2 Samuel 24

Baoule (NYANMIƐN NDƐ'N 1998)

1Anannganman fali ya Izraɛlfuɛ'm bé wun ekun, ɔ man David cuɛnnin sa yili bé su. Anannganman suli i bo kɛ ɔ ka Izraɛlfuɛ mun nin Zidafuɛ mun.

2Zoab b'ɔ ti sonja su kpɛn'n wo famiɛn'n i wun lɛ, nan famiɛn'n ɔ'a se i kɛ: «Wlan-wlan Izraɛl nvle'n kwlaa nun. Bo i bo Dan lele fa ju Beɛr-Seba. Yɛ amun `ka sran mun man n si bé nuan.»

3Zoab seli famiɛn'n kɛ: «N ´srɛ kɛ man Anannganman ɔ Nyanmiɛn'n yo man sran'm be sɔn tra nga su kpɛ ya, yɛ man ɔ yo ɔ bɔbɔ ɔ nyrun. ?Sanngɛ Nannan, ɔ yo sɛ ti yɛ ɔ waan be yo i sɔ like nin-ɔn?»

4Famiɛn'n jrannin ndɛ ng'ɔ kannin'n su kpa. Ɔ man ɔ fata kɛ Zoab nin sonja kpɛnngbɛn'm be yo. Be fɛli i famiɛn'n nyrun lɛ be ɔli Izraɛlfuɛ'm be kalɛ.

5Be kpɛli Zurdɛn'n. Be boli junman'n i bo Arɔɛr lɛ, ɔ nin klɔ ng'ɔ o kongo'n nun lɔ'n su. Be sinnin Gad, be ɔli Zaɛzɛr.

6Be ɔli Galaad mɛn'n nun, i sin be ɔli Taktim-Ɔdsi mɛn'n nun, yɛ be ɔli Dan-Zaan. I sin be ɔli Sidɔn asa'n su.

7Be sinnin Tir bɔ talɛ si i wun'n su, yɛ be sinnin Evfuɛ mun nin Kanaanfuɛ'm be klɔ laa'm be su. I sin be sinnin Zida nvle'n i ngua lɔ klɔ nga be flɛ i Beɛr-Seba'n su.

8Kɛ be wieli mɛn'n nun wlan'n, be sali bé sin Zerizalɛm. Be dili anglo ngwlan nin cɛn ablaɔn yɛ be bali-ɔ.

9Zoab boli sran'm bé nuan kleli famiɛn'n. Izraɛl sonja nga be kun alɛ-ɔ ɔ yo ye'n, be ti sran akpi-akpi ya mɔcuɛ (800.000). Zidafuɛ'm be ti akpi-akpi ya nnun (500.000).

10Kɛ be kali sran mun wieli'n, srɛ kunnin David, yɛ ɔ seli Anannganman kɛ: «Sa nga n yoli'n, sa tɛ dan yɛ n yoli-ɔ. Anannganman, yaci mín wun sa'n cɛ min. N yoli sinnzin.»

11Kɛ David ´jaso nglɛmun'n, wuun Anannganman ɔ'a kan ndɛ ɔ'a kle i nuan ijɔfuɛ Gad b'ɔ ti David i jeliwafuɛ'n.

12I waan: «Ko se David kɛ n ´kle sa nsan nan ɔ `nian kun fa man n fa yo i.»

13Yɛ Gad ko toli David yɛ ɔ boli jasin'n kleli i-ɔ. I waan: «?A klo kɛ awe kpɛn ɔ mɛn'n nun afuɛ nso, annzɛ a klo kɛ a ´wanndi ɔ kpɔfuɛ'm be nyrun anglo nsan, annzɛ a klo kɛ tukpacɛ bɔ sa ndɛndɛ wie tɔ ɔ mɛn'n nun cɛn nsan? Bu i akunndan nan kan kun kle min man n ko se sran ng'ɔ sunmannin min'n.»

14David waan: «Min akunndan ɔ'a sanngan ɔ'a tra su. Sɛ e tɔ Anannganman sa nun'n, ɔ flunman tra kɛ e tɔ sran sa nun'n. Anannganman liɛ i aunnvuɛ silɛ'n lɛ-man sin.»

15Yɛ Anannganman man tukpacɛ b'ɔ sa ndɛndɛ'n yoli Izraɛlfuɛ mun-ɔn. Kɛ ɔ boli i bo nglɛmun'n, ɔ yoli be lele san blɛ nga Anannganman kleli'n ɔ juli. Sran akpi-akpi ableso (70.000) be wuli Izraɛl mɛn'n nun. Be wuli Dan lele fa ju Beɛr-Seba.

16Kɛ anz'n mɛnnin i sa'n su bɔ i waan ɔ saci Zerizalɛm'n, Anannganman kacili aniɛn. Ɔ seli anz b'ɔ su kun sran mun kɛ: «Ɔ'a yo kpa, kan ɔ́ sa'n i ase.» Kɛ ɔ ´yo sɔ'n, wuun Anannganman i anz'n wo Aravna b'ɔ ti Zɛbisfuɛ'n i ble bowlɛ'n wun lɛ.

17Kɛ David nian bɔ anz'n su ´saci sran mun'n, ɔ seli Anannganman kɛ: «Min yɛ n fɔnnin-ɔn, min yɛ n yoli sa nin-ɔn. Minniɛn nga'm b'a yo-man sa fi. E nin min osufuɛ mun yɛ ɔ fata kɛ a nin e nyɛn i-ɔ.»

18Le kun sɔ'n, Gad wa toli David, ɔ seli i kɛ: «Kɔ Aravna b'ɔ ti Zɛbisfuɛ'n i ble bowlɛ'n su lɔ, ko kplan Anannganman i sɔwlɛ kun mɛn i.»

19David fali nga Anannganman fa wlali Gad nuan kɛ ɔ `kan kle i'n su, ɔ ɔli.

20Aravna ´nian-an, famiɛn'n nin i mantanfuɛ'm be su bɛ i wun lɛ. Yɛ ɔ ɔli ko kotoli famiɛn'n bo-ɔ, ɔ utuli i nyin ase.

21I waan: «?Nannan, nguɛ sa bɔ yɛ a ba min sin-ɔn?» David waan: «N klo kɛ n to wɔ asiɛ'n, nan n ´kplan Anannganman i sɔwlɛ kun m ´mɛn i kɛ ɔ ´yo nan sa ng'ɔ fa yili i Izraɛlfuɛ'm be su'n ɔ'a wie'n ti.»

22Yɛ Aravna seli David kɛ: «Nannan, fa nan fa yi sraka nga a klo'n i su. Nannin yɛ, fa be `yi tɛ nga be yrɛ i nnɛn kɔlikɔli'n, yɛ saru'm be waka'n ɔ nin waka nga nnɛn be fa cuɛn saru'm be yɛ, fa be yo i bo yie.

23N fɛli kwlaa ng'ɔ o lɛ'n m mannin wɔ. Anannganman ɔ Nyanmiɛn'n yɛ n srɛ kɛ ɔ `sɔ tɛ sɔn'n nun-ɔn.»

24David waan: «Nán man ɔ yo sɔ, man n to. Kɛ n yi tɛ bɔ be yrɛ i nnɛn kɔlikɔli'n m man Anannganman min Nyanmiɛn'n bɔ n yi-man nun like fi'n, ɔ nin i sɔ'n fata-man.» David toli asiɛ'n nin nannin mun jɛtɛ ufue ablenun.

25David kplannin Anannganman i sɔwlɛ kun lɛ. Nan ɔ'a yi tɛ nga be yrɛ i nnɛn'n kɔlikɔli'n ɔ nin bo kun yolɛ i su tɛ'n ɔ'a mɛn i. Yɛ Anannganman sili Izraɛl mɛn'n i aunnvuɛ nan sa yalɛ'n ɔ'a cuɛn i wun.