Psalms 69

balinese

1Duh Ratu Sang Hyang Widi Wasa, rahayuangja titiang. Toyane sampun nglancah baong titiange.

2Titiang kalebu ring endute sane dalem, tur nenten wenten genah titiang menjekan. Titiang kelem ring toyane sane dalem, tur ombake ageng nganyudang titiang.

3Titiang ngantos lesu masesambatan nunas tulung, tur kekolongan titiange ngantos tuh. Titiang sampun mengbeng matan titiange, ngajap-ajap pitulungan Palungguh IRatu.

4Jadmane sane tan pakrana geting ring titiang akehan geboganipune ring bok sane wenten ring tendas titiange. Meseh-meseh titiange misunayang titiang. Ipun sami pada siteng tur mamanah ngamademang titiang. Ipun maksa titiang ngwaliang barang-barang sane nenten paling titiang.

5Duh Ratu Sang Hyang Widi Wasa, dosa-dosan titiange nenten kasaruan ring ayun Palungguh IRatu. Palungguh IRatu wikan ring kanambetan titiange.

6Sampunangja titiang banggayanga ngawinang kimud anake sane pracaya ring Palungguh IRatu, duh Ratu Sang Hyang Widi Wasa Sane Maha Wisesa. Sampunangja titiang banggayanga ngawinang kimud anake sane nyungsung Palungguh IRatu, duh Ratu Widin Israele!

7Titiang sampun kanistayang malantaran Palungguh IRatu, samaliha titiang kaliput antuk kimud.

8Titiang satmaka dados wong pendonan ring pantaran nyama-nyamaan titiange, waluya sakadi wong sunantara marep ring kulawargan titiange.

9Subaktin titiange pamantuka ring Perhyangan Agung Palungguh IRatu morbor titiang waluya sakadi geni. Kanistan sane katuekang ring Palungguh IRatu punika sami nibenin titiang.

10Titiang ngasorang dewek malantaran mapuasa, tur rakyate pada nganistayang titiang.

11Titiang nyaluk pangangge sane muktiang mungguing titiang nandang duhkita, nanging ipun pada ngedekin titiang.

12Ipun pada maosang titiang ring margi-margine, tur jadmane sane demen mamunyah pada makidung ngeniang indik titiange.

13Nanging titiang puniki, titiang jaga ngastawa ring Palungguh IRatu, duh Ratu Sang Hyang Widi Wasa. Duh Ratu Sang Hyang Widi Wasa, saurinja titiang ring masa sane sampun selik Palungguh IRatu. Saurinja titiang malantaran sih pasuecan Palungguh IRatune sane ageng, santukan Palungguh IRatu ngamanggehang janjin Palungguh IRatu buat ngrahayuang titiang.

14Rahayuangja titiang saking endut genah titiang kalebu. Luputangja titiang saking meseh-meseh titiange, tur rahayuangja titiang saking toyane sane dalem.

15Sampunangja icena blabare nglancah titiang. Sampunangja titiang banggayanga anyud ring genahe sane dalem, wiadin kalebu ring bangbang patine.

16Duh Ratu Sang Hyang Widi Wasa, saurinja titiang malantaran kabecikan sih pasuecan Palungguh IRatune sane nenten rered-rered. Malantaran sih kapiolasan Palungguh IRatune sane ageng, ledangja mawali ring titiang.

17Sampunangja Palungguh IRatu nyingidang raga saking kaula druene. Saurinja titiang sane mangkin, duaning titiang sajeroning kamewehan sane ageng.

18Rauhinja titiang tur rahayuangja titiang. Luputangja titiang saking meseh-meseh titiange.

19Palungguh IRatu wikan ring indik titiange kabinjulin miwah kanistayang tur nenten kajiang. Palungguh IRatu nyingak meseh-meseh titiange makasami.

20Bebinjulane punika sampun ngenyagang manah titiange, tur titiang rumasa putus asa. Titiang sampun ngajap-ajap pitulungan nanging nenten wenten punapa-punapi. Titiang ngajap-ajap panglipur nanging nenten molih punapa-punapi.

21Rikalaning titiang seduk, ipun nguehin titiang racun. Rikalaning titiang rumasa bedak, ipun nguehin titiang cuka.

22Dumadakja panamiun ipune ngawinang ipun nyag. Dumadak papestanipune sane suci ngawinang ipun uug.

23Lempagja ipun mangda ipun buta. Dadosangja mangda tundun ipune tansah gemba.

24Briokangja pidukan Palungguh IRatune ring ipun, tur banggayangja pidukan Palungguh IRatune nibenin ipun.

25Banggayangja kemah ipune suung. Dumadakja nenten wenten anak angan adiri sane nongos ring kemahipune.

26Ipun pada nyangsaren jadmane sane sampun sisipang Palungguh IRatu. Ipun pada maosang indik kasangsaran jadmane sane sampun sakitin Palungguh IRatu.

27Suratangja sakancan dosa-dosanipune. Sampunangja ipun icena bagian sajeroning karahayuan paican Palungguh IRatune punika.

28Dumadak mangda wastan ipune kusap saking cakepan uripe. Dumadak mangda ipun nenten sareng munggah ring cacakan kaulan Palungguh IRatune.

29Nanging titiang sajeroning nandang pinakit miwah putus asa. Ratu Sang Hyang Widi Wasa, tingtingang tur rahayuangja titiang.

30Titiang jaga muji Ida Sang Hyang Widi Wasa antuk kidung. Titiang jaga nglumbrahang kagungan Idane malantaran ngaturang panyuksma ring Ida.

31Indike punika jagi ngawinang ledang pakayunan Ida Sang Hyang Widi Wasa, langkungan ring aturan banteng ring ayun Idane miwah langkungan ring aturan banteng sane mokoh.

32Rikala jadmane sane katindes ngeton indike punika, ipun jaga pada rumasa liang. Jadmane sane astiti bakti ring Ida Sang Hyang Widi Wasa jaga pada molih pikukuhing manah.

33Ida Sang Hyang Widi Wasa mireng pinunas jadmane sane kakirangan tur Ida nenten lali ring kaulan Idane sane wenten ring pangkeng.

34Ih akasa miwah pretiwi, segara miwah sakancan gumatap-gumitipe sane wenten irika, pujija Ida Sang Hyang Widi Wasa.

35Ida jaga ngrahayuang kota Yerusaleme miwah jaga ngwangun malih kota-kotan Yehudane.

36Katurunan parekan-parekan Idane jaga ngwarisin tanahe punika, tur jadmane sane astiti bakti ring Ida jaga jenek magenah irika.

← Chapter 68 Chapter 70 →