Psalms 83

balinese

1Duh Ratu Sang Hyang Widi Wasa, sampunangja Palungguh IRatu meneng kewanten. Sampunangja Palungguh IRatu meneng, tur sampunangja Palungguh IRatu nenten lingu.

2Indayangja aksi! Meseh-meseh Palungguh IRatune sami pada iur miwah jadmane sane geting ring Palungguh IRatu sami pada brontak.

3Ipun pada ngrencanayang pangindrajala marep ring kaulan Palungguh IRatune. Ipun pada mapacukan nglawan anak sane sayubin Palungguh IRatu.

4Sapuniki baosipune: “Maija! Jalanja iraga nguugang bangsannyane, apanga Israel kengsapin kanti salawas-lawasne.”

5Ipun sareng sami pada sararem ring rencananipune saha makanti sraya nglawan Palungguh IRatu, inggih punika:

6Wong Edom miwah wong Ismael, wong Moab miwah wong Hagar,

7wong Gebal, Amon miwah Amalek, wong Pilistin miwah jadmane sane ring Tirus.

8Kadi asapunika taler wong Asure sampun pada makanti sraya ring ipun, tur dados kanti sraya sane kukuh bakuh nyarengin parakaturunan Dane Lot.

9Margiangja marep ring ipun sakadi sane sampun margiang Palungguh IRatu marep ring wong Midiane miwah Sang Senapati Sisera lan ring Sang Prabu Yabin daweg ring Tukad Kisone.

10Palungguh IRatu ngaonang ida dane ring Endor tur sawan ida danene dados lelemekan ring tanahe.

11Margiangja ring parapamimpinipune sakadi sane sampun margiang Palungguh IRatu marep ring Sang Prabu Oreb miwah Seeb. Kaonangja sakancan pamrentahipune, sakadi sane sampun margiang Palungguh IRatu marep ring Sang Prabu Sebah miwah Sang Prabu Salmuna,

12sane mabaos sapuniki: “Iraga lakar ngrampas tanah duen Ida Sang Hyang Widi Wasa pabuat dadi gelah iragane.”

13Duh Ratu Sang Hyang Widi Wasa, sambehangja ipun sakadi abune miwah sakadi gumpange sane makeber ampehang angin.

14Sakadi genine ngeseng alase, sakadi genine ngarab-arab muunang bukite,

15uberja ipun antuk angin ribut druene, tur tengkejutangja ipun antuk angin Palungguh IRatu sane baret.

16Duh Ratu Sang Hyang Widi Wasa, tampelja muan ipune antuk kimud, tur kardija mangda ipun ngresep ring kawisesan Palungguh IRatu.

17Dumadakja ipun kakaonang tur katengkejutang ngantos salami-laminipun. Dumadakja ipun padem saha nandang kimud tan kadi-kadi.

18Dumadak ipun uning mungguing wantah Palungguh IRatu ngraga sane maraga Widi miwah pamrentah sane agung sane ngwengku mrecapadane sami.

← Chapter 82 Chapter 84 →