyanmiɛn'n min nyrun kpɛ nsan.

24Afin n ´dun mmua amun nyrun, yɛ n ´kan nvle sɔ'm be nunfuɛ'm bé bo, kpɛkuun amun asiɛ liɛ'n ɔ ´cɛn. Sɛ afuɛ nuan kun nun amun ba min Anannganman amun Nyanmiɛn'n min sua'n nun wa kpɛ nsan bɔbɔ'n, sran fi nyin su blo-man amun mɛn i wun kɛ ɔ fɛ i amun sin.

25Blɛ bɔ amun ´fa nnɛn nga amun ´kun i'n be ´blɛ min'n, nán an fa kpaun bɔ kpaun ayre o nun'n sie su. Nán amun sie Delɛ-cɛn i nnɔsua nun tɛ'n i nnɛn'n lɛ lele nglɛmun.

26Amun `fa amun fie'm bé su lɔ ninnge'm be mma klikli mun fa blɛ min Anannganman bɔ n ti amun Nyanmiɛn'n. Amun `fa be blɛ min mín sua'n nun lɔ. Nán amun tɔn boli ba'n i nin i nyɔnflɛn nzue'n nun.»

27Anannganman seli Moiz kɛ: «Klɛ ndɛ nga n kannin be lɛ mun! Afin bé su yɛ n ´jran n ´siesie min nin wɔ yɛ Izraɛlfuɛ mun ye aenguɛ nga e ´tra nin-ɔn.»

28Moiz nin Anannganman be kali lɛ lele cɛn ba ablanan nin kɔnguɛ ablanan, i nuan sa ɔ'a kan-man like fi, yɛ ɔ'a nɔn-man nzue kusu. Anannganman klɛli aenguɛ nga ɔ nin Izraɛlfuɛ mun trali'n i nun ndɛ mun. Be ti mmla blu. Ɔ klɛli be yɛbuɛ paplaapla'm bé su.

29Moiz fin oka'n su lɔ jrali. Kɛ ɔ ´ba'n, yɛbuɛ paplaapla nnyɔn bɔ mmla blu'n wo bé su'n, be o i sa nun. Ɔ si-man kɛ kɛ ɔ nin Anannganman be ijɔli'n ti i nyrun'n ti nyannyannyan.

30Kɛ Aarɔn nin Izraɛlfuɛ'm be wunnin i nyrun b'ɔ ti nyannyannyan'n, srɛ kunnin be, i ti be kwla wunnge-mɛn i wun lɔ.

31Moiz flɛli be, nan Aarɔn nin Izraɛl kpɛnngbɛn mun b'a kwla bɛ i wun lɛ, nan ɔ'a kan ndɛ ɔ'a kle be.

32I sin Izraɛlfuɛ'm be kwlaa be wunngeli i wun lɛ nan ɔ'a kan mmla nga Anannganman fa mɛnnin i Sinai oka'n su lɔ'n ɔ'a kle be.

33Kɛ Moiz nin be wieli ijɔ'n, ɔ fali tannin kɛtɛli i nyrun.

34Blɛ b'ɔ ´kɔ Anannganman nyrun lɔ bɔ be ´ko koko yalɛ'n, ɔ tike i nyrun'n su. Kɛ ɔ fin lɔ ba'n, ɔ wa kan ndɛ nga Nyanmiɛn kan kleli i'n kle Izraɛlfuɛ mun.

35Izraɛlfuɛ'm be nian Moiz i nyrun'n, be wun i kɛ i nyrun'n ti nyannyannyan. Kpɛkuun Moiz kɛtɛ i nyrun'n su ekun lele san kɛ ɔ ´kɔ Nyanmiɛn sin be ´ko koko yalɛ'n yɛ ɔ tike su ekun-ɔn.

← Chapter 33 Chapter 35 →