2 Chronicles 7

Baoule (NYANMIƐN NDƐ'N 1998)

1Kɛ Salomɔn wieli Nyanmiɛn srɛ'n, sin fin nyanmiɛn su lɔ jrali, ɔ yrali tɛ nga be yi-ɔ be yrɛ i nnɛn kɔlikɔli'n be nnɛn'n nin tɛ kun mun be nnɛn'n, kpɛkuun Anannganman i nyrun nyannyan'n deli sua'n.

2Nyanmiɛn nyrun jranfuɛ'm be kwla wlu-man Anannganman i sua'n nun, afin i nyrun nyannyan'n de i sua'n.

3Izraɛlfuɛ'm be kwlaa be wunnin sin b'ɔ jra'n nin Anannganman nyrun nyannyan'n b'ɔ o sua'n su'n. Be kotoli yɛ be utuli be nyin ase dalasi'n su, be manmannin Anannganman. Be seli ke: «Ɔ ti kpa, i aunnvuɛ silɛ'n wo lɛ tititi.»

4Famiɛn'n nin nvlefuɛ'm be kwlaa be yili tɛ Anannganman nyrun lɛ.

5Famiɛn Salomɔn fali nannin tola akpi-akpi ablaɔn-nin-nnyɔn (22.000), nin bua nin boli akpi-akpi ya ablaɔn (120.000) yili tɛ. Kɛ famiɛn'n nin nvlefuɛ'm be kwlaa be yili Nyanmiɛn i sua'n i nglo kɛ ng'ɔ o lɛ'n sa.

6Nyanmiɛn nyrun jranfuɛ'm be jrannin be jranwlɛ'm be nun. Levifuɛ'm be kusu, ngowa kanlɛ ninnge nga David yo mannin Anannganman kɛ be `fa mɛnmɛn i'n, be wo bé sa nun. Be manmannin Anannganman be seli kɛ: «I aunnvuɛ silɛ'n wo lɛ tititi.» Nyanmiɛn nyrun jranfuɛ'm be kpɛ bé nyin bé su lɔ, yɛ be bo awɛ. Izraɛlfuɛ'm be kwlaa be jin nglo.

7Awlo klun ng'ɔ o Anannganman i sua'n nyrun lɛ'n, Salomɔn fali awlo sɔ'n i afiɛn sɛsɛ'n wlali Anannganman sa nun. Lɛ yɛ ɔ yili tɛ nga be yra be nnɛn'n kɔlikɔli'n nin bo kun yolɛ'n i su tɛ bɔ be fa nnɛn lui be yi be mun-ɔn. Sa ti b'ɔ yoli sɔ'n, yɛlɛ kɛ Nyanmiɛn sɔwlɛ ng'ɔ fali aaba yoli'n ti kaan ngboko. Tɛ nga be yra be nnɛn'n kɔlikɔli'n nin sraka nga be fa ble annzɛ like ng'ɔ ti kɛ ble sa'n be yi'n, ɔ nin nnɛn'm be lui'n, be sɔn-man Nyanmiɛn sɔwlɛ sɔ'n su.

8I blɛ sɔ nun'n, Salomɔn nin Izraɛlfuɛ'm be ngba be dili kpata'm be ti cɛn'n. Be dili i cɛn ba nso. Sran'm b'a yia-man ngowa. Sran nga be o Amat lika'm be nun lele b'ɔ fa ju Ezipt nzue ba'n nuan lɔ be bali.

9I le mɔcuɛ su'n, be yiali yialɛ kpa, afin be fali cɛn ba nso be yili Nyanmiɛn sɔwlɛ'n i nglo. Yɛ be fali cɛn ba nso be dili cɛn ekun.

10Anglo nso su'n i cɛn ba ablaɔn-nin-nsan su'n, Salomɔn mannin sran'm be atin kɛ be sanndi be wɔ tannin sua'm be nun. Kɛ be ´ko'n, bé wun kpajali be, yɛ be klun jɔli kpa, afin Anannganman yoli David nin Salomɔn, ɔ nin Izraɛl b'ɔ ti i nvle'n be ye.

11Salomɔn wieli Anannganman i sua'n nin famiɛn sua'n be kplan. Ninnge ng'ɔ guguli kɛ ɔ ´yo be Anannganman i sua'n nun nin famiɛn sua nun'n b'ɔ yoli'n, i kwlaa sɔ'n yoli kpa.

12Anannganman yili i wun nglo kleli Salomɔn kɔnguɛ. Ɔ seli i kɛ: «N tili ɔ srɛlɛ'n, m'an fa lika nga kɛ be `yi sraka nun man min.

13Sɛ n tannin nyanmiɛn su nzue'n nan ɔ tɔ-man kun'n, sɛ n se lalo'm be kɛ be saci mɛn'n i nun waka mun nin ijre mun'n, yɛ sɛ n fa tukpacɛ b'ɔ sa ndɛndɛ n yi amun su'n,

14amun bɔ amun ti min nvle nunfuɛ'm bɔ min dunman'n wo amun su'n, sɛ amun kan amun wun ase'n, sɛ amun srɛ min'n, sɛ amun fa amun wun mantan min'n, yɛ sɛ amun yaci amun nzuɛn tɛtɛ'n, kɛ n wo nyanmiɛn su lɔ'n, n ´sie min su n ´tie amun srɛlɛ'n. N ´yaci amún wun sa mun n ´cɛ amun, yɛ n ´yo man amun mɛn'n ´yo kpa sin i osu laa'n nun.

15Kɛ ɔ fin ndɛ'n, min nyin wo amun su, yɛ n ´fa min su n ´sie amun srɛlɛ nga amun ´srɛ i lika nga nun wa'n su.

16Kɛ ɔ fin ndɛ'n, m'an fa sua nga, ɔ ti min liɛ, min dunman'n ɔ ´tran su titi. Min nyin su tu-man su le, yɛ ɔ ´yo min anwlɛn su like tititi.

17Yɛ wɔ, sɛ a nanti sein min atin'n su kɛ ɔ́ si David fa nantili'n sa'n, sɛ a nian sa nga n kan kleli wɔ'n su a yo i sɛsɛsɛ'n, sɛ a fa min mmla fanunfanun'm be su'n,

18n ´yo man ɔ sielɛ'n ɔ ´taka kpa kɛ n kan kleli ɔ́ si David'n sa. N seli i kɛ: ‹A ´nyan ɔ ja nunfuɛ b'ɔ ´sie Izraɛl'n tititi.›

19Sanngɛ sɛ amun fa atin uflɛ'n, sɛ amun gua min mmla fanunfanun nga n fa mannin amun'n be ase'n, yɛ sɛ amun ko sɔ amuɛn mun nan amun koto bé bo'n,

20n ´tu amun min mɛn nga n fa mannin amun'n nun, yɛ sua nga n fali min dunman n sieli su'n, n su bu-mɛn i like fi kun. Ɔ ´yo kɛ wannzo nin nyannzuɛn like sa nvle-nvle'm be nunfuɛ'm be kwlaa be nyrun.

21Yɛ sua sɔ'n bɔ i dunman'n ɔ ´fu'n, sran nga bé ´sin i wun lɛ'n be kwlaa be nuan'n ´bo be wun. Be ´usa kɛ: ‹Ai! ?Ɔ yo sɛ ti yɛ Anannganman yo mɛn nga nin sua nga'm be sɔ-ɔ?›

22Yɛ be ´tɛ bé su kɛ: ‹Anannganman b'ɔ ti bé si'm bé Nyanmiɛn'n, b'ɔ ko fali be Ezipt mɛn'n nun lɔ bali'n, be kacili be sin sili i, be ko fali bé wun wlali amuɛn sɔlɛ nun, be kotoli amuɛn sɔ'm bé bo, be sɔli be. I sɔ'n ti yɛ man Anannganman fali nyrɛnnɛn nga kwlaa yili be su-ɔ.› »

← Chapter 6 Chapter 8 →